” غليت بسبب الدولار” كام مرة سمعت هذه الجملة وأنت تسأل عن سعر أي شئ قبل شرائه الذي تتفاجئ بارتفاع سعره أضعاف ثمنه والمبرر دائما يكون ارتفاع سعر الدولار.
بس السؤال هنا: هي أزمة الدولار هتتحل أمتى؟ وهل فعلا بدأت تتحل؟ والحكومة بتعمل إيه عشان تحتوي الأزمة؟ وإيه هو البرنامج اللي الحكومة ماشية عليه عشان تحلها؟
مصر عانت خلال الفترة الأخيرة من أزمة نقص العملة اللي اشتكى منها قطاعات كتير زي السيارات و المستوردين وغيرهم من القطاعات التانية
الأزمة دي سببت ارتفاع كبير في الأسعار وصلت للضعف تقريبا وده خلى ناس كتير هو الوضع ده هيفضل لأمتى؟بس بحسب موقع العربية، الحكومة شغالة لحل الأزمة دي من خلال 6 محاور.
6 محاور لحل أزمة الدولار
بص يا سيدي المحور الأول هو برنامج الطروحات الحكومية اللي أعلنت عنه الحكومة من شهور وبدأت في تنفيذه خلال الأيام الأخيرة من خلال بيع شركة المصرية للاتصالات.
وبحسب تصريحات وزير المالية محمد معيط إن الهدف من البرنامج ده هو فتح طرق للاستثمارات الأجنبية، وقال كمان إننا بنستهدف جمع 2 مليار دولار قبل نهاية يونيو الجاري من برنامج الطروحات.
وإن الاقتصاد المصري جذب استثمارات أجنبية كبيرة خلال النص الأول من العام المالي والهدف من الإجراءات والإصلاحات اللي بتم هو عودة الاقتصاد المصري للنمو القوي و المستدام.
ما هو برنامج الطروحات الحكومية؟
أنا أقولك البرنامج ده أعلن عنه رئيس مجلس الوزراء من فترة وبيشمل طرح 32 شركة في البورصة أو لمستثمرين استراتيجين وده عشان نجذب استثمارات أكبر ونقدر نزود حجم مصادرنا من العملة الأجنبية.
أما المحور التاني فهو خاص بقطاع السياحة وبحسب العربية صندوق النقد الدولي توقع أن ترتفع إيرادات مصر من السياحة خلال الـ 5 سنين الجاية بشكل تدريجي لحد ما توصل لأكتر من 28 مليار دولار في 2028، وبكده هتزيد بنسبة 155% بالنسبة للإيرادات المتوقعة خلال العام المالي الجاري.
وقال كمان إنه من المتوقع ارتفاع إيرادات السياحة السنة دي لأكتر من 14 مليار جنيه وهتواصل الارتفاع في 2024 وهتسجل أكتر من 18 مليار دولار.
وهو ده الرقم اللي اتكلمت عنه مجموعه سيتي جروب وقالت في تقريرها ان البنك المركزي مش هياخد قرار بخفض الجنيه من عدمه دلوقتي وهيستنى وصول إيرادات السياحة بقيمة 14 مليار دولار، وبعدها يبدأ يشوف محتاجين تعويم جديد ولا لأ.
وكمان صندوق النقد توقع ارتفاع إيرادات السياحة أكتر في 2025 وهتوصل لأكتر من 22 مليار جنيه وهتوصل لـ 26 ونص مليار دولار في 2026 وهتوصل في 2028 لـ 28 مليار دولار، أما المحور التالت فهو محور أساسي في اعتمادنا على العملة الصعبة وده لأنه مرتبط بالاستثمار الأجنبي المباشر.
اللي بحسب بيانات البنك المركزي ارتفع حجم الاستثمارات دي بنسبة 72.7% وبكده وصلت قيمتها لأكتر من 5 مليار دولار وده رقم كبير بالنسبة لحجم الاستثمارات السنة اللي فاتت اللي كانت 3 مليار دولار.
وبحسب موقع العربية تحويلات المصريين في الخارج ارتفعت لأكتر من 27 مليار دولار في 2020 وواصلت الارتفاع لـ 31 مليار دولار 2022 لكن اتراجعت خلال 2023 لـ 12 مليار دولار، لكن رغم تراجعها إلا أن تحويلات المصريين من المحاور اللي بنعتمد عليها في توريد العملة الصعبة.
ده كمان الصادرات ارتفعت بشكل كبير جدا خلال 2022 وحققت رقم قياسي ووصلت لـ 51 مليار دولار وده رقم تاريخي محققنهوش قبل كده.
أما أخر محور فهو إيرادات قناة السويس اللي ارتفعت ايراداتها خلال 2022 لـ 7 مليار دولار وحققت خلال النص الأول من العام الحالي لـ 4 مليار دولار.
بس على الناحية التانية سبق وتوقعت ستاندرد أند بورز ارتفاع سعر الدولار عشان يسجل 40 جنيه بنهاية يونيو الجاري.
ودلوقتي بقى شاركونا بتوقعاتكم لسعر الدولار في الفترة الجاية، وقوللنا شايفين الحكومة هتفوز في رهانها على صمود الجنيه؟
