البنك المركزي يكشف موعد طرح الـ20 جنيه البلاستيك

بعد شهور من طرح عملة ال 10 جنيه البلاستيك و التي أثارت الجدل أول ما نزلت السوق خلال عيد الأضحى الماضي بسبب تصميمها وشكلها.انتشرت أنباء عن طرح عملة جديدة من العملات البلاستيك فئة ال20 جنيه لكن السؤال هنا متى يتم طرحها ؟

خلال الشهور الأخيرة انتشرت أنباء بطرح عملة بلاستيكية فئة العشرين الجنيه وتم تدوال شكل العملة على الفيسبوك، وده بعد ما تم الانتهاء من طباعة الـ 10 جنيه البلاستيك وتم توزيعها خلال عيد الأضحى اللي فات واللي أثارت الجدل عند كتير من الناس وخلاهم يسألو العشرين جنيه البلاستيك هتنزل السوق أمتى؟

بحسب المهندس خالد فاروق وكيل محافظ البنك المركزي لدار طباعة النقد واللي قال في تصريحاته لموقع الطريق أنه خلاص تم الإنتهاء من طباعة الكميات المطلوبة من العملة البلاستيكية فئة ال20 جنيه، وده بإستخدام أحدث خطوط إنتاج البنكنوت المطبقة في العالم.

ولما اتسأل عن حجم الكمية اللي طبعوها ؟رد وقال أن الكمية اللي تم طباعتها على قد احتياجات السوق لكن رفض يكشف عن حجم الكمية اللي طبعوها بالتفصيل

طيب يا ترا هتنزل السوق أمتى؟ بحسب خالد فاروق قال أن ال 20 جنيه الجديدة هيتم إتاحتها للمواطنين كفكة في البنوك خلال عيد الأضحى

لكن إيه سبب إتجاه البنك المركزي لطباعة الفلوس على هيئة عملات بلاستيك بدل الورق؟هنا خالد فاروق قال أن الفلوس البلاستيك بتتميز بحاجات كتير أوي.منها المرونة و القوة والسمك الأقل وطول العمر الإفتراضي اللي بيوصل ل 3 أضعاف عمر الفلوس من المصنوعة من الورق وده بالإضافة إنها مقاومة للمياه وقال كمان أنها عملة صديقة للبيئة وممكن إعادة تصنيعها

وقال أنه لايمكن تزويرها أو تقليدها، كمان مقاومة للتلوث على عكس العملة الورقية وبحسب بانكير، رصيد طباعة فئة ال 20 جنيه عموما في السوق خلال شهر يونيو الماضي وصل ل 9 مليار و 112 مليون جنيه، وده بعد ما انخفض معدل طباعتها خلال شهر يونيو 2021 ل9 مليار و 100 مليون جنيه.

وبحسب كريم العمدة الخبير الإقتصادي لبرنامج الساعة قال إن مصر أنشأت أكبر مطبعة في الشرق الأوسط لطباعة النقود البلاستيكية.

وده هيعمل على توفير التكلفة وده لأن عمرها الإفتراضي أطول من العملات الورقية، وقال كمان البنك المركزي بيطبع 6 فئات من العملات فئة 5 و10 و20 و 50 و 100 و 200 جنيه.

لكن حصة ال 20 جنيه البلاستيك مش هتتجاوز 1% بس من إجمالي الفلوس اللي موجودة في السوق، وبحسب كريم عمدة ورقة ال 200 جنيه هي أكبر فئة موجودة في السوق واللي بتمثل 66% من إجمالي العملات المتداولة، وبعدها يجي ورقة ال 100 جنيه اللي بتمثل 27 %.

وبحسب موقع تحيا مصر، شركة ” دي لا رو” أكبر شركة توريد معدات طباعة الأوراق النقدية المسئولة عن طباعة ال10 جنيه البلاستيك، واللي قالت في وقت سابق أن 10الجنيه البلاستيك ده بداية التعاون مع الحكومة المصرية، وانطلاق لمزيد من العملات البلاستيكية في مصر.

ودلوقتي قولنا إيه رأيك في العملات البلاستيكية؟