فيديو غريب اتصور فى المملكه العربيه السعوديه لشخص يرتدي زي الرجل الأخضر، ويقوم بتصرفات لا يمكن أن تخطر على بال أحد، جعلت كل السعوديين يبحثون عنهلمعرفه حكايته.
مين هوا الرجل الاخضر اللى ظهر في السعودية؟ وكان عايز إيه؟ .. كل ده واكتر هنعرفه مع بعض في التقرير التالي:
خلال الساعات اللى فاتت الدنيا كانت مقلوبه في السعودية على واحد لابس لبس الرجل الاخضر وعمال يتحرك ويتنقل بين السيارات في الشارع، الكل كان عايز يعرف مين ده وبيعمل ايه كده.
اللى ظاهر في الفيديوهات اللى اتصورت ليه، انه عمال يتنطط ويتنقل من سياره للتانيه، والناس واقفه ومندهشه من اللى بيحصل، فيه منهم اللى فرحان وسعيد ومنهم اللى مضايق من اللى بيعمله الرجل الأخضر، بس محدش كان عارف هو بيعمل ليه كده بالظبط وقتها.
لحد ما الشرطة السعودية تدخلت في الموضوع وحاولت تقبض على الرجل الأخضر، وأثناء محاولة القبض عليه أول مرة فى الشارع وهما بيركبوه عربيه الشرطة فجاء جرى منهم لمكان غير معلوم.
بعدها طلعت قوات كتيره من الشرطة السعودية تدور على الرجل الاخضر ده وتحاول تعرف مكانه فين وليه هرب منهم أول مرة.
بعدها بكام ساعه مش كتير يعنى، أعلنت دوريات الأمن بمحافظة الأحساء في المنطقة الشرقية بالسعودية، عن القبض على الرجل الاخضر، واللى اتضح أنه مواطن سعودي كان بيحاول يحتفل بمناسبة يوم التأسيس السعودى، بس الموضوع زاد منه حبتين وهوا بيحاول يهزر ويضحك مع السائقين في الشارع، يركب عربيه ده وينزل من على ده، الشرطة شافته، وهى مفيهاش هزار في موضوع الطرق والمواصلات عموما.
وعشان كده تم القبض عليه لتعطيله حركة السير بالتنقل بين المركبات ومحاولة الهروب من مركبة أمنية، وجرى إيقاف المُتهم من قبل الدوريات الأمنية واتخاذ الإجراءات النظامية السعوديه ضده، وإحالته إلى النيابة العامة.
الغريب بقى هنا هو رد فعل المجتمع السعودي عليه على السوشيال ميديا، ناس كتير نشرت الفيديو بكثافة، منهم اللى كان واخد الموضوع بضحك وهزار واعتبر أن الرجل الاخضر لا كان بيعطل طرق السير ولا حاجه، هو كان بيتحرك وقت ما إشارة المرور كانت بتبقى مغلقه بس للسيارات، وده أمر شافوا أنه أمان شويه ومافيش فيه مشكله ولا حاجه.
الجزء التاني من الناس كان شايف انه اللى عمله الرجل الاخضر ده وتنطيطه من عربيه لعربيه كان فيه خطر على الناس وحركة المرور فى الشوارع، ومفيش مبرر أبدا لاى حد أنه يعمل كده، واستشهدوا بكده بلائحة الذوق العام السعوديه.
وللى مايعرفش فلائحة الذوق العام في السعودية هي مجموعة الآداب السلوكية والاجتماعية التي تنطوي تحت إطار اللباقة التي يفرضها المكان والزمان وعامّيته، ومنبعها الثقافة الإنسانية والسلوكيات المتعارف عليها، وتحكمها لائحة تنظيمية بدأ تنفيذها في السعوديه سبتمبر 2019 وتمنع كل ما من شأنه المساس بالذوق العام والتقليل من احترام الثقافة والتقاليد السعودية أو الإساءة إليها وتضم مخالفات يعاقب مرتكبها بغرامات مالية، أقلها 50 ريالاً وأعلاها 3000 ريال ويُلزم بتغطية تكاليف الإصلاح وإزالة الأضرار الناجمة عن أي مخالفة.
لحد هنا ونكون عرضنا ليكم قصه الرجل الأخضر اللى ظهر فى السعودية، من رأيكم بقى اللى عمله ده صح ولا غلط، اكتبوا في التعليقات.
