أسعار الذهب وصلت لأرقام خيالية وهذا كان سبب في إقبال المواطنين عليه حتى ان البعض اشترى باأمواه كلها ذهب، وذلذلك فإن مصر أصدرت لأول مرة صندوق الاستثمار في الذهب .
لكن السؤال هنا ايه هو صندوق الاستثمار في الدهب؟ وايه حكاية وثائق شرا الدهب؟ وسعرها كام؟ ومدة التقديم قد ايه؟
الهيئة العامة للرقابة المالية كانت أعلنت من فترة عن إصدار أول صندوق للاستثمار في الدهب، الهدف من الصندوق ده هو تعزيز فرص الاستثمار في الدهب.
وخلال الساعات الأخيرة ابتدا الصندوق ده يشتغل واعلنوا عن نشرة الطرح الخاصة بيه، لكن يا ترا ايه هي الشروط الاستثمار في الصندوق ده؟
نشرة الطرح الخاصة بالصندوق قالت انه هيتم إعلان سعر وثيقة الدهب اللي الناس هتبدأ تستثمر فيها كل يومين في الأسبوع.
وهما يوم الأتنين والخميس وده على الموقع الإلكتروني الخاص بالصندوق وده بحسب موقع القاهرة 24، وكمان هيتم الاعلان بشكل يومي عن سعر استرشادي للوثيقة.
لكن السؤال هنا ايه هي حكاية الوثيقة دي؟ بحسب اللي نشره موقع المصري اليوم الوثائق دي بيتم طرحها من صندوق الاستثمار عشان تتوجه لشرا الدهب والعائد بتاعها بيكون وفقا لسعر الدهب.
طيب يا ترا إمتى اقدر اقدم على الوثائق دي؟الصندوق أعلان أنه خلاص بدأ يتم تلقى طلبات المواطنين عشان يشتروا الوثائق دي.
وعلى فكرة أنت تقدر تقدم على شرا الوثيقة دي بأسعار تبدأ من 10 جنيه للوثيقة لكن بتشتري بحد أدنى بـ 100 وثيقة حد أدنى يعني بنتكلم في إجمالي ألف جنيه.
و الصندوق هيمد فترة تلقى الطلبات لأمتى؟الصندوق قال في بيان ليه إن عملية تلقي الطلبات هتستمر حتى شهر يوليو وبيستهدف انه يجمع 250 مليون جنيه.
بس إيه الهدف من صناديق الإستثمار في الدهب؟ النوعية دي من الصناديق بيكون الهدف منها جذب شريحة من المستثمرين اللي اتجهت مؤخرا للاستثمار في الدهب
وده بعد ما فضل كتير من كبار المستثمرين أنهم يحطوا فلوسهم في سبايك الدهب، بعد ما وصلت أسعاره لأرقام خيالية خلال الفترة الأخيرة.
ده كمان صغار المستثمرين بدأو يحطوا فلوسهم في الجنيهات و المشغولات الذهبية، ومش بس كده، ده بعض المستثمرين اشتروا بفلوسهم وثائق في صناديق استثمار الدهب لكن بره مصر.
وعشان كده تم إصدار اول صندوق للاستثمار في الدهب في مصر لأول مرة وده بحسب اللي نشره موقع المصري اليوم، طيب وبعد ما عملنا الصندوق واشتريت وثائق فيه ايه اللي هيحصل بعد كده؟
أقولك يا سيدي رامي الدكاني رئيس البورصة المصرية قال في تصريحات صحفية ليه، أن الصندوق ده هيظبط سوق الدهب وده عشان هيقلل الطلب على شرا السبايك و الجنيهات الدهب.
ده كمان بيوفر للمستثمرين إنهم يستثمروا في الدهب من غير ما يشتروا ده و يحتفظوا بيه ومن غير ما يدفعوا مصنعية
وده من غير مايشتروا دهب بنفسهم وده بيتم من خلال وثيقة صادرة عن الصندوق.
وكمان دي الوثيقة بتحميك من سرقة الدهب أو أن التاجر يغشك وقت الشراء، طيب اعمل ايه عشان أقدر استثمر في الصندوق ده؟
الصندوق أعلن عن شركات وساطة لبيع الوثائق وهي شركة أزيموت مصر اللي بتدير الصندوق الصندوق، وشركة مباشر، وشركة نعيم، وشركة جلوبال إنفست، وشركة ثاندر، وشركة عربية أونلاين، وشركة بريميير، وثري واي، والأهلي فاروس أسطول.
والمهم انك هتروح واحدة من الشركات دول وتطلب منهم إنشاء كود خاص بيك في البورصة ، وده زي رقم حسابك في البنك، بيسجل عليه كل معاملاتك في البورصة.
ومن بعدها هتعمل إيداع للفلوس والشركة اللي تعاقدت معاها هتشتري عدد الوثائق اللي انت عاوزها.
ودلوقتي قولنا هتستثمر في صندوق الدهب و لا لا؟
