الذهب في مصر يكسر كل الحواجز لكييسجل أسعار تاريخية قربت من ال2400 جنيه للجرام عيار 21 الأكثر تداولا في مصر.
وهنا الناس انقسمت نصين، منهم اللي عاوز يشتري بس خايف السعر ينزل، ومنهم اللي عاوز يستنى بس خايف السعر يزيد.
فيا ترى ايه الصح؟ ولو اشتريت ايه المطلوب عشان تحقق أكبر مكسب وميضحكش عليك؟ وإمتى تبعد عن الدهب وتشتري شهادات ادخار؟
اسكريبت..
الناس محتارة تشتري دهب ولا لأ، والحقيقة عمرو المغربي، عضو شعبة الدهب قالك طالما معاك فلوس زيادة اشتري علطول، الدهب طول عمره استثمار آمن.
ولو نويت خلاص في كام 5 حاجات لازم تخلي بالك منهم، يعني الأفضل تشتري الجنيه الدهب وبعدين السبايك لان سعر المصنعية عليهم أقل من المشغولات الذهبية، والافضل برضه انك تشتري السبائك 5 و 10 و 20 جرام علي الترتيب.
طيب ليه؟
ميزة السبايك الصغيرة، إنها هتنجزك في حالة الطوارئ يعني لو اتزنقت في مبلغ تقدر تبيع سبيكة وزنها قليل على قد احتياجك.
لكن لو كنت شاري بالفلوس كلها سبيكه واحده وزنها كبير هتضطر تبيعها كامله وممكن تخسر فيها لو بعت في وقت انخفاض الأسعار.
وخد بالك وأنت بتشترى الدهب لازم تاخد فاتورة مختومة من الجواهرجى ومكتوب فيها التفاصيل، ويستحسن برضه تشتري من محلات ليها اسمها في السوق عشان تضمن حقك.
كمان بص كويس أوي على الدمغة لأنها زي شهادة ميلاد لكل قطعة ذهبية وفيها تاريخ التصنيع وعيار الدهب لمنع أى غش فى المشغولات الذهبية
وعشان ميضحكش عليك، ضروري تعرف ان سعر الدمغة وضريبة القيمة المضافة على الجرام حوالى 10 جنيه
إنما المصنعية بقي فدي تقدير من الجواهرجى والصنايعى لشغله، عشان كده سعرها في المشغولات الذهبية بيختلف من محل للتاني، وهتلاقيه مابين 100 – 170 جنيه للجرام وبتوصل إلى 200 جنيه فى البراندات الكبيرة.
لكن سعر المصنعية على الجرام فى الجنيه الدهب 50 جنيه، يعنى متوسط المصنعية فى الجنيه الدهب بالكامل ووزنه 8 جرام من 250 إلى 400 جنيه
وبرضه سعر المصنعية فى سبيكة الذهب 50 جنيه للجرام وكل ما يزيد وزن السبيكة بتقل المصنعية.
وآخر حاجة بقى: الاستثمار في الدهب محتاج نفس طويل سنة أو اتنين على الاقل، فلو معاك مبلغ زيادة وعاوز تكسب فيه على المدى البعيد الدهب هيبقى اختيار مناسب ليك.
لكن لو بتدور على عائد شهري يبقى عليك وعلى شهادات الادخار، وأشهرهم:
شهادات بنوك الاهلي ومصر والقاهرة:
الشهادة الأولى لمدة 3 سنوات بسعر فايدة ثبات 19% والعائد شهري.
والشهادة التانية متناقصة بسعر فايدة 22% لأول سنة و 18% السنة الثانية و 16 % السنة التالتة ويصرف العائد شهريا.
كمان بنك الcib منزل 3 شهادات:
الشهادة الأولى 3 سنوات بفايدة 20% وحد أدنى للشراء مليون جنيه
والشهادة التانية بفايدة 19% وحد أدنى للشراء 200 ألف جنيه.
والشهادة التالتة بفايدة 18% وحد أدنى للشراء 10 آلاف جنيه
وبعده ييجي البنك الخليجي المصري، بشهادة ثلاثية وفايدة 23% في السنة الأولى، وبفايدة متغيرة في السنتين التانية والتالتة حسب سعر الإيداع المعلن في البنك المركزي.
وفي بنك qnb, موجودة شهادة بفايدة 19.25% لمدة 3 سنوات، والحد الأدنى لشراء الشهادة 500 ألف جنيه ومضاعفات الـ1000 جنيه.
واخيرا عندك شهادة البنك الزراعي والعائد 19% ويصرف شهريا أو 19.5% ويصرف العائد سنويا.
انتم كمان شاركونا برايكم وقولوا لنا لو معاكوا فلوس هتشتروا بيها دهب ولا شهادات ادخار؟
