منذ أيام، تمكنت الاجهزة الامنية في مصر، من القبض على شخص معه 4 مليون دولار مزيفين، وبما إن الطلب دلوقتي على الدولار زيادة عن أي وقت آخر، فسهل أتجد أشخاص يزوروا الدولا، لذلك يجب أن تعرف أن تميز بين الدولار الحقيقي والمزور، حتى لا تقع ضحية نصب.
موضوع تزييف الفلوس ده، مش اول مرة نسمع عنه، خصوصا الدولار، وكمان موجود في كل الدول، وفي حوالي 70 مليون دولار مزيفين في الولايات المتحدة، وده حسب كلام وزارة الخزانة الأمريكية
لكن دلوقتي انت لو صادفت وبقى معاك دولارات، هتفرق ازاي بين السليم والمزيف وتحمي نفسك من الشبهات؟
اسهل حاجة تعرف بيها الدولار السليم هو “اللمس”، لان الدولار ملمسه مميز جدا، لان الورقة مصنوعة من خليط كدا بين القطن والكتان، وسُمكها رفيع جدا، لانها بتعدي على جهاز بيقلل من سُمكها.
لكن المزيف في الغالب هتلاقي الورقة مصنوعة من الورق المقوي المصنوع من الخشب، وكمان سُمك الورقة مش هيبقى رفيع زي الاصلية، لان التكلفة هتبقى عالية على المزورين ومش هيعرفوا يعملوا كدا، يعني طبعا هتحس بفرق في الملمس.
غير كمان الصورة اللي موجودة على العملة، هتلاقيها بارزة، ومفيش اي طابعة هتقدر تزور البروز ده وتعمل زيه، حاجة كمان ان طباعة الدولار في الولايات المتحدة، بيستخدموا فيها ألياف حمرة وزرقة صغيرة، لكن المزورين بيحاولوا يعيدوا انتاج الالياف دي بانهم يرسموها على الورقة او يطبعوها
فسهل اوي على اي شخص، انه يلاحظ الفرق، وهيلاحظ في الورقة المزيفة ان الرسمة شكلة واضح بدل ما لازم تكون جزء من الورقة نفسها
والفرق بقى اللي كلنا عارفينه واللي موجود في كل العملات، من سنة 1990، وهو الشريط البلاستيك اللي موجود بالطول على الورقة، وبيظهر بسهولة جدا خصوصا لو شوفت العملة في نور واضح، والشريط ده من الحاجات اللي صعب تتقلد
وطبعا العلامة المائية اللي مفيش اي عملة تقدر تستغنى عنها، اللي بتبقى على صورة الشخص اللي على العملة، وبتتحط على يمين الورقة، وتقدر تشوفها من جانبين الصورة، حاجة كدا شبه صورة الموناليزا.
وخلاص بقى لو انت مش عارف تطلع كل الفروق دي، كل اللي عليك تاخد الورقة تحطها تحت الماية، ومتخافش مش هتبوش ولا تتقطع، لان الدولار انتاجه متكلف فعلا، وألوان الورقة مبتتأثرش بحاجة، وكمان الحبر اللي بيستخدم في الطباعة بيبقى مندمج بالورقة.
ف لو حطيت الورقة تحت الماية ولقيت الالوان بتطلع معاك، ولا بقت بهتانة، يبقى الله يعوض عليك، والاهم من كل ده ان اي ورقة بـ100 دولار بيبقى عليها رقم تسلسلي، عليه كل بيانات تسجيلها.
وكمان مفيش مزور حتى لو كان محترف هيقدر يقلد كل الفروق دي، ممكن يزور واحد ولا اتنين لكن مش هيعرف يزورهم كلهم، ومش هيقدر على تكاليف الامكانيات اللي هيحتاجها في الطباعة.
عشان كدا الدولار من اكتر العملات اللي مأمنة نفسها وصعب اوي تتزور، ولو حصل هيبقى سهل اوي تتقفش، فمتخليش حد يضحك عليك ويوقعك في تهمة انت مش قدها، وكمان ميكونش ليك ذنب فيها، ف لو معاك اي دولارات دلوقتي قوم اطمن انها سليمة.
