يمكنك تحويل الأموال لأي شخص بالمجان ولمدة عام، هذا الكلام حقيقي، وأيضا لا يوجد حد أقصى لإيداع الأموال فى فروع البنوك، فكيف ذلك؟ اليوم أصدر مجلس إدارة البنك المركزي المصري بعض القرارات لتعزيز التحول لمجتمع أقل اعتمادًا على أوراق النقد، والتي حقق فيها مطالب ناس كتير طب إزاي القرارت دي هتفيد المواطنين وهل فعلا هيكون التحويلات مجاني تعالوا نعرف في التقرير التالي:
في البداية لازم تعرف إن الدولة بتحاول تسهل على المواطنين كل الخدمات اللي بتقدمها، وعشان كدا قرر البنك المركزي النهاردة مد فترة إعفاء العملاء من رسوم التحويل بين البنوك فى مصر، وده معناه إن خدمة التحويلات هتكون مجانيه واللي بيتم استخدمها أونلاين يعنى من خلال مواقع وتطبيقات البنوك وبتليفونك هتقدر تخلص كل المعاملات دي في دقايق.
يعني كدا مفيش أي رسوم ؟
أيوة مفيش رسوم خالص لأن البنك المركزي قراره بيضمن إنه يعفي العملاء من كل المصروفات والعمولات الخاصة بخدمات التحويلات البنكية للأفراد واللي بتتم من خلال القنوات الالكترونية بالجنيه المصري.
طب القرار لحد امتي؟
المفروض إن القرار هيطبق على كل التحويلات وهيكون مجانًا لحد 31 ديسمبر 2023 يعني لمدة سنة كاملة، بشرط إن التحويلات دي تكون بتتم من بنك لبنك عن طريق الإنترنت والموبيل البنكى وتطبيقات المدفوعات.
بس لازم تعرف شوية حاجات أولهم إن تحويل الفلوس من فرع البنك نفسه لبنك تاني عليه رسوم، لكن مفيش حد أقصى لإيداع الأموال فى فروع البنوك .
طيب لو انت عايز تحول فلوس لحد ومن بنك لبنك ومش عاوز تدفع رسوم، في الحالة دي اعمل التحويل البنكى من غير ما تسحب كاش خالص .
طب وبالنسبة للإيداع ف الماكينات؟
بص ياسيدي الحد الأقصى لإيداع الفلوس فى ماكينات الصراف الآلى ATM هو 20 ألف جنيه فى اليوم ، وده طبعًا مبلغ كويس جدا يضمنلك إنهاء كافة معاملاتك في يوم واحد، انت كمان هتقدر تسحب فلوس من فرع البنك لحد 150 ألف جنيه فى اليوم.
وخلي بالك لو هتسحب فلوس من البنك اللى أصدر بطاقة المرتب بتاعتك يبقى مش هتدفع رسوم خالص.
أما بقى في حالة لو هتسحب فلوس من بنك تانى غير اللى أصدر بطاقة راتبك يبقى هتدفع رسوم السحب النقدى من ماكينات ATM بحد أقصى 5 جنيه مع كل مرة تسحب فيها.
لازم كمان تعرف إن الحد الخاص للسحب النقدى للمعاملة الواحدة من ماكينات ATM الخاصة بالبنوك الأخرى هو 4000 جنيه.
والحاجة الجميلة بقا إن في مصر شهدت خدمة التحويل من خلال محفظة الهاتف المحمول ارتفاعا في مؤشراتها بنسب كبيرة وده بعد ما وصل عدد حسابات محافظ الهاتف المحمول لـ 29.5 مليون حساب بنهاية شهر أكتوبر 2022.
وطبعا الارقام دي بتأكد أهمية خدمة التحويلات لكل مستخدمينها واعتمادهم عليها بشكل كبير في معاملاتهم وتحويلاتهم المالية شهريا.
ونصيحة بقا وعشان ميضحكش عليك عود نفسك على استخدام كارت البنك فى دفع المشتريات من المحلات لأنه بيكون أسهل وأكتر أمانًا وكمان معاه مزايا كتيرة.
قولنا بقا هل بتفضل إن تعاملاتك المالية تكون بالفيزا أكتر ولا بتحب تدفع كاش وليه؟
