سعر الريال السعودي في ارتفاع متواصل منذ فترة وهذا طبعا معروف إنه بسبب موسم عمرة رمضان 2023، وإقبال المواطنين على شراءه بشكل كبير، لكن التوقعات تقول إنه سيزيد بمعدل كبير خلال الفترة الجاية.
فـ ياترى هيوصل سعره لكام، وإيه علاقة ده بارتفاع أسعار الدولار الفترة دي، وياترى إيه مصير الجنيه الأيام الجاية ؟
خلاص موسم عمرة رمضان كلها أيام ويبدأ وده اللي خلى المواطنين يبدأو يشتروا الريال السعودي بشكل كبير، ومع زيادة اقبال الشراء عليه بدأ سعره يرتفع ويزيد.
ووصل سعره حسب أخر تحديق لأسعار العملات في البنوك 8.21 جنيه للشراء، 8.23 جنيه للبيع.بس المشكلة إنه الخبراء توقعوا إنه سعره يزيد الفترة الجاية خاصة وإن المعتمرين بيشتروه بكثافة الأيام دي .
بس تفتكروا زيادة الريال إيه علاقتها بارتفاع الدولار الفترة دي؟
مسؤلين في شركات صرافة اتكلموا في تصريحات ليهم وقالوا ، إن الطلب على شراء العملات الأجنبية سواء الريال السعودي أو الدولار ارتفع الفترة دي من المواطنين وقالوا إن ده بسبب ارتفاع الأعداد المسافرة لأداء عمرة رمضان بدرجة كبيرة وإن المعروض من النقد الأجنبي كان قليل وده زود طبعا السعر.
طيب هو البيع بيتم إزاي وهل في حدود معينه للشرا ولا إيه بيحصل ؟
هقولك ياسيدي المسؤلين في شركات الصرافة قالوا إن كل فروع الصرافة التابعة ليهم على مستوى الجمهورية بتبيع كل المعروض عندها من النقد الأجنبي للعملا بس بشروط معينة منها إنهم يشوفوا كل الأوراق اللي بتدل على سفر العميل زي التأشيرة والتذكرة وجواز السفر.
وعشان ميحصلش أي أزمة الشركات بتدبر العملات الأجنبيه للعملا بحساب وأحيانا بيبعوا للعميل ألف ريال بحد أقصى وطبعا نفس المبلغ ده لو بالدولار.
وفي أيام تانيه بيكتفوا ببيع 300 ريال سعودي بس وده طبعا بيتحدد حسب المعروض اللي متوفر عندهم.
وقالوا إم ارتفاع سعر الدولار في السوق السودا بـ المقارنة بالسعر الرسمي في البنوك والصرافات خلال الأسبوعين اللي فاتوا والاسبوع ده، اتسببوا في تراجع حجم المعروض من العملة عند بعض شركات الصرافة..
أما بقى لو عايز تطمن على أسعار الدولار الفترة الجاية فـ أحب أقولك إن معظم البنوك والمؤسسات الاقتصاد الدولية توقعت الفترة الجاية زيادة في سعر الدولار مقابل الجنيه.
مش بس كدة دول كمان أكدوا إنه هيوصل سعره ما بين 34 و35 جنيه وده بسبب زيادة الطلب على الدولار ونقص الأخضر في السوق المصري.
وعشان كدة اقترح واحد من مسؤولي شركات الصرافة إنه أي حد حابب يعمل عمرة يتبرع بقيمة العمرة للفقراء أو الأسر الأولى بالرعاية وده هيعادل أجرا كبير وهيساعد في توفير العملة الصعبة لدعم الاقتصاد المصري..
ولو انت مش متابع فـ لازم تعرف إن سعر صرف الجنيه متراجع الفترة دي مقابل الدولار وده حصل تحديدا من بداية يوم 21 مارس 2022 ولحد يناير 2023 وارتفع متوسط سعر بيع الدولار في البنوك بحوالي 96% من 15.76 جنيه في 20 مارس 2022 إلى 30.95 جنيه في معاملات البنوك النهاردة.
دلوقتي قولنا رأيك في ارتفاع أسعار الريال السعودي والدولار وهل انت شايف إنه مقترح تأجيل العمرة السنة دي والتبرع بقييتمها للفقراء أنسب حل لدعم الاقتصاد؟
