يسأل العديد عن الاستثمار الافضل الان ، وأصبح البعض في حيرة بين زيادة سعر الدولار الرسمي في البنوك وطرح شهادات ال25% لفترة محدودة، وفي التقرير التالي سوف نساعدك على اختيار الافضل دون أن تعرض نفسك للخسارة فتابعنا:
خلينا في البداية نوضح ان البنك الأهلي وبنك مصر طرحوا شهادات ال25% لسببين:
الأول هو مواجهة التضخم، لأن العائد المرتفع هيشجع الناس تشتري الشهادة الجديدة بدل صرفها في شراء سلع استهلاكية وبكده يسحب السيولة من السوق ويقل الطلب ويقل معدل التضخم…
اما السبب التاني فهو وقف ظاهرة الدولرة، يعني بدل ما الناس تحول فلوسها لدولارات وتشيلها تحت البلاطة، دلوقتي ممكن تفكها للجنيه المصري عشان تستفيد بالعائد المرتفع على الشهادة الجديدة 25%
وهنا بقى السؤال المهم: لو معاك دولارات تحولها للجنيه المصري وتشتري الشهادة الجديدة ؟ وهل ده الخيار الأفضل ولا لا؟
الدكتور هاني جنينة المحلل الاقتصادي، والمحاضر في الجامعة الأمريكية شايف إن التنويع هو الحل الأفضل.
طيب ازاي؟
من وجهة نظره كل مدخر أو مستثمر لازم يوزع فلوسه مابين 30% في الذهب أو الدولار و70% في الأسهم والشهادات.
في نفس الوقت، هاني أبو الفتوح الخبير الاقتصادي، شايف إن قرار الاستثمار بيختلف حسب ظروف كل واحد ، لكن حسب الظروف الحالية الشهادات ذات العائد السنوي 25% هي الأفضل.
وعموما لو انت عاوز تحتفظ بالدولار هيبقى عندك اختيارين:
الاختيار الأول انك تستفيد من الدولار الموجود معاك بدل ركنته جنبك، وده هيحصل لو اشتريت شهادات الادخار الدولارية بفايدة 5% تقريبا، والموجودة في البنك الأهلي وبنك مصر وبنك القاهرة.
أما لو المبلغ اللي معاك كبير نسببيا فأنت كده عندك اختيار تاني وهو تحويل جزء من الدولارات دي لجنيه مصري وتشتري بيها شهادة ال25%
وعشان تبقى عارف المكسب على اي شهادة ادخار عموما بيتحسب عن طريق الفرق بين العائد المعلن عليها وبين معدل التضخم.
يعني لو التضخم 20% مثلا، يبقى الفايدة الحقيقية على الشهادة الجديدة 5%، عشان كده وانت بتشتري اي شهادة ضروري تبقى عامل حسابك معدل التضخم هيبقى في حدود كام طول فترة ربط الشهادة وكمان عند انتهاء مدتها.
أما دلوقتي بقى فخلينا نشوف لو حطيت الدولار في البنك هتكسب عائد قد إيه وخلينا نبدأ بالشهادة أجل 3 سنوات.
العائد عليها 5.30% لدورية صرف العائد السنوية، و5.25% لدورية صرف العائد نصف السنوية، و5.20% لدورية صرف العائد ربع السنوية، و5.15% لدورية صرف العائد الشهرية.
وبيبدأ شراء الشهادة الثلاثية في البنك الأهلي من 500 دولار كحد أدنى، وفي بنكي مصر والقاهرة من 100 دولار.
عندك كمان الشهادة ذات أجل 5 سنوات : ودي سعر الفائدة عليها 5.15% للعائد السنوي، و5.10% لدورية صرف العائد نصف السنوية، و5.05% لدورية صرف العائد ربع السنوية، و5% لدورية صرف العائد الشهرية.
وبيبدأ شراء الشهادة الخماسية في البنك الأهلي من 500 دولار كحد أدنى، وفي بنكي مصر والقاهرة من 100 دولار.
وفي النهاية القرار ليك وانت اللي تقدر تحدد إيه المناسب لظروفك، عشان كده يهمنا نعرف رأيك لو خيروك بين الشهادة الحديدة بفايدة 25% وبين شهادة دولارية بفايدة 5% هتختار إيه؟
