لأول مرة من 5 سنين تقريبا أسعار الفائدة على أذون الخزانة تسجل أعلى عائد لها، وذلك بعد أيام من طرح شهادات الـ 25% ، فإلى أين وصلت الفائدة على أذون الخزظانة وما الفرق بينها وبين شهادات الاستثمار؟ هذا ما سنتعرف عليه من خلال التالي:
أذون الخزانة، واحدة من أدوات الدين الحكومية، وعن طريقها وزارة المالية بتستلف من البنوك لتلبية احتياجاتها مقابل فايدة بتدفعها الحكومة للبنوك دي
وتعتبر اذون الخزانة استثمار قصير الأجل، لأن مدتها بتبدأ من 3 شهور، وممكن تكون 6 شهور ، أو 9 شهور، ولغاية سنة كحد أقصى.
كلنا متفقين ان طرح شهاددة بفايدة 25% خطوة بتحصل لأول مرة، بس العائد الكبير ده خلي البعض يتوقع ان ده هيزود العائد على أذون الخزانة كمان.وخصوصا ان البنك المركزي رفع الفايدة بنسبة 3% مرة في اجتماعه بتاريخ 22 ديسمبر الماضي.
وفعلا ده اللي حصل، وفي آخر عطاء للبنك المركزي، أسعار الفائدة على أذون الخزانة زادت بنسبة من 0.5% إلى نحو 2%.
ودلوقتي العائد على أذون خزانة لمدة سنة مسجل 21.5% تقريبا، أما أذون الخزانة لمدة 6 شهور فأعلى سعر فايدة عليها وصل إلى 21%. وهنا ييجي السؤال المهم ايه الفرق بينها وبين شهادة الادخار الجديدة؟
اولا العائد في أذون الخزانة بينزل مقدم في حسابك بالبنك يعني بعد متشتريها علطول، إنما العائد في شهادات الادخار بفايدة 25% سنويا هيتزلك على اخر السنة الجاية.
ومش بس كده، انت تقدر تبيع أذون الخزانة بعد شرائها علطول ومن غير اي قيود، لكن في شهادة الادخار الجديدة واي شهادة ادخار عموما انت لازم تستنى 6 شهور من تاريخ الشراء عشان تقدر تكسرها وتاخد فلوسك.
بس خلي بالك في ضريبة بتدفعها على أذون خزانة بنسبة 20%. تقريبا من الأرباح، وقبل كده كانت الميزة الأهم في أذون الخزانة ان مدتها سنة بالكتير مقارنة بشهادات الادخار العادية اللي بتربطك بسعر فايدة معين لمدة 3 سنين على الاقل.
لكن دلوقتي الشهادة الجديدة بنسبة 25% مدتها سنة واحدة بس وطبعا بتقدم عائد أعلى عشان كده هتكون الاختبار الأفضل للاستثمار.إنما بقى لو عاوز استثمار مدته أقل من سنة فكده ممكن تفكر في أذون الخزانة،
ولازم تعرف ان العائد على أذون الخزانة بيختلف من عطاء للتاني، والحد الأدنى للشراء هو25 ألف جنيه ومضاعفاتها ، يعني 25 الف ، 50 ألف ، و75 ألف وهكذا.
ولازم تحدد من البداية انت عاوز تشتري أذون بأي اجل، لأنك لو هتشتري أذون اجل 3 و 9 شهور هتروح البنك بتاعك يوم الأحد قبل الساعة 10/ اما لو هتشتري أذون 6 شهور ، وسنة هتروح البنك يوم الخميس قبل الساعة 10.
وفي الحالتين هتقدم طلب لشراء أذون الخزانة بتكتب فيها مدة الإذن اللي انت عاوزه، ومتوسط العائد اللي هتاخده، وتقدر تعرف العائد على الطرح من خلال موقع وزارة المالية.
