من بعد سنة 2020 والدولة بدأت تتجه للتحول الرقمي وهذا لأنها بدأت تحول معظم خدماتها الي خدمات الكترونية تقدر تعملها من وانت في بيتك لكن ليس هذا هو الجديد.
الجديد بقى أن حتى الفلوس اللي بنستخدمها دي كمان هتتحول لعملات رقمية مش هتقدر تلمسها بايدك، وده لأن البنك المركزي أصدر قرار بإطلاق الجنيه الرقمي
بس إيه حكاية الجنيه الرقمي ده؟ وهل فعلا هيتم تحويل النقود لعملات رقمية ؟ وايه هو الفرق بين العملات الرقمية والعملات المشفرة؟ وليه البنك المركزي أصدر القرار ده في التوقيت الحالي؟
عمرك سمعت عن العملات الرقمية قبل كده، طيب تخيل كده لو طلع قرار في يوم من الايام أنه سيتم اعتماد العملات الرقمية بدل من الورقية
بس وليه تتخيل دي حقيقة هتحصل الايام الجاية، وده لأن البنك المركزي أعلن من ايام عن إصدار الجنيه الرقمي، بس إيه الحكاية؟
شوف يا سيدي، حسب موقع صدى البلد، البنك المركزي المصري كشف عن تشكيل لجان عمل داخلية وخارجية (من جميع الوزارات) وتحت رئاسته، بهدف دراسة إطلاق عملة رقمية للبنك المركزي
مش بس كده. ده قال كمان أنه بيحصل تقدم في دراسة المشروع، وده لأنه بيتم التعاون مع مؤسسات دولية كتير بخصوص الموضوع ده
مش بس كده البنك كمان بيعتزم إطلاق مشروع «اعرف عميلك» وده الهدف منه التعرف على هوية العملا إلكترونيا واللي بتهدف لتطوير القطاع المصرفي من خلال توفير وسيلة إلكترونية تخليه يعمل هوية مالية إلكترونية تسمح له بالتحقق من بيانات العملا إلكترونيا تخليهم يفتحوا حساب بنكي بشكل إلكتروني من غير ما يروحوا للفرع
كل ده بيجي تكملة لخطوات البنك اللي كان خدها قبل كده ضد انتشار وتداول العملات المشفرة، عشان كده بقى يدرس تطبيق العملات الرقمية للبنوك المركزية لانها أمان اكتر وبديلة عن الأنواع التانية من العملات المشفرة ومخاطرها.
وحسب مصدر مصرفي لصدى البلد: البنك المركزي بيدرس حاليا إطلاق الجنيه الرقمي، جنب بعض المشروعات اللي شغال عليها المركزي المصري حاليا، زي وضع القواعد والضوابط الخاصة بإنشاء البنوك الرقمية في مصر
المصدر قال كمان أن البنك المركزي المصري بيدرس وضع قواعد إطلاق العملات الرقمية، عشان تكون بديلة عن العملات المشفرة، اللي مخاطرها مرتفعة
الفرق بين العملات الرقمية والعملات المشفرة
شوف يا سيدي، حسب موقع روسيا اليوم فالعملات الرقمية دي هي بالظبط زي العملات التقليدية اللي هما الدولار واليورو والجنيه والين، ودي بقى بتصدرها البنوك المركزية وبتم إدارتها وضبط قيمتها من الحكومات، ومن بين الدول اللي اعتمدت العملات الرقمية روسيا.
أما بقى العملات المشفرة فهي عملات مصممة بتقنية معينة بتعتمد على التشفير والتوزيع اللامركزي والتحقق الذاتي، يعني نقدر تقول عليها عملات مجهولة المصدر مش بيتم إدارتها أو ضبط قيمتها من خلال الحكومات أو البنوك المركزية، عشان كده بيتم استخدامها بكل سهولة في أنشطة مش قانونية وأشهر العملات دي هي البيتكوين
انت بقى شايف إن إطلاق جنيه رقمي جديد هبسهل على الناس حياتها؟ وهل تتوقع أن الاعلان عنه هيكون قريب وخصوصا اننا بنجهز لانشاء بنوك رقمية في مصر؟
