البنوك دائمًا تتنافس مع بعض، من يقدم شهادات إدخار بأعلى عائد، ويجذب أكبر عدد من العملاء من كل الفئات، وفي النهاية يكون كلا من البنك والعميل مستفيدين.
الآن كل البنوك تتنافس على على شهادة بـ 17.25% عائد، التي بتوفر للعميل ان يشتريها بأقل سعر، تسنتعرف الآن كيف يمكنك استثمار أموالك من خلال التقرير التالي:
دلوقتي انت كعميل معاك مبلغ سواء كبير او صغير بقى، بس عايز تحط جزأ منه في شهادة ادخار يجيلك منها عائد، بس محتار بين كل البنوك، اللي بتغريك بالمزايا اللي بتقدمها، عشان كدا وفرنا عليك وجمعنالك احسن واضمن البنوك اللي تقدر تستثمر فيها فلوسك باقل مبلغ بس بأعلى عائد.
واولهم كان بنك قناة السويس، مقدم شهادة ادخار ثلاثية، بعائد سنوي ثابت 17%، بيتحسب من تاريخ اول يوم للشراء
وتقدر تشتريها بـ1000 جنيه كحد أدنى.
والميزة فيها انها بتوفرلك دوريات صرف متنوعة، سواء شهرية او سنوية، او ربع ونص سنوية. وبتوفرلك انك ممكن تاخد قرض، بتوصل قيمته لـ 95% من الشهادة، او تطلع شهادة ائتمان بضمانها.
وده نفس سعر الشراء، والمميزات اللي بيقدمها بنك التعمير والاسكان من شهادة «بريميوم»، ومدتها بتوصل لـ 3 سنين
وكمان تقدر تشتريها “اون لاين” من موقع البنك من غير ما تروح مشوار لمقر البنك.
وبالنسبة للعائد السنوي ليها بيوصل لـ16% لو صرفته كل شهر، ولو صرفته كل 3 شهور هيبقى العائد 16.25%
وقيمة العائد هتوصل لـ 17% لو صرفته كل سنة، وده أعلى عائد موجود في شهادة بريميوم.
لكن بيقدم عائد أكبر من كدا بيوصل لـ 17.25% سنويا، من شهادة «رويال بلس»، ومدتها 3 سنين، لكن على سعر العائد الكبير ده، برضو سعر شرائها كبير وبيوصل لمليون جنيه كحد أدنى.
لكن لو عايز نفس العائد ده، بس تشتري بسعر اقل، يبقى عليك وعلى البنك الاهلي، وبنك مصر، هيقدمولك الشهادة البلاتينية او شهادة القمة، حسب ما كل بنك بيسميها.
وهتكون مدتها 3 سنين، بعائد 17.25% سنويا، وتقدر تشتريها ب 1000 جنيه بس.لكن خلي بالك لو هتصرفها كل شهر هتاخد عائد 16% بس، ولو صرفتها كل 6 شهور هيبقى العائد 16.5%.
او تدفع 10 الف جنيه، وتستفيد بشهادة “بريمو جولد” من بنك القاهرة، بنفس الآجل ونفس كل العوائد حسب وقت الصرف، وطبعا حاجة زي دي، مش هتعدي كدا على بنك ناصر الاجتماعي، لانه يعتبر من اكتر البنوك اللي بتقدم خدمات هدفها تساعد اقل الفئات، وكمان ذوي الهمم وكبار السن.
عشان كدا طرح شهادتين، واحدة اسمها شهادة “رد الجميل” لكبار السن، مدتها 3 سنين، وبعائد سنوي 17.5%، لكن العائد بيتصرف بعد ما مدة الشهادة بتنتهي وتقدر تشتريها من اول 1000 جنيه.
وتاني شهادة دي بقى لكل العملاء أيًا كان سنهم، وزي أي بنك بنفس المدة، وبعائد الـ17.25%، وبرضو العائد بيقل كل ما مدة الصرف بقت اقرب زي كل شهر او كل 6 شهور.
دلوقتي انت اللي ليك الاختيار بين البنوك، اختار اللي يناسبك بأعلى عائد، ومش هتدفع كتير، بس كل ما هتدفع اكتر هتستفيد بعائد سنوي أكبر.
