انهيار في اسعار الذهب، وكل ساعه والأخري يوجد انخفاض جديد في سعر الجرام. واللافت في الموضوع أن هذا الخفاض تزامن مع الموافقة الرسمية على مقترح اعفاء واردات الذهب من الجمارك، وتحديدا الذهب الذي سيدخل البلد بصحبة المصريين الخارج.
ورغم الاخبار الايجابية، دي وزارة التموين عندها نصيحه وتحذير في نفس الوقت.فيا ترى الهبوط ده مستمر؟ ولا دي آخر فرصة عشان تشتري بسعر مناسب وتحقق أكبر مكسب ممكن في السوق؟
من بدايه 2023 سعر الذهب بتسجل ارتفاعات جنونيه لدرجة ان عيار 21 كان قرب من 3000 جنيه. لكن دلوقتي الاسعار في هبوط مستمر.
وده خلى أي حد معاه قرشين كان ناوي يشتري بيهم دهب يقرر يستنى شويه على أمل إن الاسعار هتنزل اكتر واكتر فيبقى مكسبه أكبر، وهو ده بالظبط اللي لازم تخلي بالك منه، طيب ليه ؟
بص ياسيدي عالميا أسعار الذهب حاليا في انخفاض، ومحليا عندك مبادرة اعفاء الدهب مع المصريين اللي جايين من بره، ومتوقع انها تزود المعروض من الدهب في السوق ويبدأ سعره ينزل.
بس المشكلة بقى ان اغلب البنوك العالمية متوقعة ارتفاع أسعار الدهب الفترة الجاية، وعشان كده الدكتور ناجي فرج مستشار وزير التموين لشؤون صناعة الذهب، نصح المصريين بالتوجه للشراء، وقال إن الدهب العالمي في انتظار ارتفاعات قوية جدا لدرجة ان سعر الأوقية ممكن يتخطى 3 آلاف دولار خلال شهور، نقلا عن موقع الشروق.
وده برضة رأي هاني ميلاد، رئيس شعبة الدهب، واللي شايف إن الأسعار الحالية للدهب بعد الانخفاضات الأخيرة تعتبر فرصة مناسبة للشراء، لكنها مش هتكمل لفترة طويلة وخلال أسابيع هترجع للارتفاع مرة تانية، حسب مصرواي
وعشان تتخيل القفزة اللي ممكن تحصل في الأسعار، فلازم تعرف ان سعر الأوقية دلوقتي في مستوى ال2000 دولار.
وحاليا، انخفاض الأسعار سببه الأساسي، التراجع الكبير اللي بيحصل في عمليات شراء الدهب، بسبب حالة الارتباك في السوق بعد الإعلان عن المبادرة الجديدة، وطبعا ده قلل الطلب الأسعار كمان قلت.
وعشان تستفيد من المبادرة في 4 شروط لازم تعرفهم:
1. الإعفاء هيطبق على الأشكال نصف المشغولة، والمُعدة للتداول النقدي والحُلي والمجوهرات وأجزائها من معادن ثمينة، يعني ببساطة القرار هيتنفذ على السبايك والجنيهات والمشغولات الذهبية.
2. الاعفاء ده مش متاح على أصناف اللؤلؤ الطبيعي، أو المزروع، أو الأحجار الكريمة، أو شبه الكريمة المركبة، أو المُرصعة على الحلي والمجوهرات وأجزائها.
3. مدة الإعفاء 6 شهور بس
4. الاعفاء هيكون على الضريبة الجمركية والرسوم التانية، بس ضريبه القيمة المضافة موجودة وهتدفعها.
وعشان تطمن، دكتور ابراهيم عشماوي مساعد وزير التموين قال ان القيمه المضافه تتراوح من 6 الى 11 جنيه بس، وهتطبق على سعر مصنعيه الجرام في المشغولات الذهبيه لكن السبايك والجنيهات ما فيش عليها قيمه مضافة.
ودلوقتي قول لنا بقى لو انت شغال بره مصر ممكن تشتري دهب وتنزل بيه؟ وحتى لو موجود برا مصر شايف شايف الاسعار هتزيد وفعلا هتشتري دلوقتي ولا هتستنى شوية؟
