ذهب أم عقارات، هذه حيرة ناس كثيرة تفكر تستثمر فلوسها في الوقت الحالي بعيد عن الجنيه،لذلك فإن خبراء الاقتصاد وضحوا ما أفضل استثمار حاليا وقالوا ما أكثر قطاع ممكن تأخذ منه ارباح سريعة.
فياتري إيه أفضل استثمار؟ وياترى خبراء الاقتصاد قالوا ايه عن الاستثمار في الذهب؟ وايه شرط الاستثمار في البورصة؟
الفترة الأخيرة ناس كتير بدأت تفكر أنها تستثمر فلوسها بعيد عن الجنيه وده من خلال أنهم يشتروا دهب أو شهادات استثمار او حتى عقارات، وده يجي بعد خفض قيمة الجنيه قدام الدولار خلال الفترة الأخيرة.
بس ياترى هو إيه دلوقتي أحسن استثمار الدهب ولا العقارات ولا البورصة؟ شوف يا سيدي، حسب كريم العمدة، أستاذ الاقتصاد لجريدة الوطن إن رغم تذبذب أسعار الدهب الفترة الأخيرة بين ارتفاع وانخفاض، بس لسه يعتبر الملاذ الآمن لمدخرات المواطنين اللي معاهم 100 ألف جنيه مثلا.
وقال إن من أهم مميزات الدهب انه بيحافظ على قيمته لكن للأسف مش بيحقق أرباح سريعة زي شهادات البنوك والعقارات
أما بقى بالنسبة للاستثمار في العقارات فهو قال أنه من أفضل الطرق الامنة للاستثمار بالنسبة للمواطن لكن من الصعب بيعها لأنها ممكن تاخد وقت، بس عموما العقارات بتحقق أرباح أكتر من أرباح القطاع المصرفي على المدى الطويل.
ده اتكلم كمان عن الاستثمار في البورصة وقال أنها برضو وسيلة آمنة للمواطن واللي عنده خبرة الي حد ما في قطاع البورصة والاستثمار والادخار بشكل عام، وده لأن البورصة بتساهم بشكل كبير في الاستثمار لكن مش كل المواطنين عندهم خبرة في القطاع ده.
وبحسب الدكتور وائل سلام الخبير الاقتصادي لجريدة الوطن، إن أنسب استثمار فهو في قطاع العقارات وده لأن العقار لو كان تجاري ممكن يكون بداية لعمل مشروع كبير ممكن يدخل عائد لصاحبه، ولو مش عايز تفتح بيه مشروع ممكن تأجره وتاخد منه عائد كل شهر.
ولو اشتريت عقار سكني برضو ممكن تستفاد منه من خلال تأجيره، وده بعكس الدهب اللي مش ممكن صاحبه ياخد منه عائد شهري عشان كده بنقول أن العقارات أفضل استثمار من الدهب.
ده قال كمان إن الدهب بيجيب عائد لكن على المدى البعيد عشان لو صاحبه جه يبعه بعد سنة من شرائه فممكن يتعرض لخساير لو الدهب سعره إتراجع عكس العقارات اللي سعرها بيزيد مع الوقت.
لكن مش معنى كده إن الاستثمار في الدهب مش مجدي بالعكس ده قال إن في ميزة في الدهب مش موجودة في العقارات، لأن صحيح محتاج وقت عشان تكسب فيه بس برضه تقدر تبيعه بسهولة عن العقارات اللي بتاخد وقت في بيعها بيوصل لشهور.
ونصح المواطنين أن أي حد عايز يحافظ على فلوسه في الدهب فلأحسن أنه يشتري سبايك وجينهات بدل من المشغولات لأن مصنوعيتها عالية وبتخسرها وقت البيع.
أما اللي عايز يشتري بفلوسه عقارات هنا بقى لازم تخلي بالك وتختار عقار في موقع مميز ولازم تتأكد من صحة المستندات عشان متتعرضش للنصب، والأفضل انك تشتريها من شركات عقارات موثوق فيها بدل من السماسرة عشان متوقعش في مشاكل بعد كده.
ودلوقتي قولنا هتستثمر فلوسك في إيه؟
