هل تعرف ان فيه بلاد خارج مصر تعرض عليك فرص إستثمار كبيرة وأيضا مبالغ مالية مقابل بفقط أن تعيش فيها ؟!
وفوق هذا كله مميزات أخرى عديدة ستتعرف عليها من خلال التقرير التالي:
صحيح معظم الناس بتكد وتتعب عشان بس حلمها إنها تسافر خارج بلادها ويعيشوا برا حتى لو هيدفعو ملايين ..
لكن تخيل بئا إن فيه بلاد بتقولك احنا اللي هندفعلك فلوس وهنديلك فرص كبيرة مقابل إنك تعيش معانا وكمان لو عمرك فوق 18سنة هنقدر تساعدك ونوجهك كمان بمشاريع إستثمارية
طب ياتري البلاد دي مين ؟ وهل لكل بلد عرض مختلف للمواطنين اللي حابين يعيشوا فيها ولا كلهم زي بعض ؟!
أكيد طبعا كل بلد بتختلف عن التانية وحسب جريدة الوطن البلاد دي تبقي 7 بلاد وقرروا انهم يقدموا عروض قوية عشان يجذبوا مواطنين يعيشو فيها
طب ياترى عملوا كده ليه ؟!
لأن كلهم أجمعوا أنهم عندهم نقص كبير في السكان وعدد المواليد بمختلف تفاصيل كل بلد عن التانية وعشان يستمروا في الاستثمار والتواجد بشكل عام قرروا انهم يجذبوا سكان من خارج بلدهم بالعروض اللي هقول عليها دلوقتي عشان يزودوا سكان بلادهم ..
وده زي أسبانيا مثلا : لأن بينخفض عدد سكانها بشكل ملحوظ ومعدل المواليد هناك بينخفض عدد المواليد لي 1.35 لكل سيدة.
ده غير كمان إن السكان اللي هما أصغر في السن بيروحوا يعيشوا في بلاد تانيه عشان كده أسبانيا عملت حوافز لجذب سكان جدد.
فمثلا قرية يونجا في أسبانيا عملوا منح للشباب المقبلين علي الزواج بقيمة 3600 دولار أمريكي عشان يعيشوا هناك وكمان هتاخد نفس المبلغ لكل طفل هيتولد في القرية .
اما إيطاليا :
فهي كمان بتعاني من نفس مشكلة أسبانيا وهى نقص في أعداد السكان وبرضه في منها مدن بتدفع فلوس للناس عشان يعشيوا فيها ومنها مدن بيمنحوا ساكنها بيت مجاني مقابل إنك تعيش معاهم.
وفي قرية كانديلا اللي في ايطاليا مثلا بيدوا للشباب حوالي 950 دولار والمقبلين علي الزواج 1400دولار أمريكي مقابل أنهم يعيشوا هناك
أما أيرلندا :
فقررت إنها تحل مشاكل سكانها بشكل اقتصادي بحت وهي تمول مشروعات بينها وبين أي حد حابب يعيش فيها
وكمان هتمنح سكانها الجدد حوالي 1200دولار أمريكي في حالة لو حاابب تنقل شركتك الخاصة عندها.
ده كمان لو وافقت أيرلندا علي طلبك لتمويل مشروعك اللي لسه هيبدأ هتساعدك ساعتها انها تكبر مشروعك في أكبر أسواق العالم وتوصله للإتحاد الأوروبي وكل ده في مقابل انك تعيش هناك وبس
أما لو حبيت تعيش في جزيرة سارك :
فأعرف انك ولا هتدفع فلوس عشان تعيش هناك ولا هيكون ليك ضرايب في أي حاجه ده غير إن البلد هادية لدرجة إن معظم اللي عايشين هناك بيمشوا علي رجليهم يا على الأحصنة يعني مفيش أي صوت كلاكسات لأي عربية لأنهم في الغالب مابيركبوهاش..
-أما نيوزيلندا :
فغير إنها هتدفعلك فلوس كمان هتوفرلك وظايف، وهتديك بيت بقيمة 165 ألف دولار ولكن هما بيهتموا جدا بالناس اللي عندهم خبرة في معالجة الألبان ومنتجات السياحة والزراعة والغابات يعني لو انت عندك خبره من دول اضمن ليك كمان وظيفة ثابته.
وطبعا اكتر بلد معظمنا نفسه يروحها اصلا هي اليونان :
مش هتصدق إن كمان اليونان عندها انخفاض في عدد السكان وهتدفعلك فلوس مقابل المعيشة هناك وقررت الكنسية الأرثوذكسية اليونانية المحلية بدفع 590 دولار أمريكي شهري أول 3 سنين بالنسبة للعائلات اللي حابة تنتقل للمعيشة هناك وكل اللي انت محتاجه انك هتقدم انت وعيلتك وهما عليهم الباقي.
أما دولة تشيلي بقا فكرت برا الصندوق، وعملت برنامج حكومي بالنسبة لرواد الأعمال وإسم البرنامج “ستارتب تشيلي”
وده للي عاوزين يعملوا شركات هناك ومحتاجين تمويل وده للي عمرهم يزيد عن سن 18سنة وعاوزين يقدموا علي المعيشة هناك وعندهم فكرة مشروع عاوزين يعملوه زي ماقولنا
والبرنامج بيضم أعمال البناء والأشغال والنمو ، و مدته 4 شهور وبيوفر كمان حوالي 14 الف دولار أمريكي.
وكمان بتمنحك مدة إقامة سنة واحده وبتوفرلك من خلال مساحة العمل المشترك بينك وبين دولة تشيلي إنها توصلك للموجهين والمستثمرين.
وإنت بقى قولنا لو حبيت تسافر برا مصر هتسافر ساعتها أي بلد من اللي قولنا عليهم ولا هاتروح اي بلد تانية ؟
متنساش رأيك في التعليقات.
