سمعتوا قبل ذلك عن العملات الرقمية مثل البيتكوين وغيرها؟، نعم لو سمعت الأسم هذا من قبل أحب ان أقول لك أنك ستسمعه كثيرا بعد ذلك وذلك لأن البنك المركزي يدرس الآن إطلاق الجنيه الرقمي.
طيب ياترى الجنيه ده هنقدر نشتريه بيه ولا هيكون عملة افتراضية وياترى إيه استخداماته وإيه أصلا الهدف من إصداره
أسئلة كتيرة تعالوا نعرف إجابتها في التقرير التالي:
مصدر مصرفي مسؤول أكد إن البنك المركزي بيدرس الفترة دي إطلاق الجنيه الرقمي، وده هيكون ضمن مشروعات كتيرة بيشتغل عليها البنك المركزي الفترة دي.
طيب هو يعني إيه أصلا عملة رقمية وإزاي اقدر استفاد بيها؟ بص ياسيدي العملات الرقمية دي بتعتبر أصول انت بتقدر تشتريها وبتختلف أسعارها بشكل سريع وده لأنها بتتأثر بالعوامل الخارجية زيها زي أسهم الشركات مثلا، وعشان السبب ده الاستثمار فيها بيكون خطر شوية لأنها ممكن فجأة تضرب في السما وفجأ تنزل الأرض تاني لسابع أرض وتخسر فيها كل فلوسك .
لكن لو هنكون حقانين فـ الاستثمار في الأسهم في البورصة كمان بيكون حواليه مخاطر لكن ولا بيتم تجريمه ولا بتمنعه الحكومات ولا بيتم في السر زي العملات المشفرة.
بس الأكيد إن سبب المنع الرئيسي هو إن الحكومات والبنوك المركزية مش بتقدر تتحكم ولا تسيطر عليها وده لأنها بتم من خلال تطبيقات صرافة رقمية وبيكون عليها آلاف العملات الرقمية وبتكون فيها نسب فايدة وإقراض لكن بعيد خالص عن البنك المركزي أو تدخل الحكومة، طيب ياترى إيه الهدف من إن البنك المركزي يصدر الجنيه الرقمي ؟
شوف ياسيدي الدكتور محمد شادي الباحث الاقتصادي قال في تصريحات ليه إن في فرق ما بين العملات المشفرة اللي بنسمع عنها والعملات الرقمية الرسمية.
وإن الفرق الأساسي هو أن العملات المشفرة بتكون مجهولة المصدر والدولة مش بتعرف تسيطر عليها وبتتداول من قبل الأفراد بدون أي تدخل من أي جهة رسمية .عكس الدولار الرقمي وعملات تانيه كتيرة واللي بيكون ليها أصول في البنك المركزي اللي بيصدرها.
طيب ليه العملات المشفرة العادية خطرة؟ الدكتور محمد شادي الباحث الاقتصادي قال إن في عدد كبير جدا من التحذيرات بـ تطلقها البنوك المركزية ومنهم البنك المركزي المصري واللي أصدر التحذير الرابع من التعامل في العملات المشفرة.
لكن في نفس الوقت بدأ البنك المركزي يفكر بشكل برة الصندوق ويعمل زي ما عمل 80 بنك مركزي مختلف في العالم ويصدر بنفسه العملات الرقمية.
وطبعا المركزي بيستهدف من القرار ده إنه يقلل من فرص انتشار العملات المشفرة اللي مش الرسمية في اقتصاد الدولة، وده لأنه بالفعل في اتجاه كبير من المستثمرين في الدخول في العملات المشفرة وده عشان استخدامها بيكون سهل أوي وتداولها بيتم بشكل سري.
وعشان كده البنك المركزي والبنوك المركزية في العالم كانوا شايفين إن العملات الرقمية الغير رسمية لو انتشرت بكثافة في الأسواق البنوك المركزية هتفقد قدرتها في السيطرة على الاقتصاد.
وطبعا معروف إن الدولة لازم تقدر تتحكم في الاقتصاد خاصة فيما يخص الجانب النقدي يعني من الأخر يسيطر على الفلوس نفسها راحه فين ومصدرها إيه.
وحسب مصادر مصرفية بدأ البنك المركزي المصري فعلا يدرس إمكانية وضع قواعد إطلاق العملات الرقمية عشان تكون بديل عن الأنواع الأخرى من العملات المشفرة واللي مخاطرها كبيرة وممكن تخسرك فلوسك في لحظة والتانيه.
مش بس كده ده كمان هيتعمل ليها بنوك رقمية ودى هتعتبر خطوة مهمة جدا عشان تقدم خدمات مصرفية للمواطنين بشكل إلكتروني فقط وحاليا البنك بيدرس وضع الإطار الرقابي عليها لترخيصها في مصر.
لكن بردو خليني أقولك إن في ناس كتير بتشوف إن العملات المشفرة أو الرقمية هي المستقبل لكن بردو في ناس بتشوف إن الأمان بيكون في البنوك المركزية
انتوا بقا قولولنا شايفن العملات الرقمية إزاي وهل ممكن تستثمروا فلوسكم فيها؟
