بتسأل نفسك طوال الوقت، هن كيفية الحفاظ على قيمة أموالك أو استثمارها بطريقة آمنة، وخاصة مع الازمات الاقتصادية والتهديدات التي تؤثر على سعر لجنيه المصري، فجميعنا يبحث عن أفضل طريقة من أجل استثمار الأموال. وهل الذهب أفضل أم شهادات الاستثمار؟ هذا ما سنتعرف عليه من خلال التقرير التالي:
مننكرش ان دلوقتي كله خايف على فلوسه، وعارفين ان الفلوس اللي في جيبنا دلوقتي بعد شوية مش هيبقى ليها قيمة وخايفين نجازف ونستثمرها بأي طريقة في الاخر نخسر اللي ورانا واللي قدامنا.
طب دلوقتي المنافسة اللي شايفنها هي بين الدهب وبين شهادات الاستثمار في البنوك خصوصا ان كل واحد له مميزاته.. مين فيهم التوب ويكسب لقب افضل استثمار في 2022؟
اول حاجة هنقولك مميزات الدهب، حسب كلام الخبراء لو فعلا عايزة تستثمر فلوسك في الدهب يبقى الافضل تشتري سبياك أو جنيهات دهب.
بس خلي بالك الدهب استثمار مناسب على المدى المتوسط و البعيد على الاقل سنتين، عشان تقدر تستفيد بفرق الفلوس بعد ما تبيعه بسعر أعلى من اللي اشتريته بيه.
ويعتبر دي انسب طريقة للاستثمار خصوصا لو انت مش معاك فلوس كتير بس عايز تستفيد بيه تحت اي ظرف، وده برضو اللي اتفقت عليه مؤسسة جولد بيليون العاملة في مجال أبحاث الذهب، وقالت ان الاستثمار في الدهب ده أأمن طريقة تحافظ بيها على قيمة فلوسك مهما الوقت عدى.
وبالذات في الوقت اللي احنا فيه ده من تضخم وارتفاع الاسعار، كمان الدهب قيمته بتزيد بسرعة مع الوقت. لكن في نفس الوقت خلي بالك، عشان متخسرش فلوسك، مينفعش تروح تشتري بكل اللي معاك دهب، لا لازم تشتري بجزء وتشيل جزء تاني معاك
والمهم برضو انك تختار الوقت المناسب اللي تشتري فيه، يعني متروحش وقت ما السعر طاير في السما، والأفضل تشتري كمان على فترات مختلفة كل ما السعر ينزل، احسن ما تشتري كمية مرة واحدة.
أما بقى لو انت من الناس اللي بتحب يجيلها عائد ثابت، وتبقى عارف معاده امتى وتحافظ على قيمة فلوسك، يبقى عليك وعلى شهادات الاستثمار في البنوك، لانك بتتفق معاهم على عائد ثابت بقى كل شهر او ربع سنة او نص سنة، او بعد سنة كاملة ، حسب ما انت عايز وحسب نظام الشهادة
والشهادات مبتفقدش قيمتها مع الوقت، بالعكس انت ممكن تدفع مبلغ قليل بس تاخد منه ارباح في خلال السنة، لكن فيها عيب يخليك تخاف منها، ان لما نسبة التضخم بتعلى، بتأثر بالسلب على قيمة الفلوس اللي انت حاطتها في الشهادة.
بمعنى ان عقبال ما يجي الوقت اللي هتستلم في الارباح، لو التضخم عليّ، الفلوس قيمتها هتقل، وكمان انت متقدرش تكسر الشهادة غير لما يعدي عليها 6 شهور، ولو كسرتها قبل ما مدتها تنتهي بيتخصم جزأ من الارباح.
يعني خلاصة الموضوع، مفيش استثمار احسن من التاني، الموضوع بيعتمد على حسب امكانية الشخص، يعني لو انت شخص محتاج للفلوس وعايز يجيلك ارباح كل شهر مثلا، يبقى الانسب ليك شهادات الاستثمار.
اما لو انت قدامك فرصة تستنى على الربح سنة او سنتين، يبقى اشتري دهب، وبيعه بسعر عالي واستفيد بالفرق.
