الحق نفسك جنون الدهب مازال في أوله، وبنك عالمي يتوقع وصوله إلى 3 آلاف دولار.. وشعبة الدهب في مصر أصدرت تحذير عاجل لكل المصريين.
فياتري ايه اللي بيحصل في السوق؟ وليه سعر الدهب في مصر منزلش رغم تراجع سعر الدولار في السوق السودة؟ وإيه العلاقة بين الاتنين أصلا؟
قبل أي حاجة لازم تعرف ان سعر الدهب في مصر بيتحدد على اساس 3 حاجات : السعر في البورصة العالمية، وسعر الدولار أمام الجنيه، وحجم العرض والطلب.
بس خد بالك سعر الجنيه امام الدولار مش المقصود بيه السعر الرسمي في البنك، لا خالص، احنا هنا بنتكلم عن سعر الدولار في السوق الموازية.
وده مع تلاعب عدد من التجار كان السبب في ارتفاع سعر الدهب في مصر عن السعر العالمي في الشهور اللي فاتت حسب سعيد امبابي، ريس شركة آي صاغة لتدوال الذهب والمجوهرات.
عشان كده لما هبط سعر الدولار في السوق السوداء من 38 إلى 36 جنيه حسب مصادر من شركات الصرافة، الكل كان مستنيه تراجع سعر الدهب، لكن ده ما حصلش فيا ترى ليه؟
نادي نجيب سكرتير عام شعبة الدهب السابق بغرفة القاهرة التجارية، قال إن الهبوط اللي حصل في سعر الدولار مكنش كبير اوي عشان ينزل من سعر الدهب.
وعلى الناحية التانية، سعر الدهب عالميا في ارتفاع، وسعر الأوقية الواحدة معدي 2000 دولار، عشان كده سعر الجرام الواحد في مصر بيسجل اكتر من 2200 جنيه لعيار 21 الأكثر مبيعا في مصر.
وهنا بقى بيجي السؤال المهم: ايه المتوقع لاسعار الدهب الفتره الجايه؟ وهل احنا داخلين على انخفاض ولا ارتفاع؟
كتير من البنوك العالميه بتأكد ارتفاع الدهب الفتره الجايه وآخرهم مصرف ساكسو بنك الدنماركي، واللي توقع وصول أسعار أوقية الدهب إلى مستوى 3 آلاف دولار لأول مرة في تاريخه.
وطبعا ده رقم كبير جدا يخلي اي حد فينا يسأل ليه؟
السبب الاول زياده اقبال البنوك المركزية على شراء الدهب باعتباره ملاذ أمن وقت الأزمات وارتفاع معدلات التضخم.والسبب التاني هو اتجاه الفيدرالي الأمريكي إلى التخفيف من معدلات رفع الفايدة، وده بيقلل من مكاسب الاستثمار في الدولار، ويدفع المستثمرين لشراء الدهب فيرفع سعره برضه.
وده ياخدنا بقى للتحذير العاجل اللي طلعته شعبة الدهب في الساعات الأخيرة، فياتري ايه حكايته ؟
بص يا سيدي، مع جنون اسعار الذهب انتشرت اعلانات عن بيعه باسعار مصنعيه قليله جدا متعديش 30 جنيه في الجرام عيار 18.
والشعبة بتقولك استحالة تلاقي شغل نضيف ومضمون وورقه سليم بمصنعية 30 جنيه، لأن الاسعار الحقيقية في السوق أضعاف الرقم ده.
كمان متسمعش لأي حد بيقولك احنا كيان رسمي لتجار الدهب، لأن الجهة الوحيدة المعتمدة من الدولة هي شعبة الدهب بالاتحاد العام للغرف التجارية وفروعها بالمحافظات.
ودلوقتي بقى قولنا لو معاك قرشين هتشتري بيهم دهب؟ وهل سبق واتعاملت مع الإعلانات اللي بتعرض البيع بسعر بمصنعية أقل من السوق بكتير؟
