عملوا له زفة ملوخية بالطشة فى قصر الكبابجى من التي يحبها كرشه، وجلس على سفرة ليس لها أخر وأمامه المحمر والمشمر ودلع كرشه أخر دلع!
مش بس كده زار الأهرمات وممشى أهل مصر وقلب مصر بكرشه اللى هو مصدر رزقه ياسين جنكيز أختار البلد المناسبة لكرشه .
مصر أهل الكرم والاكل اللى لا يعلى عليه! والضجة اللى عاملها من وصوله ولحد النهاردة الكل بيتكلم عليها فياترى جاى مصر يعمل إيه؟ وليه الناس مبهورة ومعجبة به كده؟ خفة دمه قربته من المصريين وحسوا إنه شبهوهم!
بمجرد ما البلوجر ياسين جنيكز أعلن على أنستجرام انه جاي مصر ،وعمل قلبان على السوشيال ميديا ،لإن معروف جدل للمصريين بكرشه والحركات اللى بيعملها دى ..وأول ما نزل مصر على طول راح يدلع كرشه، مبدأه فى الحياة ما يعدل المود إلا الفود ،ويمكن ده اللى مخليه قريب من المصريين وحاسين إنه واحد منهم فيهم .
جنكيز من الطيارة على قصر الكبابجى عدل، وإستقبلوه بزفة لو فرحه مش هيتعمل له الزفة دى وإحتفال وحفاوة مش جديدة الحقيقة على مطعم قصر الكبابجى اللى هو بتاع المشاهير الأجانب كلهم .
عندك مثلا كوكسال بابا التركى اللى فى أول زيارة لمصر راح قصر الكبابجى بردوا ..فتقريبا صيته سمع فى تركيا والأكل أغرى جنكيز وقرر إنه يعمل كده فى أقرب زيارة له لمصر وحصل فعلا، كمان نويل روبنسون اللى إنبهر بالأكل والملوخية خلال زيارته لمصر.
اللى عملوه لجنكيز أبهره وهو مبطلش رقص بكرشه لحد ما دخل المطعم وبقوا يحطوله كل ما لذ وطاب خروف وديك رومى وبط وحمام كل الأكل المصرى الأصيل اللى قلبك يحبه كان قدام جنكيز، وده كله على أصوات الطبل والناس حواليه وه بيرقص وشو الملوخية طبعا اللى قصر الكبابجى مشهور به .
وبعد ما دلع كرشه وبسطه ..جنكيز قرر يدلع نفسه ويزور الأهرامات وممشى أهل مصر ومع كل مكان بيروحه بيتصور مع الناس ويصور هو الفيديوهات دى على أغنيته اللى إتشهر بها من الأول وهيستفيد ويفيد أنا هقولك إزاى
جنكيز نازل مصر زيارة لشغل وبما إن كرشه سر شهرته ومصدر رزقه بينزل فى اى حتة يعمل الحركات بتاعته بكرشه المشهور ويصور الفيديوهات وينشرها عنده بكده يجيله أرباح بالملايين وفى نفس الوقت بيتعمل تسويق لمصر بما إنه بيتابعه ملايين على مستوى العالم .
إنتشر له فيديوهات وصور والناس حواليه وهو كل اللى بيعمله بيهز كرشه وبس .. وبحركات بسيطة جدا أى حد ممكن يعملها، فتخيل هزة الكرش دى بكام؟
لما تعرف السر فى شهرة ورقصة جنكيز والملايين اللى بقيت عنه وإنه فى الأصل مكانش معاه اللضا هتقدر نعمة الكرش اللى عندك وهتستثمر فيه كمان!
ياسين كان فقير جدا وبيشتغل في الريف التركي وبيجمع محاصيل،ولكن مكانش مرتاح فى شغلانته لحد ما رقص بالصدفة بكرشه وطاقة القدر إتفتحت له، وشهرته كانت من 2021 مع اول فيديو نشره قلب الدنيا ومن وقتها قرر يستغل كرشه ويبقى ده شغله الشاغل..وبقى من أغنياء تركيا.
ياسين عنده حوالي 14 مليون متابع على تيك توك وانستجرام مليون ونص ،والبركة فى كرشه اللى لو مستحيل أكيد يفرط فيه فى يوم من الأيام وإلا هيرجع يشتغل فى الريف التركى تانى والاهم إن فلان أبو كرش مبقاتش تريقة أو تقليل من حد ..فلو عندك كرش زى ياسين خليك فخور بكرشك وصدقوا لما قالوا الراجل اللى من غير كرش ميسواش قرش.
