بنك عالمي صدم الجميع بشأن حقيقة الوضع في مصر.. فهل فعلا صندوق النقد موقفه تغير مننا؟وما سر ظهور السوق السوداء من جديد؟
طيب إيه المطلوب عشان الأزمة تتحل؟ والبنك يقصد إيه بالتعديلات المؤلمة اللي هتحصل لو اتأخرنا التنفيذ؟ واهم حاجة : إيه مصير الجنيه والدولار؟
تقرير جديد من بنك جولدمان ساكس الامريكي كشف فيه عن مشاكل صعبة في اقتصاد مصر ، وبسببها صندوق النقد الدولي بقى متردد انه يدينا قروض بمبالغ كبيرة، طالما مخدناش خطوات اكتر للإصلاح.
عشان كده، الحكومة لازم تسرع من تنفيذ البرنامج اللي اتفقنا عليه مع الصندوق، والا هنضطر ننفذ إجراءات مؤلمة بعد كده!
وطبعا انت بتسأل نفسك دلوقتي مؤلمة اكتر من اللي احنا فيه؟بص ياسيدي احنا صحيح خفضنا قيمة الجنيه للنص، وقللنا الواردات، والأسعار اتجننت بس لسة فيه مشاكل وخلينا نبدأ بالدولار.
البنك العالمي شايف إن البنك المركزي وقف التعامل بسعر صرف مرن للجنيه امام الدولار، واللي بيحصل دلوقتي هو سعر صرف مدار.
وفي نفس الوقت الطلب على الدولار اكتر من العرض، والمستوردين مش لاقيين دولار كفاية في البنوك ، عشان كده انخفض حجم المعروض من السلع والمواد الخام المستوردة في السوق.
وده كان السبب في ظهور السوق السودة من تاني، َوسعر الدولار فيها أعلى بنسبة 20 إلى 30% عن السعر الرسمي في البنوك.
والاخطر بقى ان قدرتنا للحصول على تمويل من بره قلت كتير عن الاول، خصوصا ان حكومات الخليج في الاول ما كانش عندها مشكله تديك قروض، لكن دلوقتي غيروا اتجاههم وعاوزين يدخلوا كاستثمار مباشر في البلد.
والاستثمار المباشر معناه انه يجي يشتغل في مصر سواء بقى هيفتح شركه جديده من بابها او هياخد شركه موجوده بالفعل ويشغلها هو.
وده ياخدنا لاهم سؤال محتاجين اجابته: ايه المطلوب عشان ما نلبسش تاني في خيارات مؤلمة؟التقرير ذكر نقط واضحه جدا وهي اعتماد سعر صرف اكتر مرونة، وتقليل النفقات، وسرعة خصخصة اصول الدولة.
لو نفذنا الخطوات دي بسرعه هتزيد تدفقات الدولار على المدى القريب، بس على المدى الطويل احنا محتاجين نكسب ثقه المستثمرين عن طريق تشجيع الصادرات وتحسين اجراءات السوق.بس خد بالك الدنيا مش سهلة اوي كده لان مخاطر تنفيذها عالية، وبيع الأصول فيه مشكلة بسبب ظروف السوق.
وللاسف ده خلي البنك الامريكي ميستبعدش انخفاض جديد في قيمة الجنيه مع ارتفاع الأسعار وزيادة التضخم، وطبعا ده هيزعلنا كلنا.
فهل تعتقدوا الحكومة هتقدر تلحق الأمور قبل ماتتازم اكتر؟ ولا البنك الامريكي هو اللي متشائم؟
