كلنا فرحنا بانخفاض أسعار الفراخ الأيام الماضية، لكنها رجعت ارتفعت في الساعات الأخيرة.. فياترى ما معنى ذلك؟وهل هذا ارتفاع مؤقت أم أن الاسعار ستستمر في الارتفاع؟ تابعونا في التقرير التالي لمعرفة التفاصيل:
من كان يوم أسعار أفراح نزلت 10 جنيه تقريبا في الكيلو، كمان البانيه بقى ب140 جنيع بعد وصوله إلى 200 جنيه واكتر في عز الازمة.
بس للاسف الحلو ميكملش، لأن أسعار الفراخ في الساعات الأخيرة رجعت تزيد تاني، ودلوقتي سعر الكيلو بيبدأ من 78 جنيه حسب بوابة الاسعار التابعة لمجلس الوزرا..
وعشان نعرف السوق رايح على فين، لازم نبص الاول على أسعار الاعلاف اللي بتمثل 70% من تكلفة انتاج الدواجن.
والوضع دلوقتي كالتالي:
الحكومة مستمرة في الافراح الجمركي عن الأعلاف، ومن 16 أكتوبر2022 حتى 23مارس 2023, تم الإفراج عن 3 مليون طن تقريبا.
لكن كلام التجار والمنتحين عكس بعضه:فمثلا، ثروت الزيني، نائب رئيس اتحاد منتجي الدواجن، شايف إن الكميات دي قليلة.
وحسب كلامه: ندرة الإفراجات عن مكونات الأعلاف زي الصويا والذرة، اتسبب في خلق سوق سودة، طن العلف فيها بيتباع بأكتر من 25 ألف جنيه، رغم ان السعر العادل إن السعر العادل للطن ميعديش 14 ألف جنيه
انت متخيل الفرق بين الرقمين، احنا بنتكلم في زيادة حوالي 60% بالسوق السودة!
وياريتها جت على قد كده، ده المنتجين راضيين بالأسعار بس الأسعار مش راضية بيهم، لأنهم مش لاقيين درة يشتروه حتى لو بسعر مرتفع..
وبناء عليه، الانخفاض اللي حصل في أسعار منتجات الدواجن الأيام الأخيرة مش سببه انخفاض تكلفة الإنتاج، لا ابدا ده سببه آليات العرض والطلب.
يعني عندك مثلا كرتونة البيض، بتتباع بـ85 جنيه، رغم ان تكلفتها 120 جنيه.وعشان انخفاض الأسعار يبقى دايم وحقيقي، الزيني طالب بزيادة الإفراج عن شحنات الذرة والصويا الموجودة المواني، وبكده يزيد المعروض في السوق المحلي وتتحل الأزمة الاعلاف.
وفي نفس الوقت، أكد احتياجنا لعودة المربيين اللي خرجوا من السوق عشان نزود الإنتاج سواء من بيض المائدة أو دواجن التسمين، ولازم ناخد بالنا لان الوضع الحالي بيهدد خروج باقي المربين من السوق.
وطبعا انت لما تسمع الكلام ده، هتحس ان الدنيا ضلمت، بس سامح السيد، رئيس شعبة الدواجن في الجيزة ليه كلام تاني خالص.
ده أكد وفرة مدخلات الإنتاج في السوق لدرجة انها تكفى لمدة 6 شهور جايين، وكمان توقع تسجيل انخفاض ملحوظ في أسعار الفراخ بعد شهر رمضان.
والسبب هو إدخال قطعان تسمين جديدة بكميات كبيرة، وبالتالي هيزيد العرض في السوق، عشان نوصل للسعر العادل للكيلو ما بين 63 الى 65 جنيه.
وفي النهاية، انتوا اللي على الارض واكتر حد يلاحظ السوق رايح على فين.عشان كده شاركونا وقوللنا بتشتروا كيلو الفراخ بكام دلوقتي، وهل سعره زاد ولا قل في آخر مرة اشتريتوا؟
