النخوة والجدعنة صفات دائما نجدها في الرجال، ولكن قصتنا اليوم عن امرأة بـ 100 رجل ، تلك المرأة التي أنقذت أسرة كاملة بكل شجاعة بعد سقووطهم في الترعة، تابعونا من خلال التقرير التالي لمعرفة التفاصيل:
وحكايتنا النهاردة خير دليل ،وأوضح مثال على إن أى صفة ممكن تكون موجودة فى أى شخص،والناس معادن،ووقت الموقف وفى عز الأزمة بتعرف اللى قدامك حتى لو متعرفوش بعض ..ياترى بطلة حيايتنا النهاردة قلبت السوشيال ميديا ليه؟وعملت إيه رجالة معرفوش يعملوه؟مش هتصدق أنقذت حياة الأسرة دى إزاى يالا نعرف التفاصيل فى الفيديو ده ..
لما يتقال عليها ست ب 100 راجل ما يجيبها الإ ستاتها ،ده مش من فراغ لا ،لازم تكون عملت اللى ميقدرش 100 راجل يعملوه لو إشتركوا فيه،مش كانوا وافقين يتفرجوا؟
كل الحكاية إن بطلة حياتنا إسمها أمانى محمد عندها 28 سنة فى عز شبابها ،البنت الجدعة دى كان راكبة توكتوك فى فى قرية ميت سهيل مركز مينا القمح بمحافظة الشرقية،التوكتوك أتحرك وفى الطريق وهى ماشية جنب ترعة كده ،والناس كتير وافقين حوالين الترعة،الفضول خلاها عايزة تعرف فى إيه ،الناس دى كلها واقفة ليه كده غريبة؟ وقفت التوكتوك ونزلت بتقولهم فى إيه يا رجالة ؟
ولسه واحد من الشباب اللى كانوا واقفين بيحكلها،عنيها وقعت على العربية اللى جوة الترعة غرقانة فى المية ومقلوبة على جنبها ،وخلاص كلها لحظات واللى جوه العربية هيفارقوا الحياة..
أمانى تسكت ؟ تقف تتفرج واللى جوه العربية بيفارقوا الحياة؟ ولا تقف تصور علشان تاخد اللقطة إن أول واحد نزل الفيديو على السوشيال ميديا؟
ولا فكرت فى أى حاجة من دى،وما شاء الله رجالة حواليها فى كل ناحية بتتفرج وبتصور وتشير أهم حاجة،وأرواح الناس نشوفها بعدين.
أمانى خدت عصاية حديد من راجل كان واقف ونزلت الترعة وكلها أمل وخوف إنها تلاقيهم فارقوا الحياة،ولكن سبحان الله أمانى كسرت إزار العربية وقدرت إنها تخرج 4 من الصغار وال2 الستات ولوحدها بدون أى مساعدة من أى شخص،أمانى كان معاها ربنا .
أمانى قالت شيء ألهمني آخد حديدة من راجل واقف ونزلت كسرت إزاز العربية، حاولت بسرعة وربنا أداني قوة من عنده أطلع الأطفال والستات.مش بس كده عملت لهم إسعافات أولية ،بسبب المية الكتير اللى شربوها،بحكم إنها شغالة رقيب تمريض عسكرى
أمانى قالت محدش كان بيساعدها كله ماسك الموبايلات وبيصوروا، حتى لما طلعت الصغار والستات من الترعة محدش كان بيساعدها.
الغريب إن الطريقة اللى أنعشتهم بها كانت فى منتهى الجدية والذكاء،وده اللى فاجئ الدكاترة لما الحالات وصلت المستشفى،وخدوا رقم تليفونها للتواصل معها، ولكنها مكانتش تتخيل إن الموضوع يتحول لتريند بالطريقة دى خالص .
لما زوج السيدة سائقة السيارة وأبو الصغار دول وصل بالمناسبة هو دكتور بردوا ،عرض على أمانى مكافأة مبلغ كده على اللى عملته ،ولكن هى زعلت جدا من رد فعله وقالت إنها مش منتظرة مكافأة وإن اللى عملته ده موقف إنسانى .
أمانى قالت إنها حصلها إصابة فى إيديها بس ده ميجيش حاجة جنب إن بنى أدم يروح فى لحظة، كمان ردود أفعال الناس على السوشيال ميديا أزعجتها جدا وبتستغرب إن الناس كانت بتقولها اشمعنى أنتي اللي نزلتي ما الكل كان واقف يتفرج! كانوا عايزني أعمل أيه؟ أقف أصور زيهم وأسيبهم يموتوا.
حتى أهل قريتها شايفين إنها حطت رجالة القرية فى موقف وحش،لما أنقذت المصابين بالطريقة دى وإزاى تنزل المية وسط الحشد الكبير ده من الشباب والرجالة؟،وكان المفروض متدخلش بالطريقة دى،ولكن أمانى حمدت ربنا على اللى عملته أنها وصلت فى الوقت المناسب وقالت لو أتكرر نفس الموقف هيكون ده بردوا رد فعلى ومش هتردد لحظة إن أعمل كده ..
كمان الدكتورة مايا مرسي، رئيس المجلس القومى للمرأة،أشادت باللى أمانى عملته وقالت ربنا يحميكى نموذج لمصرية نفخر بها ..بنت مصر الأصيلة
أمانى بتصرفها ده بقيت حديث الناس الساعات اللى فاتت على السوشيال ميديا،ونالت أعجاب كبير جدا من الجماهير،وقد إيه هى جدعة وشهمة وجريئة بتصرفاتها اللى كلها خير وحب للأخرين ،ويمكن اللى بين تصرفها أكتر ،السلبية اللى كانت ظاهرة من رجالة وشباب قريتها.. إنتوا رأيكوا إيه فى تصرف أمانى وشايفين تصرفها إزاى؟ شاركونا برأيكوا فى التعليقات.
