هل تتخيلوا عندما توافق دول كثيرة ان تتعامل في المعاملات التجارية مع مصر بالجنيه المصري، وتقرر تستخدمه بدلا من الدولار فكيف تستفيد مصر من الأمر، وهل قررت الهند حقا ان تسير نهج روسيا وتعتمد الجنيه المصري؟ تابعونا من خلال التقرير التالي لمعرفة التفاصيل:
البنوك الهندية أعلنت إنها بتدرس اعتماد الجنيه المصرى بشكل رسمي وإدراجه ضمن قائمة العملات القابلة للتداول والتبادل التجاري بين مصر والهند.
وقالت مصادر إن الحكومة المصرية بدأت فعلا في إجراءات اعتماد الروبية الهندية كعملة اختيارية في تسوية المعاملات التجارية مع الهند.
وده معناه إن الحكومة هتسمح لرجال الأعمال المصريين والهنديين إنهم يتعاملوا بالروبية والجنية المصري، بدل الدولار.
والمصادر قالت كمان إنه خلال الأيام الجاية هيتم الإعلان وبشكل رسمى على نتائج المباحثات اللي بتعملها الحكومة المصرية والهندية في الموضوع ده.
الجميل بقى إن المباحثات دي بدأت تظهر بعد إعلان البنك المركزى الروسى اعتماد العملة المحلية المصرية ضمن العملات القابلة للتداول.
وبعد القرار اللي اخدته السلطات الروسية الأسبوع اللي فات بخصوص إدراج الجنيه المصري ضمن سلة العملات المتداولة في بورصة موسكو، الظاهر الجنيه المصري على معاد مع قرارات روسية جديدة.
المصادر كمان بتقول إن موسكو والقاهرة هيوصلوا لاتفاق قريب هيتيح لمصر توفير حوالي 5 مليارات دولار ودي تعتبر حصيلة واردات الحبوب بين روسيا ومصر.
طب إزاي مصر هتستفاد من القرارات دي ؟
هقولك ياسيدي، خبراء الاقتصاد قالو إن القرارات دي هتساهم في إعطاء دفعة قوية للاقتصاد المصري، وتخفف من الضغط على الدولار وطلبه، خاصة وإنه بقى مرتبط بكتير من المنتجات اللي بتستوردها الدولة المصرية من الخارج.
قالوا كمان إن القرارات دي لو اتنفذت فعلا هتقلل من سعر الدولار أكثر خاصة لو قامت دول أخرى باتخاذ قرارات مشابهه، وإن القرار اللي أخدته روسيا في ظل العقوبات اللي بتوواجهها نتيجة الحرب على أوكرانيا هيكون مفيد جدا ليها ولمصر بالتأكيد.
وأكدوا إن القرار ده هيدعم التبادل التجاري بين البلدين خاصة ، وإن القرار هيسمح لمصر وروسيا باستخدام الروبل الروسي والجنيه في المعاملات التجارية بين البلدين بدلا عن الدولار، وإنه بيقدر حجم التبادل التجاري بين مصر وروسيا بنحو 4.7 مليار دولار لعام 2021.
طيب القرار ده هشمل كل المنتجات ؟
حسب كلام نائبة رئيسة الحكومة الروسية فيكتوريا أبرامشينكو فـ مصر تعتبر أكبر مستورد للحبوب من روسياـ وأكدت إن المفاوضات مش هتشمل المنتجات الغذائية لكن هتكون بشكل أوسع بكتير.
وقالت كمان البنك المركزي الروسي يجري محادثات، في الوقت الحالي، مع البنوك المركزية لوضع آليات لتنفيذ التبادل التجاري بين مصر وروسيا.
قولولنا رأيكم في قرار اعتماد الجنيه المصري بديلا عن الدولار في الهند وروسيا؟
