كل عملاء البنوك الذين كانوا منتظرين الفترة الماضية شهادة ادخار جديدة بفائدة، اليوم هذا التقرير من أجلهم، حيث سنزف خبر أن إن بنك ناصر أعلن عن طرح حزمة من شهادات الادخار الجديدة بأسعار فائدة مرتفعة يصل لـ22%
طيب ياترى إيه مميزات الشهادات دي، وليه تم الإعلان عنها في التوقيت ده بالذات؟، وهل كل الناس تقدر تشتريها؟، خليكم معانا في الفيديو ده واحنا نقولكم كل التفاصيل:
النهاردة بنك ناصر الاجتماعي، التابع لوزارة التضامن الاجتماعي أعلن طرح حزمة من شهادات الادخار الجديدة بأسعار فائدة مرتفعة يصل لـ22%.
والبنك قال إن آجال كل شهادة هيكون مختلف وكمان دورية صرف العائد، طيب الكلام ده معناه إيه؟ و ياترى الشهادات دي لكل الناس؟
هقولك ياسيدي، البنك أعلن خلال موقعه الإلكتروني إن الشهادات دي هتكون للأفراد وكبار السن والمؤسسات بأسعار فايدة هي الأعلى على مستوى البنوك حاليا ، ده غير إن دوريات الصرف هتكون مرنة.
فمثلا حدد بنك ناصر الاجتماعي أسعار الفايدة على الشهادات الجديدة بالشكل ده، في الأول عندك شهادة ثلاثية تراكمية ودي بتكون للأفراد و سعر الفايدة عليها 22% و يصرف العائد في نهاية المدة.
كمان عندك شهادة السنة ونص ودي بردو بتكون للأفراد ونسبة الفايدة عليها بتكون 20% ويصرف العائد في نهاية الإستحقاق، وده مش كلامنا ده الكلام اللي أعلنه البنك على موقعه الإلكتروني على الإنترنت.
عندك كمان الشهادة الثلاثية واسمها رد الجميل ودي بتكون مخصصة لكبار السن اللي عمرهم من 60 عامًا فيما فوق: وسعر الفايدة فيها بيكون 17.75% ويصرف العائد شهريًا، أو تختار الفايدة 19.25% ووقتها العائد بيصرف سنويا وتقدر تشتريها من أول ألف جنيه.
مش بس كدة ده كمان بنك ناصر أعلن إنه بيتيح شهادة تانيه لرد الجميل لكبار السن ودي بتكون بأجل سنة واحدة بسعر فائدة 11.75% للعائد الشهري، و12.95% يتصرف في نهاية استحقاق الشهادة.
والمفاجأة كمان إن بنك ناصر أصدر شهادة ادخار ممكن الاستثمار فيها لمدة سنتين ودي بيوصل فيها العائد لـ 13% سنويا، وكمان شهادة ادخار جديدة لمدة سنة بعائد سنوى 12%، وده بالتعاون مع وزارة التضامن.
وكل الاختيارات دي ممكن تختار منها اللي يناسبك من العائد أو دوريات الصرف
الجميل بقا إن بنك ناصر الاجتماعي حدد أسعار الفايدة على الشهادة الثلاثية لـ الأفراد: وبيكون سعر الفائدة السنوي 17.5% وبيتصرف بشكل شهري ، و17.75% يصرف ربع سنوي، أو تختار عائد 19% تقدر تصرفه سنويا وهتقدر تشتري الشهادة دي من أول ألف جنيه.
وكمان خد بالك بنك ناصر الاجتماعي حدد أسعار الفائدة على الشهادة الثلاثية للمؤسسات: ووصل سعر العائد السنوي عليها 14.5% وتقدر تصرفه سنويا.
طيب ليه البنك طرح الشهادات دي دلوقتي ومين اللي هيستفاد منها ؟
بص ياسيدي اللي بيستفيدوا من الشهادات دي هما الناس اللي عايزة تحوش فلوسها وتحافظ عليها من خطر التضخم أو الناس اللي انتهى أجل الشهادات اللي بيستثمروا فيها وحابين يجددوها تاني بس بفايدة أعلى، زي أصحاب شهادة الـ18% واللي كلها أيام وتنتهي ويقبضوا فلوسهم.
وخلي بالك لو انت مقدم على شهادة فـ انت من حقك تكسرها بشرط يكون عدى عليها 6 شهور من تاريخ شرائها وتقدر بفلوسك تستثمر في شهادة مختلفة أو تختار عائد أعلى.
كمان خبراء الاقتصاد متوقعين الفترة الجاية إصدار شهادات بعائد 30 وده عشان تسحب السيولة من السوق وتواجه التضخم اللي سجل معدل سنوي 40,3 % خلال شهر فبراير اللي فات.
دلوقتي قولولنا رأيكم في الشهادة الجديدة من بنك ناصر وهل تتوقعوا نسمع عن شهادات تانيه قريب؟
