واضح إن اللي فات كوم واللي جاي كوم تاني خالص، وده لأننا بقالنا فترة بنسمع عن بنوك أجنبية بتتوقع انخفاضات جديدة في سعر الجنيه، ودلوقتي بيقولك إنه هيبقى الدولار لـ35 جنيه.
طيب ياترى الكلام ده معناه إيه.، وهل كده الحكومة مضطرة تعوم الجنية؟، وده هيحصل امتى؟ ، خليكوا معايا في الحلقة دي وانتوا تعرفوا الجنيه رايح على فين في 2023 :
بنك كريدي سويس واحد أكبر البنوك السويسرية توقع تراجع سعر الجنيه الفترة الجاية وقال إن سعر الدولار هيرتفع في المقابل ويوصل لـ35 جنيه.
الغريبة بقى إن توقعات بنك كريدي سويس جت بعد أيام قليلة من التوقعات اللي نشرها بنك سوسيتيه جنرال الفرنسي واللي قال برده إن الدولار سعره هيرتفع لـ34 جنيه خلال الفترة اللي جايه بنهاية شهر مارس.
وقال كمان إنه خلال الفترة اللي جاية هيوصل سعر الدولار ما بين 30 لـ 35 جنيه تقريبًا، يعني نفس التوقعات اللي قالها بنك كريدي سويس السويسري.
كمان توقع بنك«إتش إس بي سي» أنه يوصل سعر الدولار مقابل الجنيه على المدي القصير من 30 لـ 35 جنيه.
ومن ساعة صدور التقارير دث والدنيا اتقلبت والكل بيتكلم عنها، هل فعلا البنوك العالمية دي عندها حق ولا حساباتها غلط؟
وفي تقريره قال كريدي سويس إن إعلان برنامج صندوق النقد الدولي في أواخر أكتوبر 2022 خلانا كلنا نحس بتفاؤل كبير بشأن الاقتصاد المصري لكن توقعاتنا دي اختفت بسرعة وده بسبب إن الحكومة مقدرتش تحقق استقرار في مرونة الجنيه المصري، وده اللي خلاها تلجأ لبيع 32 شركة حكومية مملوكة للدولة .
البنك قالك كمان إن تراجع صرف الجنيه السنة اللي فاتت خلى الدولار يرتفع بشكل جنوني بحوالي 95% وده خلاه يسجل سعر بيع حوالي 30.66 جنيه الأيام دي مقابل 15.76 جنيه في 20 مارس 2022.
مش بس كده كريدي سويس قال إن المخاوف زادت جدا لما البنك المركزي المصري قرر يسيب أسعار الفائدة زي ما هي في فبراير 2023 واللي مفترض كان ياخد فيها قرار عشان يواجه ارتفاع التضخم الفترة دي
وثبت المركزي سعر الفائدة اللي سجلت 16.25% على الإيداع، و17.25% للإقراض رغم ارتفاع التضخم. ولو انت مش عارف فـ المعدل السنوي للتضخم الأساسي، حسب أخر تقرير أعن البنك المركزي، سجل 31.2% في يناير 2023، وده يعتبر أعلى مستوى ليه في 6 سنوات تقريبا، وده بعد ما كان سجل 7.2% بس في فبراير 2022.
لكن اطمن وده لأن بنك كريدي سويس قال إنه بيتوقع دخول استثمارات جديدة وتراجع معدلات التضخم ، وده لأنه شايف إن البنك المركزي هيضطر يرفع أسعار الفايدة خلال الشهور الجاية.
ده مش بس كده ده كمان كريدي سويس قال أن سعر الجنيه استقر في نص شهر يناير اللي فات وده بعد عودة تدفقات العملات الأجنبية اللي دخلت مصر في الفترة دي واللي وصلت لـ 915 مليون دولار، لكن مصدر التدفقات دي مكنش واضح بالنسباله
وده فعلا اللي أعلنه البنك المركزي، من فترة وقال، إنه رصد دخول استثمارات أجنبية بقيمة 925 مليون دولار خلال شهر يناير اللي فات لأول مرة من فترة طويلة .
وعشان كدة سعر الصرف بدأ ينزل ويتسقر من تاني ووص لـ أقل من 30 جنيه يوم 12 يناير وده بعد ما كان تخطي الدولار 32 جنيه واليوم ده عموما كان في لخبطة كتيرة وحصل ذبذبة وعدم استقرار وانخفاضات وارتفاعات في سعر الجنيه.
ولوانت مش عارف فـ الأزمة الروسية الأوكرانية في خروج استثمارات أجنبية من مصر بقيمة 22 مليار دولار خلال 2022، وده خلق حالة ضغط كبيرة في سوق الصرف المصري وأدى لانهيار الجنيه وارتفاع الدولار.
وفي النهاية دي كلها توقعات خبراء اقتصاد في البنوك دي وطبعا ممكن تطلع صح وممكن تكون غلط، قولنا انت شايف إيه ؟
