العدس أصبح ب40 جنيه؟ وما سعر الزيت؟ سعرها مرتف؟ العديد من السلع أسعارها ارتفعت حتى السكر لم يسلم من ارتفاع سعره، ولكن الحكومة فاجئت المواطنين وأعلنت عن فتح معارض أهلا رمضان قبل الموسم بـ 3 شهور، فعل الاسعار ستكون مخفضة؟ هذا ما سنتعرف عليه من خلال التالي:
معروف ان استهلاك المصريين للأكل والشرب بيزيد كل سنة في رمضان، موسم بقى كل سنة وانت طيب، بس رمضان 2023 جاي بعد ظروف صعبة داست على الكل.
وفي العادي معارض اهلا رمضان بتبدأ قبل الشهر الكريم بحوالي 15 أو 20 يوم، بس مع الظروف الصعبة اللي بنعيشها دلوقتي، الحكومة قررت تعمله قبلها ب3 شهور، وبداية من يناير تقدر تروح وتشتري اللي انت عاوزه بأسعار أقل من باقي السوق.
وحسب الخطة، كل محافظة هيبقى فيها 5 معارض اهلا رمضان على الاقل، وفي محافظات تانية عدد المعارض فيها هيوصل إلى20 و30 معرض كمان وطبعا ده بيحدده الكثافة السكانية لكل محافظة.
ونيجي دلوقتي بقى لاهم سؤال: الأسعار اخبارها ايه؟ بص ياسيدي السلع الموجودة في المعرض اغلبها سلع أساسية يعني زيت، سكر، دقيق، مكرونة، سمنة وهكذا.
وحسب عادل ناصر، نائب رئيس الاتحاد العام للغرف التجارية ،وزير التموين قعد مع التجار وقالهم انا عاوز تخفيض في السلع ميقلش عن 15% أو 20%، مقارنة بأسعارها خارج المعارض.
وعلى فكرة الاتحاد العام للغرف التجارية هو اللي شايل نفقات المعرض كلها سواء بقى إقامة أو كهرباء أو مياه، يعني لو في تاجر حابب يشارك كل اللي عليه يروح ببضاعته والاتحاد هيديه مكان للعرض ومش هيدفع كهرباء ولا مياه وكله ببلاش.
وكل ده عشان يقدم خصومات كويسة للناس احتمال توصل الى 35%، خصوصا بعد قرار البنك المركزي بإلغاء نظام الاعتمادات المستندية والافراج عن البضايع المحجوزة في المواني
وحسب خطة الحكومة، الأولوية في الإفراج الجمركي هتبقى للسلع الغذائية، خاصة في ظل اقتراب شهر رمضان المعظم، وكمان كل حاجة تخص مستلزمات الإنتاج.
وزيادة في تطمين المواطنين، وزارة التموين قالت ان احتياطي مصر من سلع زي الدواجن واللحوم والأرز يقارب الـ6 شهور، أما مخزون الزيت فيكفينا 5 شهور.
كمان مفيش أي تحركات في أسعار السلع الأساسية سواء على المدى القريب أو خلال شهر رمضان الجاي، والمخزون الاستراتيجي من السلع يكفي ويزيد عن الحاجة.
وبعد إلغاء البنك المركزي للاعتمادات المستندية، خرجت التوقعات بانخفاض الأسعار خلال الفترة الجاية مع زيادة عرض السلع فى السوق، خصوصا لما الخامات تدخل المصانع ويبدأوا يشتغلوا ويطلعوا انتاج.
فهل سبق واشتريتوا من معارض اهلا رمضان السنين اللي فاتت والتخفيصات فيها كانت ازاي؟ طيب تنصحوا الناس تشتري منها؟ ولو انت تاجر ممكن تشارك فيها ولا خايف على مكسبك؟
