بشرى سارة للمصريين مبادرة جديدة من الرئيس عبد الفتاح السيسي لمواجهة ارتفاع أسعار المواد الغذائية، خاصة مع ارتفاع معدل التضخم في مصر.
اعرف ازاي تحصل على السلع ضمن المبادرة دي؟، وياترى إيه الشروط المطلوبة والفئات المستحقة ليها اللي اتكلم عنها الرئيس، تابع الفيديو ده وانت تعرف كل التفاصيل:
الرئيس عبد الفتاح السيسي أعلن عن مبادرة اجتماعية لكل المصريين أسمها “كتف في كتف”، وده هدفها الأول مواجهة ارتفاع أسعار المواد الغذائية
الرئيس كمان اتكلم عن المبادرة دي واللي أطلقها من ستاد القاهرة الدولي، وقال إنها بتستهدف المساهمة في تخفيف غلاء الأسعار اللي حصلت نتيجة الأزمة الكبيرة التي يمر بها العالم كله ومنهم ومصر كمان”.
وقال الرئيس إن كل الناس اللي حضرت بتمثل المصريين باختلاف طبقاتهم، وشريحة من كل المجتمع المصري، سواء من رجال أعمال وقطاع خاص ورجال دولة واللي بيقوموا بدور جميل في وقت صعب”.
ده مش بس كدة ده كمان الرئيس السيسي أكد إن المبادرة هتساهم في التخفيف على المواطنين، من خلال توزيع 6 ملايين صندوق مواد غذائية.
وكانت الاحتفالية دي تعتبر تتويج لجهود 300 ألف متطوع شاركوا خلال الأيام اللي فاتت في تعبئة المواد الغذائية، عشان يوزعوها ضمن المبادرة على 20 مليون شخص في كل محافظات مصر.
وكانت صورة الرئيس السيسي بتتوزع مع عدد من المتطوعين وممثلي المبادرة .. كصورة تذكارية
طيب ياترى إيه هو الهدف من المبادرة دي؟هقولك يا سيدي المبادرة في الأصل بتستهدف دعم الفئات الأولى بالرعاية والأكثر استحقاقا، وده عشان الدولة تخفف العبء عنهم في ظل الأزمة الاقتصادية اللي موجودة دلوقتي.
وبدأ المبادرة دي التحالف الوطني للعمل الأهلي في المحافظات الحدودية.ولو بتسأل عن تفاصيل المبادرة فـ حسب تصريحات عضو حزب التحالف الوطني للعمل الأهلي في مصر محمود الجارحي قال إن التجهيز لإطلاق مبادرة “كتف في كتف” أخد حوالي عدة أسابيع:
وإن الهدف الرئيسي من المبادرة هو توزيع 6 مليون صندوق مواد غذائية قبل شهر رمضان على الأسر الأولى بالرعاية، أو الأكثر استحقاقا، وده بيكون بمشاركة كل المؤسسات تحت مظلة التحالف.
مش بس كدة ده كمان أكد إن المبادرة بدأت بشكل تجريبي في 16 محافظة كـ”بروفة أولية” وده قبل ما تنطلق بشكل رسمي ويتم توزيع كتير من صناديق الغذاء على المستحقين.
الجميل بقا إنه أكد كمان إنه من النهارده هتبدأ تتحرك عربيات مليانة بصناديق المواد الغذائية وده بعد ما خلصوا كل استعداداتهم عشان توصل في المحافظات المصرية، وده طبعا عشان يقدروا يوصلوا للمستحقين وفق لـ قاعدة بيانات عملها التحالف الوطني وجهزها من فترة .
وخلي بالك الموضوع ده مكنش عادي كدة لأ ده كان في تنسيق كامل بين المؤسسات واللي قدروا بالتعاون ده يعملوا قاعدة بيانات دقيقة جدا عن الأسر الأكثر احتياجا في مصر.
طيب يا ترى إيه هي محتويات الصندوق ده ؟
هقولك يا سيدي الصندوق ده في كل حاجة ممكن تحتاجها الأسرة المصرية من سلع أساسية بيتم استخدامها بشكل يومي على مائدة الإفطار في شهر رمضان الكريم.
قولنا رأيك في جهود الدولة لدعم الفئات الأكثر احتياجا وإيه رأيك في مبادرة كتف فـ كتف؟
