هل تغير العدس عن زمان ليصل سعر الكيلو الواحد منه 40 جنيه!؟ أم أننا سنرجع ارتفاع سعر غلى ارتفاع سعر الدولار كالعادة، هل التجار هم السبب وراء ارتفاع السعر ؟ وهل نحن نستورد العدس أم يتم زراعته في مصر؟ كل هذه الأسئلة سنعرف غجابتها من خلال التقرير التالي:
معروفة شتا يعني عدس، وجبة اساسيه تلاقيها كل بيت مصري طول موسم الشتا، بس للأسف سعر الكيلو دلوقتي مابين 35 إلى 40 جنيه في بعض المناطق، فياتري ايه السر؟
مجدي الوايلي، عضو المجلس التصديري للحاصلات الزراعية، كشف عن ارتفاع أسعار العدس بقيمة 5 آلاف جنيه للطن، مع زيادة تصدير مصر للعدس من الشهر للي فات ، بعد قرار وزارة الصناعة بالسماح بتصدير العدس مرة تانية.
وكانت الوزارة مع بداية الأزمة بين روسيا وأوكرانيا، وقفت تصدير مجموعة من الحبوب زي الفول، والعدس، والمكرونة والقمح، عشان تكفى احتياجات السوق المحلى، وفي سبتمبر اللي فات انتهى العمل بالقرار، لأن الحكومة ماطلعتش قرار باستمرار وقف التصدير.
وحسب عزت عزيز، عضو شعبة الحاصلات الزراعية بغرفة القاهرة التجارية، أسعار العدس ارتفعت خلال اخر اسبوعين بسبب نقص المعروض، وارتفاع طلبات التصدير بكميات كبيرة من مصر للسودان ليبيا.
ومن رصده للسوق ، سعر العدس ارتفع إلى 16 ألف جنيه للطن فى الجملة مع بداية السنة، وبعدين بقى ب 18 ألف جنيه فى مارس، واستمر في الزيادة التدريجية عشان يوصل سعره دلوقتي إلى 25 ألف جنيه، لأ وإيه: الأسعار مرشحة للزيادة.
وحسب كلامه، بتستورد مصر %95 من استهلاكها، أما حجم انتاجنا فيدوب بيسجل 200 ألف طن سنويا، نصهم بيتصدر للخارج، والنص التاني للاستهلاك المحلي.
كمان الكميات المتوافرة حاليًا تكفى شهر واحد بس، فى حين ان الطلب على العدس بيزيد خلال شهور نوفمبر وديسمبر ويناير من كل سنة.
دا غير إن الموانئ محجوز فيها حوالي 5 آلاف طن التجار مستنيبن الإفراج عنها، انا مخزون العدي الموجود عند التجار فوصل إلى 10 آلاف طن.
ما هو الحل؟
عزيز طالب بوقف تصدير العدس خلال الفترة الحالية، خصوصا مع نقص الكميات المحلية المعروضة في السوق.كمان أكد ضرورة الإفراج عن الكميات المخزنة في المواني، وقال أن تأخير الإفراج عنها خلى المستوردين مايطلبوش شحنات جديدة من الموردين، في وقت العالم فيه مسجل زيادة في محصول العدس .
اما بقى لو بتسال ليه مصر ما بتزرعش العدس، فالاجابه عند نقيب الفلاحين عبد الرحيم حسين ابو صدام، واللي قال ان مصر بتنتج 3% بس من احتياجاتها من العدس، والباقي بنستورده من دول زي كندا واستراليا وتركيا.
وعشان نحقق اكتفاء الذاتي منه محتاجين نزرع 100,000 فدان مقارنه ب 3 الاف فدان دلوقتي، بس المشكلة ان زراعة العدس تكلفتها كبيرة على الفلاحين بسبب صعوبة تسويقه ورخص سعره وقلة إنتاجيته، مقارنة بمحاصيل شتوية تانية زي القمح والبنجر والفول والبرسيم والطماطم والبطاطس.
انتم بقى قولوا لنا سعر العدس عندكم وصل لكام؟ وهل فعلا لاحظتوا الزياده اللي بيتكلم عنها التجار؟
