الكيلو ب145 جنيه فقط! بشرى سارة لكل المصريين قبل شهر رمضان، لأن لحمة تشاد خلاص وصلت مصر بسلام والسعر كما تروا لا يخطر على بال أحد.
بس برضه الناس بتسأل: ليه سعرها اللحمة التشادي رخيص كده؟ وهي احسن ولا اللحمة البلدي؟ طيب نضمن سلامتها ازا؟ وهل ناكلها واحنا مطمنين؟
واهم سؤال بقى هتتباع فين؟ وهل هتبقى متاحة في كل المحافظات ولا أماكن ايوة وأماكن لا؟
اخيرا تم الاعلان عن وصول أو شحنة لحوم من تشاد تمهيدا لطرحها في الأسواق بمناسبة شهر رمضان الكريم.ونيجي بقي لأهم سؤال: هتتباع فين؟الكيلو الواحد ب145 جنيه وتقدر تشتريها من منافذ حزب حماة الوطن المنتشرة علي مستوي محافظات الجمهورية، وباوزان تبدأ من ربع كيلو.
طيب هل الكمية المطروحة كافية ولا مش هتكفي احتياجات الناس؟
بص ياسيدي المهندس محمد الجمال، رئيس لجنة الزراعة والإنتاج الحيواني بالحزب، قال ان توريد اللحوم التشادية المبردة لمثر متقسم لمراحل كل مرحلة مكونك من 2000 رأس بقري من أجود أنواع الأبقار.
وحسب المخطط، المفروض يوصلنا 660 طن لحمة كل شهر موزعين على 13 رحلة، يعني في الأسبوع الواحد 3 رحلات، وكل رحلة فيها 55 طن.
و الشحنة اللي وصلت هتتوزع على محافظات القاهرة الكبرى ووجه بحري، ودلوقتي في طائرة لحوم خاصة بتجهز لضخها في محافظات الصعيد.
طيب ليه اللحمة دي رخيصة كده وهل سلامتها مضمونة؟
تشاد من أشهر دول إفريقيا المعروفة بالمساحات الواسعة من المرعي الطبيعية وسقوط الأمطار أغلب شهور السنة، عشان كده البيئة هناك مناسبة جدا لتربية الثروة الحيوانية بتكلفة قليلة واللحمة عندها من أرخص السلع فى السوق بعكس مصر.
وفي نفس الوقت، طارق نصير امين الحزب، أكد انهم مقللين هامش الربح جدا، لدرجة إن مفيش مكسب تقريبا، وده اللي هيخلي أسعار اللحمة التشادي رخيصة للمستهلك.
ولو هنتكلم عن سلامة اللحمة، فلازم تعرف ان تشاد أغلب سكانها مسلمين، وكل حاجة هناك بتتم على الشريعة الإسلامية، وزيادة في الاطمئنان مصر بعتت فريق طبي للإشراف على العملية كاملة من اول اختيار العجول لغاية وصولها لمصر، عشان يتأكدوا ان كل حاجة ماشية مظبوط حسب الإجراءات الطبية والدينية المتعارف عليها.
والحكاية مش استيراد بس، لأن حزب حماة وطن، ومن خلال الشركة الوطنية الكويتية، اللي بتضم 3 مستثمرين من الكويت و2 من مصر، أنشأ مزراع لتسمين العجول في تشاد.
والمفروض انه قبل توريد العجول، بتتغذى على تركيبة اعلاف مصرية، عشان طعم اللحمة يبقى مشابه لطعم اللحمة البلدي في مصر.
وخد بالك اللحمة دي طازة زي اللحمه السوداني بس الفرق ان السودان ليها حدود مع مصر فكانت العجول بتوصلنا حيه عشان يتم تجهيزها جوه الاراضي المصرية.
لكن تشاد دوله حبيسه يعني ملهاش مواني بحرية نقدر من خلالها ننقل العجول حية، فمكنش قدامنا حل غير اننا نجهز اللحوم هناك ونبعتها مبردة على طيارات شركة مصر للطيران.
وحسب حزب حماه الوطن دي مش مبادره هتقعد معانا شهر او اتنين عشان تقدم بديل لارتفاع اسعار اللحوم البلدي، لأ ده مشروع دائم علطول في شحنات هتيجي من تشاد لمصر.
في الوقت نفسه، الحكومة مستمرة في طرح اللحمة البرازيلي المجمدة بسعر ١٢٠ جنيه للكيلو ، واللحمة السوداني بسعر 165 جنيه للكيلو.
انتوا بقي هتفضلوا تشتروا اي نوع: التشادي ولا البرازيلي ولا السوداني، ولا هتسيبهم وتدورا على اللحمة البلدي؟
