ماذا يحدث في سوق السجائر؟ وماذا فعلت الحكومة مؤخرا لحل تلك الأزمة وجعل التجار يضربون كفا على كف وإيه اللي عملته الحكومة اليومين دول خلى التجار يضربوا كف على كف!
كل اللي مخزن سجاير خليه يشربها!اعرف ليه سعر العلبة هينزل النص؟ وإزاي الأسعار بدأت تاني تستقر خليك معانا واحنا نقولك العلبة هتوصل كام؟
انفراجة في أسعار السجاير وده بعد ما تراجعت سعر العلبة كليوباترا حوالي من 30 لـ 35 جنيه عشان توصل للمستهلك في المحلات بـ 40 لـ45 جنيه.
وده اللي كشفه المهندس هاني أمان الرئيس التنفيذي والعضو المنتدب للشركة الشرقية للدخان، وقال إن الشركة ضخت كميات زيادة من السجاير في السوق بالاتفاق مع الأجهزة الرقابية، ومباحث التموين.
وقال في تصريحات تليفزيونية إن أسعار السجاير بدأت تتراجع بشدة، وتقرب للسعر الرسمي، وده لأن من وجهة نظره الأزمة اللي حصلت كانت مفتعلة من تجار اللي بيتحكموا في السوق لغرض معين.
وقال إنه تم ضخ كميات من السجاير للتجار ومش بس كده، دي كمان اتسجلت بكشوف واتبلغت للجهات الرقابية الكميات اللي نزلت السوق بأسعارها الرسمية.
وده عشان يتأكدوا من طرحها للمستهلك، لكنه طلب من الناس انهم يشتروا احتياجاتهم بس، طيب ياترى الأزمة دي هتخلص امتى بشكل نهائي؟
حسب كلام هاني أمان فـ محدش يعرف الأزمة دي هتخلص امتى؟ وده لأنها بتعتمد على مشاركة المستهلكين وده بأنهم يبطلوا يشتروا الكميات اللي زايدة عن حاجتهم وطبعا هما بيعملوا كده من خوفهم إنها تنقص من السوق
وده اللي بيخلي التجار طول الوقت يحاولوا يبيعوا بأزيد من السعر الرسمي!
وقال أمان إن سعر كل علب سجائر الشركة الشرقية للدخان هو 24 جنيه باستثناء علبة الـ10 سجاير ودي سعرها بيكون 15 جنيه بس، وإن أي تاجر بيبيع بسعر مختلف هيتم وقف التعامل معاه فورًا والجهات الرقابية هتدخل في الموضوع.
واللي يطمن إن الرئيس التنفيذي للشركة الشرقية للدخان «إيسترن كومباني»، هاني أمان قال إن في انخفاض في أسعار السجاير خلال الفترة الحالية.
وقال بالنص: «كل يوم سعر العلبة كان بيزيد 2 و3 جنيه، العلبة طلعت من 24 جنيه ووصلت إلى 60 جنيه، لكن لما حصل توافر في السجاير الأسعار نزلت
و مش عايز أقول انهيار لكن ابتدينا نسمع الـ40 جنيه تاني، وده لأن بعض التجار اللي كانوا بيغالوا في الأسعار وبيخزنوا كميات، طلعوها
و الموضوع بقى فيه سيطرة أفضل، لكن لسه موصلناش للسعر الرسمي اللي عايزينه، بس نقدر نقول إن السكة مشيت».
طيب هو إيه حكاية بيع حصة من الشركة الشرقية للدخان؟
هقولك ياسيدي في بيان نزل بشكل رسمي من البورصة المصرية بيقول إن الشركة القابضة للصناعات الكيماوية، المملوكة للحكومة المصرية، جالها عروض من مستثمرين أجانب لشراء حصة ما تتجاوزش 30 % من إجمالي حصتها البالغة حوالي 50.95 بالمئة في الشركة الشرقية للدخان “إيسترن كومباني”.
لكن حسب الكلام الرسمي لـ القابضة للصناعات الكيماوية فـ حاليا بيتم دراسة العروض دي والتفاوض مع اللي مقدمينها عشان يختاروا أفضل عرض فيهم
قولنا رأيك في الأزمة وهل بيع حصة من الشرقية للدخان ممكن يكون الحل؟
