من الواضح أن بشائر البريكس هلت من قبل انضمام مصر بشكل رسمي، وهذا لأن سعر الدولار في السوق السوداء انخفض بشكل ملحوظ خلال يومين بعد ما ارتفع خلال الفترة الأخيرة نتيجة انتشر بعض الأنباء بوجود تعويم في شهر سبتمبر.
فياترى سعر الدولار وصل لكام؟ وهل انضمام مصر للبريكس هيحل أزمة الدولار؟ وازاي انضمامنا للبريكس هيحل ازمتنا الاقتصادية؟
الفترة الأخيرة انتشر كلام كتير اوي بخصوص وجود تعويم جديد في شهر سبتمبر اللي جاي بالتزامن مع مراجعة صندوق النقد وطبعا الاخبار دي أثرت على سعر الدولار في السوق السودا وخلته يقرب من 42 جنيه
بس الوضع ده اتغير بين يوم وليلة لما تم الإعلان عن انضمام مصر للبريكس، لكن هو ايه اللي حصل؟انا اقولك، حسب قناة العربية، بعد دعوة “بريكس” لانضمام مصر، فالجنيه المصري شهد تحسن كبير في الأداء قدام الدولار في السوق السوداء، وده يجي بالتزامن مع إعلان الحكومة المصرية توفير الدولار لعدد من المستوردين، وأنباء عن تنويع مصادر التمويل بعيد عن الدولار
كل العوامل دي خلت الدولار في السوق السودا يتراجع ويوصل ل 39 جنيه بعد ما كان قرب من 42 جنيه الايام الاخيرة.
مش بس.كده دي كمان انخفضت تكلفة التمويل على الديون السيادية لمصر أجل 5 سنين والمعروفة باسم “CDS” لأقل مستوى في أسبوعين واتراجعت في المتوسط بأكتر من 1.5% يوميا خلال الأيام الأخيرة.
بس هو ازاي انضمام مصر للبريكس هيحل مشكلة نقص العملة؟
شوف يا سيدي، حسب تصريحات هشام إبراهيم، أستاذ التمويل والاستثمار في قناة القاهرة الاخبارية، أن انضمام مصر للبريكس يعتبر طوق نجاة بحل مشاكل كتير بيعاني منها الاقتصاد المصري اللي أبرزها أزمة نقص العملة
وده لأنه هيتيح لينا الفرصة للتبادل التجاري مع دول كبرى زي الصين والهند وروسيا والبرازيل بعملاتهم المحلية وده هيقفل الضغط بشكل كبير على الدولار
وده يجي في الوقت اللي بندور فيه على بدائل للدولار زي كتير من دول العالم اللي بتواجهم نفس الازمة، وقال إن مصر عندها سياسة واستراتيجية واضحة، ومكنش منطقي ان قمة البريكس 2023 اللي بتقود الاقتصاد العالمي متضمش الدولة المصرية أو أنها تتخلف عن التواجد في التجمع الاقتصادي ده
وحسب مجلس الوزراء وجود مصر كدولة عضو ببنك التنمية التابع لتكتل البريكس هيمنحنا فرصة للحصول على تمويلات ميسرة لمشروعاتها التنموية، ده بالإضافة ان وجودها داخل التكتل هيخليها تستفاد من نجاحتهم
بس هو يعني ايه بريكس اصلا؟
شوف يا سيدي البريكس ده عبارة عن تكتل اقتصادي مهم وبيضم على طاولته 5 اقتصاديات دولية كبرى ومتطورة، وهما روسيا والبرازيل والهند والصين وجنوب أفريقيا.
أهم الملفات اللي بتناقشها المنظمة دي مشروع العملة المشتركة وده لانه بيسعى لتقليل هيمنة الدولار على التجارة العالمية، عشان كده بيقترح أعضاءها زيادة استخدام العملات المحلية في التجارة البينية وعمل نظام دفع مشترك.
وبالمناسبة في دول تانية في طريقها للانضمام للبريكس بجانب مصر زي الإمارات والسعودية والأرجنتين والبحرين وإيران، ومن المتوقع دعوة دولة إفريقية تانيه، وده حسب موقع سكاي نيوز.
ودلوقتي قولنا شايف إن انضمام مصر للبريكس هيحصل أزمة العملة؟
