هل يصل ل 24 جنيه! هل مصيره سيكون مثل الذهب وينخفض الفترة القادمة؟وما حكاية حملات المقاطعة التي قام بها التجار؟ وهما فعلا هيوقفوا الإستيراد؟ والدولار في السوق السودا وصل لكام انهاردة؟
أسعار الدولار الفترة الاخيرة كانت مستقرة ومزادتش ولا جنيه في البنوك لكن السؤال هنا هل اسعاره هتفضل مستقرة وايه مصيره الأيام اللي جاية
بحسب تصريحات محرم هلال رئيس اتحاد المستثمرين في برنامج يحدث في مصر، قال ان قيمة الدولار اقل من قيمته الحقيقية بحوالي 10% وان السعر الحقيقي ليه هو 24 جنيه بس.
لكن سعره دلوقتي في البنك المركزي وصل ل30 جنيه و في السوق السودا ل 41 جنيه، وقال أن ده بيمثل عبئ كبير جدا على المستثمرين و إن دي أهم مشكلة بتواجه الاقتصاد دلوقتي.
هل الحكومة تتحرك لحل أزمة الدولار؟
محرم كمل وقال إن الحكومة بتتحرك عشان تحل الازمة و ده من خلال برنامج الطروحات الحكومية وان البرنامج ده هيحل الازمة على المدى المتوسط والقريب والبعيد.
ده كمان قال أن الدولة بتسدد ديونها بشكل منتظم وانها عندها خطة عشان تجذب المستثمرين بصورة أكبر، ولما أتسال هل الدولار هيرجع أقل من 30 جنيه و لا ممكن يزيد تاني؟
محرم هلال قال أن الدولار والله هيرجع أقل من 30 جنيه وده وضعه الطبيعي اصلا وده بحسب اللي نشره موقع الشروق
وده هيحصل في حالة جذب مستثمرين جداد من خلال التسهيلات اللي اقرها الرئيس عبد الفتاح السيسي لضخ استثمارات جديدة
وعلى فكرة التجار مسكتوش دول عملوا حملات ومبادرات عشان يخفضوا سعر الدولار، زي تجار السيارات اللي عملوا حملة مقاطعة لمنع شرا الدولار من السوق السودا ومنع التعامل بالعملة الصعبة لمدة شهر من شهر مايو ليونيو
كمان شعبة المحاجر عملت مبادرة لمنع إستيراد الرخام لمدة شهر عشان يقللوا الضغط على الدولار
وده خلى عدد كبير من تجار في قطاعات تانية قالوا انهم هينضموا لحملات المقاطعة دي وده بحسب اللي نشره موقع الشروق
وإن كل قطاع بيدرس مدى تحمله لمنع الإستيراد لمدة شهر من غير بضايع جديدة، طيب يا ترى هل حملات المقاطعة أثرت على سعر الدولار.
وبحسب اللي نشره موقع الشروق خبراء اقتصاد قالوا إن حملات المقاطعة للسوق السودا أثرت فعلا على سعره ووصل ل 37 جنيه بعد ما كان بأكتر من 41 جنيه، وكملوا وقالوا انه لسه هينزل ل35 جنيه لكن ده انخفاض مؤقت وممكن يرتفع تاني
طيب السؤال هنا ايه وضع الدولار في السوق انهاردة؟
بحسب اللي نشره موقع المصري اليوم سعر الدولار وصل انهاردة في البنك المركزي ل30جنيه و 83 قرش، أما سعر الدولار في السوق السودا اتراجع خلال الايام الاخيرة وصل ما بين 37 و 38 جنيه وده بعد ما كان ب 42 جنيه بحسب اللي نشره موقع العربية.
دلوقتي قولنا رايك شايف ان الدولار ممكن يوصل لأقل من 30 جنيه؟
