إن كنت تتخيل أن شهادة الإدخار وسيلة فقط للحفاظ على أموالك وللإدخار، فأنت مخطئ تماما، وذلك لأن الشهادة يمكن أن تساعدك في الحصول على شقة العمر، لمعرفة التفاصيل تابعنا من خلال التقرير التالي:
ايوه بظبط كده، الشهادة هتديك فرصة إنك تشتري شقة أحلامك، وده لأن في نظام جديد أعلن عنه بنك التعمير والإسكان واللي هيخليك تاخد شقة تابعة للإسكان الإجتماعي وتقسطها بشهادة الادخار.
بنك الإسكان والتعمير عامل مفاجأة للمصريين وهي عبارة عن نظام جديد للتمويل العقاري بيستهدف كل اللي عايزين يشتروا وحدات سكنية تابعة للإسكان الإجتماعي، حسب موقع مصرواي.
وده لأن النظام ده بيسهل ليهم شرا الشقة وبيوفر ليهم نظام تقسيط الوحدة بدل ما يدفعوا تمنها كاش، واللي بيكون من خلال برنامج التمويل العقاري وربط شهادة في البنك.
طيب إزاي الكلام ده ؟
بص ياسيدي حسب كلام البنك فـ انت لو عايز تشتري شقة في الإسكان الإجتماعي بدل ما تدفع تمنها كله كاش هتقدر بنظام التمويل العقاري الجديد للبنك إنك تقسط تمنها بشرط انك تكون شاري شهادة من البنك وتربطها ببرنامج التمويل العقاري اللي هتقدم عليها
وده هيخليك تستلم شقة فورا من مشروعات دار مصر وسكن مصر وكمان جنة.أما بقى لو بتسأل عن تفاصيل نظام التمويل العقاري الجديد من بنك التعمير والإسكان.
فالنظام ده فرصة كويسة أوي لأي شاب بيدور على شقة وده لأن البنك هيسمحلك بالشهادة دي إنك تقدم على نظام التمويل العقاري.
وكمان عن طريق الشهادة اللي هتشتريها من بنك التعمير والإسكان هتستفيد بالعائد بتاعها، وفوق كل ده هتستلم شقتك ودي وحدات متخصصة وجاهزة على السكن علطول.
والبرنامج ده بيكون بحد أقصى تمويل 90% من قيمة الشهادات وحد أقصى لمدة التمويل 15 سنة .يعني البنك هيقسطلك باقي تمن الشقة على 15 سنة بدل ما تدفع المبلغ كله كاش والله يا بلاش فعلا!
وحسب كراسة الشروط فـ انت هتكمل مقدمة جدية الحجز واللي بتكون لـ20% من تمن الوحدة الإجمالي، ومقدمات الحجز بتكون ما بين 60 ألف لـ 100 ألف جنيه.
أما بقا معاد استكمال المقدم فـ ده متاح من يوم 11 إبريل اللي فات ولحد يوم 18 مايو الجاري، وده لأنك لازم تكمل قيمة مقدمة الحجز الخاصة بكل وحدة وده بيكون مختلف حسب كل مشروع.
مش بس كده خلى بالك إنت كمان لازم تدفع 10% من تمن الوحدة وقت الاستلام، لكن المفاجأة بقا إنك هتقدر تسدد 70% وده باقي تمن الوحدة على أقساط، وخد بالك، هتدفع أول قسط بعد 3 شهور من تاريخ استلامك للوحدة
لكن بشرط واحد إنك هتقدم شيكات آجلة بالمبلغ ده قبل الاستلام، ولو بتسأل عن أحدث شهادة بيقدمها بنك التعمير والاسكان ؟
فـ البنك كان أعلن الفترة اللي فاتت عن شهادة الادخار برايم، ودي شهادة بتقدم عائد مرتفع ثابت طول مدة الشهادة وبدوريات صرف مختلفة حسب اختيارك سواء شهري أو ربع سنوي أو نص سنوي أو سنوي
والشهادة دي بتقدم عليها بالجنية ومدتها 3 سنين بس الحد الأدنى لشراء الشهادة هو 1000 جنيه مصري، والعائد بيكون 17.25% شهري، و17.5% ربع سنوي، و17.75% نصف سنوي، و18% سنوي.
دلوقتي قولنا رأيك في برنامج التمويل العقاري الجديد من بنك الإسكان والتعمير ؟
