30 أم 35، لماذا لا يصل إلى 40؟ تعيش مصر خلال هذه الأيام في دوامة وكلمة السر بها هي التوقعات لسعر الدولار، ولكن فاجئ بنك امريكي الجميع بتصريح أن تسعير الجنيه أقل من قيمته وسعر الدولار مبالغ فيه، لكن في نفس الوقت حذر الحكومة من القادم، فماذا قال عن الدولار والفايدة؟ هذا ما نتعرف عليه من خلال التقرير التالي:
في أحدث تقرير ليه، بنك جولد مان ساكس الأمريكي كشف عن القيمة الحقيقية للجنيه وحسب رصده ، الدولار دلوقتي في السوق الموازي مسجل 36 جنيه وده سعر مبالغ فيه، طيب ليه؟
ببساطة لان الدولار ناقص من السوق بسبب حاجتين الأولى هي خروج رؤوس الأموال من بعد الأزمة الروسية والاوكرانية، وده يأكده كلام محمد معيط وزير المالية لما قال إن مصر خرج منها 22 مليار دولار خلال شهور معدودة.
وتاني سبب هو عجز ميزان المدفوعات وده المقصود بيه الفرق بين تعاملات مصر التجارية مع العالم الخارجي، وببساطة اكتر طالما في عجز يبقى الفلوس اللي طالعة من البلد اكتر من الفلوس اللي بتدخلها، وهنا بيحصل النقص في العملة الصعبة.
ضيف على كده كمان حالة الترقب في السوق، كل ده خلي الجنيه يتداول بأقل من قيمته الحقيقة وبنسبة 33% تحت ضغط شح الدولار.
طيب هل الوضع دا هيستمر ولا ليه نهاية؟
من وجهة نظر البنك، الجنيه مش هيفضل في الحالة دي دايما خصوصا مع استلام قرض صندوق النقد، لكن ده ميمنعش ان الدولة لو متحركتش في احتمال اننا ندخل دوامة تخفيض قيمة العملة والتضخم.
عشان كده حذر وقال إن استمرار تذبذب سعر الصرف في مصر هيقلل الثقة في السوق وساعتها الاستثمار المحلي والأجنبي الاتنين نسبتهم هتقل.
فمن ناحية المصانع والتجار في مصر مش عارفين يشتروا واردات عشان يشتغلوا ومن ناحية تانية الاستثمار الأجنبي المباشر مش هيبقى مطمن على فلوسه ولا أرباحه، ولو ده حصل هيقل دخل البلد من العملة الصعبة.
طيب إيه الحل؟
جولدمان ساكس بيطالب بإلغاء كل القيود على الاستيراد، وده عشان متتعارضش مع طلبات صندوق النقد الدولي.
كمان بيتوقع مرونة اكتر في سعر الصرف خلال أيام، وبطريقة ابسط في تخفيض جاي في قيمة الجنيه لكن مش هيوصل للسعر في السوق الموازي، لأن دا لو حصل معناه ارتفاع أكبر في الأسعار.
ولو بتقول لنفسك إيه المشكلة ما كده كده التجار بيسعروا السلعة على اساس قيمة الدولار في السوق الموازية هقولك عندك حق بس في حاجة غايبة عنك:
أسعار السلع الاستراتيجية زي القمح والوقود بتتحدد حسب سعر الدولار بالسوق الرسمي، لان الحكومة هي اللي بتشتريها، فلو سعر الدولار في البنوك دول كمان هيزيدوا.
وبالمناسبة البنك الأمريكي توقع رفع سعر الفايدة بحوالي 1% في اجتماعه الجاي عشان يقلل معدل التضخم، ودا أقل من توقعات تانية بتتكلم عن رفع الفايدة بنسبة 2%
انتوا بقي شايفين البنك المركزي هيوصل سعر الدولار لكام؟ وهل تخفيض قيمة الجنيه رسميا هيقضي على السوق السودا ولا المضاربة على الدولار هتفضل مكملة؟
