قد تتفاجئ أنه عند السفر لا يمكنك حمل أي كمية من الأموال معك وخاصة العملات الأجنبية والذهب، حيث تحدد الدولة كميات معينة يسمح بالسفر بها، قبل أن تسافر اعرف ما الكمية المسموح بها، ومتى ترحب الدولة بك بدخول أي أموال معك أو ذهب؟ هذا ما سنتعرف عليه من خلال التقرير التالي:
بقينا في زمن المفاجأت، وعندنا استعداد نغير اي نظام، في سبيل بس اننا نعدي من الازمة اللي احنا فيها، لو كنت سألت من شهور ايه المبلغ المحدود ليك لوهتسافر بدولارات، كنت هتلاقي فعلا حد أقصى للفلوس.
لكن دلوقتي مفيش حد اقصى ، ده بالعكس أي حد جاي بدولارات يا مرحب بيه، يا ألف اهلا وسهلا، لان مصر دلوقتي بتعدي بأزمة نقص الدولار، وحال الدولة والاستيراد واقف بسبب المشكلة دي، فهنرحب بأي حد جاي بدولارات.
فعشان كدا الدكتور ماجد موسى مدير عام جمارك مطار القاهرة، قال ان اي شخص معاه دولارات او اي عملة تانية،مسموحله يدخل بيها المطار ومفيش كمية معينة.
لكن برضو البلد مش سايبة كدا، لان شرط لو هتدخل بمبلغ 10 الف دولار او اكتر، او نفس المبلغ بعملة تانية، لازم تبلغ مأمور الجمارك الاول، وظابط الجوازات بيسجلها، عشان لومعملتش كدا هتدخل تحت بند التهريب، وده سواء كنت مصري او اجنبي
وفي المطار هيعملوا اقرار عملة من نسختين، النسخة الاولى بتروح لوحدة غسل الاموال، عشان يتأكدوا ان الموضوع طبيعي ومفيش اي شُبهة
والنسخة التانية بتكون مع الشخص المسافر، ولازم تفضل معاه عشان تحميه من أي موقف مثلا زي انه هيخرج من مصر تاني
ونفس الكلام برضو لو جاي ومعاك دهب، الدولة مش هتمانع نهائي انك تيجي بكميات كبيرة، لان ده اصلا مفيد للاقتصاد المصري
لكن المهم انه ميبقاش بيتعارض مع القانون عشان متوقعش نفسك في الغلط، وزيهم زي الدولار برضو لازم تبلغ بالكمية اللي معاك
بس الدهب بيبقى له اسلوب تاني في التعامل، الاول انك بتحجزه بايصال، وبتروح للدمغة والموازين، اللي هي جهة تحديد القيمة، وبعد ما بيتحدد قيمتها
الجمارك والمطار بيوصلهم تقرير بالمبلغ، وبعدها بيحسبوا الجمارك 10% ومعاها %14 ضريبة قيمة مضافة.
وبرضو الستات او البنات اللي بتحب تلبس دهب، مفيش اي مشكلة بالنسبالهم، الا لو لحظوا ان الكمية اللي لبساها او اللي معاها مبالغ فيها عن انهم يكونوا استخدام شخصي.
وكدا كدا الجمارك مش بتستقصد مثلا حد سواء مصري او اجنبي، ومش بتصادر اي حاجة، لكن المطار بيتحفظ عليها لغاية ما الجهات المسئولة تحقق في الموضوع، تدفع قيمة التصالح.
وكمان بيحترموا اي شخص معندوش اي نية انه يخبي عليهم كمية الفلوس او الدهب اللي معاه، خصوصا ان القانون الجديد بيسمح للراكب بـ10 الاف جنيه بس للهدايا والحاجات الجديدة، واكتر من كدا الجمارك بتشك في الحاجة اللي معاك
عشان كدا قبل ما تيجي مصر ومعاك أي حاجة تخليهم يشكوا فيك، وانت مش على بالك اصلا، بص على قوانين الجمارك والمطار الاول واعرف اللي ليك واللي عليك.
