بكم تشتري كيلو الأرز؟ وهل الاسعار زادت أم أنها مستقرة؟ كلام كثير منتشر حول سعر الأرز والبعض يقول أنه ارتفع والبعض الآخر يقول أن السعر ثابت ومستقر فما حقيقة الأمر وهل الكيلو ارتفع 4 جنيهات؟
واهم سؤال بقى: نشتري ازاي بارخص سعر في وسط كل التضارب اللي بيحصل في السوق؟ لأكتر من مرة أكدت الحكومة إن كل السلع متوفرة في السوق، واللي عاوز يشتري حاجة هيلاقيها فبلاش نتزاحم على الفاضي.
ولو هنتكلم عن الرز تحديدا، فالاحتياطي الاستراتيجي لمصر معدي ال3 شهور، كمان وزير التموين أكد إن الحكومة شغالة بايديها واسنانها عشان تظبط الأسعار ودلوقتي سعر الكيلو مابين 22 و24 جنيه، والنوع الفاخر ب26 جنيه
بس حازم المنوفي رئيس شعبة مواد البقالة بالغرفة التجارية في الإسكندرية قال إن أسعار الرز زادت عشان يتراوح سعر الكيلو من 26 الى 30 جنيه، يعني بنتكلم في 4 جنيه زيادة.
طيب ليه الزيادة؟
في الحقيقة الإجابة على السؤال ده عليها اختلاف، يعني المنوفي قال إن اسعار السلع الاستراتيجيه زادت بسبب ارتفاع تكاليف الإنتاج.
وفعلا نقيب الفلاحين أكد ارتفاع أسعار طن الرز، بس برضه شايف إن زيادة أسعار البيع للمستهلك سببها الرئيسي تحكم التجار في الكميات المعروضة داخل المحلات، وطبعا كل ما الكمية قلت كل ما الاسعار زادت.
وعلى الناحية التانية، مجدي الوليلي، رئيس شعبة الرز ، أكد إن مفيش أي أزمة ، واحنا عندنا مخزون يكفينا لغاية بداية الموسم الجاي في نص شهر أغسطس.
وحسب كلامه، أصحاب المضارب وشركات التعبئة دلوقتي بيتنازلوا عن جزء من هامش أرباحهم وشغالين بسعر التكلفة، عشان يوردوا الكميات المطلوبة للسلاسل التجارية.
ومش بس كده، ده طمن الناس بإن الأسعار مش هتزيد في شهر رمضان، وده رغم زيادة الاستهلاك بسبب إقامة موائد الرحمن وتوزيع شنط الخير والعزومات اللي رايحة جاية في كل بيت مصري طول الشهر الكريم.
وهنا أي حد فينا هيحتار وهيسأل: أعمل إيه عشان أشتري بأرخص سعر؟
انت ممكن تشتري كل السلع الاستراتيجية: رز بقى زيت. سكر، دقيق، من معارض اهلا رمضان المنتشرة في محافظات الجمهوريه و بتخفيضات 30% مقارنة بأسعار السوق العادية.
يعني مثلا في المعارض، سعر كيلو السكر والأرز 14.5 جنيه، والدقيق ب18 جنيه، والمكرونة والشعرية نص كيلو ب10 جنيه، والعدس نص كيلو ب21 جنيه.
في نفس الوقت، وزارة التموين اتعاقدت على استيراد شحنه رز من الهند ولسه في شحنات جايه في الطريق، عشان تنزل السوق في شهر رمضان ويحصل توازن في السعر.
ودلوقتي بقى قولوللنا الاسعار في منطقتكم وصلت لكام، ولو انتم من اصحاب الاراضي قولوا لنا سعر طن الرز بيزيد فعلا ولا ثابت؟ وهل شايفين الاسعار الحاليه مناسبه للتكلفة اللي اتحملتوها في الزراعة؟
