في البدايه دعنا نتفق ان فيه ناس حولت فلوسها إلى دولارات وتحتفظ بها في البيت لأنها ترى ان هذا افضل استثمار لها من كل الاختيارات الثانيه الموجوده في السوق.
لكن دلوقتي الوضع اختلف لأن البنك الاهلي وبنك مصر أعلنوا عن شهادات دولارية جديدة بفايدة مرتفع والسؤال بقى:
الناس اللي شايلة الدولارات في البيوت لو حبت تقدم على الشهادات الجديده هتقدر؟ ولا البنوك هتقول لها من اين لك هذا كده هكون وبكده هيكونوا وقعوا نفسهم في مشكله أكبر؟
هو ده السر في جملة “لو معاك مليار دولار روح البنك حالا” فتعالوا نعرف ايه الحكايه
خلال الساعات الاخيره الكل ملوش سيره غير الشهادات الجديده اللي طرحها البنك الاهلي بفايدة توصل إلى 7% سنويا لما تصرف العائد بالدولار، او 9% سنويا لو هتاخد العائد مقدما بس تاخده بالجنيه المصري وبقيمة 27% من قيمة الشهادة.
ودلوقتي في ناس معاها دولارات وبتشاور عقلها تحط فلوسها في البنك ولا لأ خصوصا انهم خايفين البنك يسألهم من اين لك هذا؟
واللي مخوفهم اكتر ان البنوك الفتره اللي فاتت كانت مشدده أوي على تحصيل الدولارات من المواطنين وخصوصا التجار.لكن الجديد بقى ان البنك الاهلي بيقول لك متقلقش، ايوه يا سيدي ما تقلقش، والكلام ده على لسان مين؟
يحيى ابو الفتوح نائب رئيس مجلس ادارة البنك الأهلي، بس ازاي؟
بصي يا سيدي، حسب موقع القاهرة 24, يحيى ابو الفتوح قال ان في عملاء محتفظين بالعمله الاجنبيه في بيوتهم عشان كده تم طرح شهادات دولاريه بعائد عالي، وده عشان نجذب العملاء دول ونخليهم يحطوا العمله الاجنبيه إلى معاهم.
وعلى فكره البنك الاهلي ما بيقولش كلام مرسل كده، لأن يحيى أبو الفتوح اتكلم بالأرقام وقال إن فيه اكتر 4 مليار دولار خارج القطاع المصرفي
عشان كده يا سيدي الشهادات الإدخارية الجديده بالدولار متاحه لكل المصريين بره وجوه البلد والبنك مش هيسألك عن طريقه حصولك على الدولارات دي.
وبصراحة كده يحيى أبو الفتوح قال مع احمد موسى «لو معاك مليار دولار ادخل البنك واعمل الشهادة ومحدش هيقولك أنت جايب الفلوس منين».
دلوقتي بقى تعالى نشوف ايه تفاصيل الشهادات الجديدة، وهما نوعين:
النوع الاول شهادات مدتها 3 سنين والفايدة عليها 7٪ ، لو هتصرف العائد بالدولار كل 3 شهور، يعني العائد عليها ربع سنوي.وموجوده في البنك الاهلي باسم شهاده “الاهلي بلس” وفي بنك مصر باسم شهادة “ايليت”.
وفي النوع ده من حقك تقترض بضمان الشهادة لغاية 50% من قيمتها بالجنيه المصري بس الاقتراض هيكون لأغراض استثمارية وبحد أقصى 10 مليون جنيه.
أما النوع التاني من الشهادة الدولارية فهو شهادة مدتها 3 سنوات برضه بسعر عائد سنوي 9%. بس الفرق انك بتصرف العائد مقدما بالجنيه المصري عن الفترة كلها بقيمة 27% من قيمة الشهادة عن إجمالي المدة.
وبرده موجوده في البنك الاهلي باسم شهاده الاهلي فورا وفي بنك مصر باسم شهادة القمة، والمشترك في الأربع شهادات من البنك الاهلي أو بنك مصر امن لازم تشتريهم بالدولار وبحد أدنى 1000 دولار امريكي.
وطبعا في نهايه ال3 سنين هتستلم قيمه المبلغ الاصلي اللي دفعته لشراء الشهاده بالدولار سواء كنا بنتكلم على شهاده ال7% أو ال9%.
ودلوقتي بقى قولنا هل شايف انه بعد تصريح نائب رئيس البنك الاهلي عن الشهادات الدولاريه الناس هتتشجع تحط فلوسها في البنوك؟
