لو فاتتك فرصة التقديم على شهادات الـ25% من البنك الأهلي ومصر وتريد أن تستثمر فلوسك في شهادة مضمونة ، فالبنك المركزي يحضر لكم مفاجأة، وهذا لأنه يطرح منتجات استثمار بعائد أعلى من الشهادات وستضمن لك أن تحافظ على فلوسك من شبح التضخم.
بعد ما أعلن البنك الأهلى ومصر وقف شهادات الادخار الـ 25% و 22.5% ناس كتير بدأت تسأل ياترى إيه بديل الشهادات دي، خاصة وإن كل الناس عايزة تحافظ على فلوسها مع ارتفاع الأسعار ومعدلات التضخم.
طب هو فعلًا في بديل للشهادات دي ؟هقولك ياسيدي بديل شهادات 25% هيكون أذون الخزانة واللي بيطرحها البنك المركزى بالنيابة عن وزارة المالية .
والمفاجأة بقى إن آخر اعلان من البنك المركزي عن إذون الخزانة كانت الفايدة 26%، يعني أكتر من الشهادات بكتير واللي أخرها كانت شهادة البنك الأهلي ومصر بعائد 25% بس.
طيب ياترى إيه الفرق بين الشهادات وإذون الخزانة؟هما الاتنين بيعتبروا أدوات ادخار لكن الفرق ما بينهم كبير.
فـ عندك مثلا أذون الخزانة بتعتبر أداة دَين حكومية بتصدرها الدولة بمدة تتراوح بين ثلاثة شهور ولحد سنة، وبكدة بتعتبر استثمار قصير الأجل يعني لمدة مش طويلة.
رغم إنه بيكون العائد بتاع أذون الخزانة كبير، لكن بردو مش هنقدر ننكر إن شهادات الادخار بتنافس الأذون بقوة وده لأن العائد بتاعها الفترة اللي فاتت بدأ يزيد ويوصل لـ25% .
ولازم تعرف إن سواء اختارت تشتري أذون الخزانة أو شهادات فـ الاتنين أرباحهم كويسه ومضمونة لكن أذون الخزانة بتكون مضمونة أكتر و بتكون متاحة للمواطنين العادين والمستثمرين لكن أغلب اللي بيقدم عليها بتكون المؤسسات المالية الكبيرة زي البنوك وده لأنها مش معروفة أوي بين الناس زي الشهادات الادخارية.
لكن الأكيد إنه الاستثمار في أذون الخزانة ليه شروط مختلفه عن شهادات الادخار، زي معاد صرف العائد، والحد الأدنى لشراء الشهادة، بس الأكيد إن الاتنين بيدول أعلى عائد للاستثمار بدون أي مخاطرة على فلوسك بمعني إن لو سعر الفايدة حصل فيه أي تذبذبب انت مش هتتأثر ولا هيكون ليك علاقة وبردو هتاخد أرباحك.
ما الفرق بين مدة الشهادة وأذون الخزانة؟
هقولك ياسيدي الشهادات بـ تتراوح مدتها ما بين سنة و3 سنين و5 سنين و7 سنين ولكن أفضلهم و اللي بتدي أكبر عائد وتعتبر الأكثر مبيعاً هي الشهادات اللي بتكون مدتها 3 سنين.
أما بقى أذون الخزانة فـ بيتراوح مدتها ما بين 3 شهور، و6 شهور و9 شهور وسنة وبتختلف بينهم نسبة الفائدة بشكل بسيط بمعنى إنه كل ما تزيد في المدة هتزيد معاك الفايدة بالتدريج.
لكن لو بتسأل عن فرض الضرائب ففي هنا فرق كبير، وده لأن شهادات الادخار العائد بتاعها بيكون من غير فرض ضرائب.
لكن لو اشتريت أذون الخزانة خلي بالك إن العائد بتاعها بيكون عليه ضرايب بنسبة بنسبة 20% للأفراد العاديين أما لو اللي مقدم عليها من المستثمرين العرب بتكون نسبة الضرايب 15% وللأجانب 10%.
دلوقتي بعد ما عرفتوا الفرق ما بين الاتنين قولولنا هتختاروا الشهادات ولا أذون الخزانة؟
