أصبحوا يبيعونه بالدولار وبالسعر المعروض في السوق السوداء، هذا ما قاله رئيس شعبة مواد البناء خلال الساعات الأخيرة بخصوص اسعار الحديد، ليس هذا فقط فهو كشف عن أسباب أخرى وراء ارتفاعه وأوضح السعر الحقيقي له.
فياترى إيه سبب ارتفاع أسعار الحديد؟ وازاي التجار بيبعوه بالدولار؟ وايه السعر الحقيقي للحديد؟
لسه خناقة الحديد شغالة بين التاجر والمصانع والاسعار عمال تزيد كل يوم عن اليوم اللي قبله، بس اللي بيدفع التمن هو المستهلك وعموما دي مش حاجة جديدة وموجودة من شهور
لكن الجديد بقى هي المفاجأة اللي قالها رئيس شعبة مواد البناء في الساعات الاخيرة، بس ياترى هو قال ايه؟
شوف ياسيدي، حسب تصريحات احمد الزيني رئيس شعبة مواد البناء باتحاد الغرف التجارية في برنامج المصري افندي، إن سوق الحديد بيشهد حالة من عدم الاستقرار وارتفاع الأسعار على مدار الأسبوعين اللي فاتوا
والجديد بقى أن الوكلاء بيتهموا بعض مصانع الحديد بتوريد الحديد بالدولار في مقابل إصدار فواتير بالعملة المحلية
بس المشكلة مش في كده المشكلة الأساسية أنهم بيبعوا الحديد بسعر الدولار في السوق السودا وده بقى هو السبب الرئيسي في ارتفاع أسعار الحديد، وقال إن ده نتيجة الضغط على طلب الدولار بالسوق الموازية لشرا الحديد من الشركات
وقال كمان الأسعار الرسمية المعلنة من الشركات بتتراوح بين 32 ل 33 ألف، وان الناس اضطرت تستسلم للأمر الواقع وتشتري الدولار من السوق الموازية وده خلى قيمته ترتفع ل38 جنيه، علشان كدا ارتفعت أسعار الحديد في السوق ثاني
عشان كده طالب بفتح باب الاستيراد وقف قرار وزارة التجارة والصناعة بخصوص إلغاء رسوم الحماية المفروضة على واردات البليت وحديد التسليح، وقال “النهاردا الوكلاء بتلم الدولار من السوق السوداء علشان تورده للشركات وتشتري الحديد، والحل أننا نستورد بيه أحسن ونقلل سعر التكلفة، بدل ما أنا بضغط على الدولار والسعر في زيادة بالسوق السوداء
ده كمان اتكلم عن اسعار الأسمنت وقال إنها ارتفعت أسعار بزيادة جماعية من الشركات بقيمة 150 جنيه وده يجي في الوقت اللي وافق فيه جهاز حماية المنافسة للشركات المصنعة بخفض إنتاجه
وقال إن الشركات بدأت دلوقتي تعطش السوق، ودلوقتي العربية بعد ما كانت بتدخل تحمل في ساعتين بقت بتقعد في المصنع 4 أيام
وحسب تصريحات سابقة للزيني في برنامج المصري الافندي، أن سبب من اسباب ارتفاع أسعار الحديد إن بعض المصانع اتجهت للتصدير عشان كده المعروض في السوق المحلي بقى قليل، وقال كمان أن مصانع الحديد الاستثماري كانت بتبيع بأسعار وصلت ل40 ألف جنيه.
ده قال كمان إن مجرد ما المصانع الكبيرة قامت بضخ كميات في السوق المحلي الأسعار رجعت لطبيعتها وانخفضت بقيمة 7 آلاف جنيه، لدرجة أن فيه ناس حققت مكاسب رهيبة خلال الفترة اللي فاتت
وبالمناسبة ده قال إن المصانع الكبيرة في مصر بتستحوذ على أكتر من 70% من الانتاج اللي سعرها مش بيزيد في أرض المصنع عن 32250 جنيه عشان كده كان من المفترض أن يوصل للمستهلك 33 ألف جنيه للطن
لكن السؤال هنا: هي أسعار الحديد وصلت لكام؟
شوف يا سيدي، حسب موقع مصراوي، فاسعار الحديد انخفضت خلال الساعات الاخيرة وسجلت في ارض المصنع ما بين 35 ألف لحديد عز بانخفاض 1521، و 34 الف لطن الحديد الاستثماري بانخفاض 569 جنيه
ودلوقتي قولنا شايف ايه السبب الرئيسي وراء ارتفاع أسعار الحديد ؟
