4 شهور فقط ولا أمل في أن تستمر أكثر من ذلك؟ جدل بخصوص فترة العمل بمبادرة استيراد السيارات للمصريين المقيمين في الخارج، فهل فعلا الحكومة ستزيد المدة أم لا؟ ولماذا لا تجعل المبادرة مفتوحة؟ هذا ما نتعرف عليه من خلال التالي:
في الأيام الأخيرة طالب البعض بمد فترة العمل بمبادرة إعفاء ة سيارات المصريين في الخارج، لأن من وجهة نظرهم ال4 شهور مش كافيين.
وفي اول رد رسمي من الحكومة، الشحات الغتوري رئيس مصلحة الجمارك المصرية، كشف حقيقة تمديد المبادرة وكمان توقعات الحكومة منها.
وحسب كلامه، اللايحة التنفيذية للقانون، حددت مدة المبادرة ل4 شهور بس، دا غير إن مفيش اي بند من بنود اللايحة اتكلم على جواز التمديد.
وفي الحالة دي، عشان نجدد العمل بالمبادرة بعد انتهاء ال4 شهور، هنبقي محتاجين نعمل قانون من اول وجديد، لكن من وجهة نظره دا مستبعد تماما، لأن المبادرة إجراء استثنائي، ولازم تكون محددة بمدة عشان نضمن الإقبال عليها وكمان نحمي صناعة السيارات المحلية.
كمان كشف عن المبلغ المتوقع لحصيلة المبادرة، واللي احتمال يتراوح من 3 إلى 5 مليارات دولار، وكلمة السر هي حجم إقبال المصريين.
وكان مجلس النواب وافق على مشروع قانون من الحكومة إعفاء سيارات المصريين بالخارج من الضرائب والجمارك، ودلوقتي اللايحة التنفيذية للقانون في انتظار تصديق الرئيس السيسي عليها.
وحسب بنود القانون، من حق أي مصري مقيم في الخارج استيراد سيارة من غير مايدفع اي جمارك أو ضرايب عليها، كل اللي هيعمله انه يدفع مقابل الجمارك والضرايب في شكل وديعة بالعملة الصعبة في حسابات وزارة المالية، وبعد 5 سنين هيسترد فلوسه بس من غير فوايد و بالجنيه المصري حسب أسعار الصرف في البنك المركزي ساعتها.
وعشان المصري المقيم بالخارج يستفيد من المبادرة، في مجموعة شروط لازم يحققها، وأولها يكون معاه إقامة قانونية سارية خارج البلد، والتاني يكون عمره 16 سنة على الاقل.
والشرط التالت ، يكون عنده حساب مفتوح بقاله 3 شهور على الاقل في الدولة المقيم فيها، ويستثني من الشرط دا ، زوج المصري المقيم في الخارج وأولاده
والشرط الرابع ليه علاقة بعمر السيارة، وحسب القانون في اختيارين: الأول إن المصري المقيم في الخارج يكون المالك الأول للسيارة، وساعتها مافيش مشكلة في عمر السيارة
والاختيار التاني، إنه اشتراها من حد تاني وساعتها الحد الأقصى لعمر السيارة 3 سنين من تاريخ سنة الصنع، يعني مسموح بالعربيات موديل 2020, 2021,2022.
وبعد ماتسجل بياناتك وبيانات عربيتك وتدفع قيمة الوديعة، هتاخد موافقة استيرادية كإثبات على السداد وبيانات السيارة، وهتكون صالحة لإتمام إجراءات الاستيراد والافراج عن السيارة المستوردة لمدة عام ميلادي من تاريخ صورها.
انتوا بقي ايه رايكم في شروط المبادرة، وهل بتفكروا تستفيدوا منها؟
