صرفت عليكي اكتر من 10 الاف جنيه وهخليني جدع معاكي للاخر ومش هحاسبك على مصاريف المواصلات والفسح لأن مراعي ظروف والدتك، بتلك الكلمات شاب وخطيبته أصبحوا حديث السوشيال ميديا.
وخد عندك بقى تريقه على انتقادات لكن ما حدش عارف ايه اللي حصل بينهم بالظبط. فياتري ايه تفاصيل الورقة اللي لفت السوشيال ميديا وقلبت الدنيا، وليه اللي مكتوب فيها قسم الناس نصين؟
بيقولوا النهايات أخلاق، بس في واقعة جديدة تبان عاديه لكن تفاصيلها أغرب من الخيال: واحده طلبت من خطيبها الانفصال وقالت له مش هينفع نكمل مع بعض، وكل شئ قسمة ونصيب.
وده موقف عادي بيحصل كتير كل يوم ويمكن كل دقيقة، بس اللي مش عادي بقى تصرف خطيبها ورد فعله، لان الشاب ده فاجئها وفاجئ المصريين كلهم لما طلع ورقه مكتوب فيها كل مليم صرفه أيام الخطوبة.
طب ازاي؟ الشاي ده طلع مسجل كل حاجة اشتراها من ساعة مافكر يتقدم اصلا، وطبع بيهم ورقة سلمها لخطيبته وطلب منها تسدد اللي دفعه، يعني خد عندك مثلا:
كاتب سعر الجاتوهات والفاكهة اللي واخدها وهو رايح يتقدم وكمان سعر التورتة اللي جابها يوم قراية الفاتحة، وطبعا واحد بالشخصية دي مش هيعدي مصاريف يوم الخطوبة بالساهل، وده اللي حصل فعلا لأنه مسجل كل تفصيلة اشتراها للعروسة، وعموما حفلة الخطوبة كلفته 4000 آلاف جنيه.
ودي البداية بس، لأن بعد كده تيجي قايمة الهدايا وعد معايا بقى: حفل عيد ميلاد للعروسة : 1500 جنيه، وبوكس هدايا في عيد الحب : 450 جنيه، وبوكس هدايا وشيكولاتة في رأس السنة: 350 جنيهه، وجبة غداء بمطروح : 400 جنيه، ودبدوب احمر : 250 جنيه، ده غير تمن الورد والشكولاته َغبره وغيره.
وضيف على كده كمان تمن تذاكر السينما وتكلفة خروجتهم في الملاهي، لا وإيه كاتب كل لعبة وجنبها سعرها، والمهم يعني ان حسبة الخطوبة وصلت ل10 آلاف و840 جنيه.
بس خد بالك، هو في الآخر حب يعمل حركة جدعنة، وساب ليها ملحوظة في أخر الورقة كاتب فيها:انا ما حسبتش اللي صرفته في الخروجات والفسح والمواصلات رغم ان كبها كانت أوبر.
ولاحتى حسبت تمن المشاريب في الكافيهات أو عزومات الغدا اللي كانت برة، لأن الست والدة العروسة توفاها الله، وهو يعني ما كانش يعرف يدخل البيت في عدم وجود حد من أهلها، فكل مقابلتهم تقريبا كانت بس هو قدر ظروفها ومحبش يحاسبها على مصاريف الخروجات.
وطبعا صورة الورقة لما انتشرت على فيسبوك والسوشيال ميديا عملت حالة قلبان ملهاش أول من آخر والناس اتقسمت صفين:
صف بيقول للعروسة بوسي ايدك وش وضهر، ده انت ربنا نجدك.وصف تاني شايف إن العريس معملش حاجه غلط وطلب حقه خصوصا ان في بنات كتير بتطلب هدايا بمبالغ خيالية.
بس اللي خلي الناس مستغربة اكتر انه مسجل كل حاجة بالورقة والقلم، لكن مين العرسان دول ومنين بالظبط محدش عارف.
كل اللي بان في الورقة انهم خرجوا في المعمورة، وده اسم منطقة مشهورة في اسكندرية، تفتكروا قصة الاتنين دول انتهى على إيه؟ وإيه التصرف الصح في موقف زي ده ومين الغلطان العروسة ولا العريس؟
