يبدو أن عام 2023 هتكون سنة الخير على المصريين وكلها مسألة وقت وسننتهي من أزمة الدولار، وهذا بعد ما قررت أكثر من من دولة أن تستغنى عن الدولار في معاملاتها التجارية مع مصر.
والنهاردة تركيا قدمت عرض ميتفوتش للحكومة المصرية هيدعم الجنيه ويخفف من ضغط الدولار عليه وكمان هيأثر على حجم الاستثمارات المصرية التركية
فيا ترى إيه هو العرض ده؟ وهل ممكن التبادل التجاري بين أنقرة ومصر يكون بالجنيه؟تركيا قررت تدعم الحكومة المصرية في التبادل التجاري وأعلنت إنها موافقة إن التجارة تكون بالعملات المحلية والكلام ده اتقال خلال زيارة لوفد رسمي للقاهرة .
وده اللي أكده نهاد أكينجي رئيس ، رئيس مجلس إدارة جمعية رجال الأعمال المصريين الأتراك على هامش حفل إفطار الجمعية، والي كان بمناسبة مرور 20 سنة على تأسيسها.
وقال أكينجي إن أعضاء الجمعية طلبوا من وزير الخارجية التركي، مولود تشاووش أوغلو، خلال زيارته لـ مصر الشهر اللي فات إنه يدرس طلب التبادل التجاري بين البلدين بالعملات المحلية، من خلال وزارة المالية في أنقرة.
وقال إن أوغلو كان مهتم أوي بالموضوع ده خاصة إن تركيا بتسعي لتطبيق التجارة بينها وبين مصر بالعملات على مستوى التبادل التجاري بين شركات القطاع الخاص، لكن الكلام ده مش هيكون في المعاملات الحكومية
وإن الهدف من الحركة دي هو تخفيف ضغط قلة توفر الدولار في مصر واللي بيأثر بالسلب على الاستثمارات”.ده كمان اتكلم وقال إنه في حالة لو فتحنا التجارة بين البلدين بالعملات المحلية، بمعني إنه تستورد مصر من تركيا وتدفع بالجنيه، وتستورد تركيا من مصر وتدفع بالليرة، هنقضي على صعوبة كبيرة في طريق الاستثمار حاليا”.
والمفروض إنهم يعرضوا الموضوع ده على الحكومة المصرية خلال زيارة للقاهرة قريب اوي”، وقال إن الموضوع ده مهم جدا وهيساعد في زيادة الاستثمارات التركية في مصر”.
الجميل بقا إن تركيا مش أول بلد تفكر وتقرر إنها تستغني عن الدولار في تعاملاتها مع مصروفعلا بدأنا نتعامل مع روسيا بالروبل ودلوقتي بندرس التعامل بالروبية واليوان في التبادل التجاري مع الهند والصين، عشان نقلل الطلب على الدولار ونزود التبادل التجاري بينا وبينهم.
وفي تعليق على اللي بيحصل ده قالت رانيا يعقوب، خبيرة أسواق المال، إن مصر بدأت تمشي على نهج جديد وهو تنويع سلة العملات اللي عندها في ظل اختلاف الميزان التجاري و صادرات وواردات كل دولة، وإن ده حصل بسبب أزمة سلاسل الإمدادات، وتعطل كثير من المنتجات.
دي كمان أكدت ،في تصريحات لـ القاهرة 24، أن مصر مش هتتخى عن الدولار، لكن هي بتمشي ورا الاجراءات اللي في دول كتير بتعملها في العالم عشان تخفف من ضغط الدولار وتحقق الاستفادة في عملية الاستيراد بأقل تكلفة ممكنة.
أما محمد الفيومي رئيس غرفة التجارة في القليوبية فكان شايف إن الفكرة دي لو اتنفذت صح ، التبادل الاقتصادي هيزيد بين وبين دول كتير، والاهم من ده كله هيقلل الطلب على الدولار ويرحم الجنيه من الانخفاض المستمر
فهل تتوقعوا ان سياسة مصر دي تخفف الضغط على الجنيه فعلا ؟
