مازال الكثير يبحث عن كيفية إضافة أبنائه على بطاقة التموين، وهل هذا متاح لكل الناس أم لفئات معينة؟ وما الشروط والأوراق المطلوبة؟ تابعونا لمعرفة كافة التفاصيل:
من فترة فتحت وزارة التموين الباب لإضافة المواليد الجدد للأسر الاولي بالرعاية زي أصحاب معاش تكافل وكرامة، وأصحاب معاش التضامن الاجتماعي، والناس اللي معاها أقل من 2500 جنيه، واللي دخلهم أقل من 3000 جنيه..
وكمان حاملي كارنيه الخدمات المتكاملة، وأبناء وزوجات الشهداء وأخيرا أبناء الأسر البديلة.
بس خد بالك في شروط مهمة جدا، يعني لازم عمر الأبناء ميقلش عن 4 سنوات، ولو حسبناها يبقى بنتكلم عن مواليد سنة 2018.
كمان الحد الأقصى للبطاقة مينفعش يعدي 4 أفراد شاملين الزوجة والزوجة، فلو بطاقتك مثلا موجود عليها انت وزوجتك واتنين من عيالك وعاوز تضيف التالت مش هينفع حتى لو كنت من الفئات المستحقة.
طيب لو كل الشروط منطبقة عليك، ايه المطلوب منك عشان تسجل ابنك على بطاقه التموين؟بص ياسيدي كل اللي عليك تروح مكتب التموين بالاوراق دي:
صورة بطاقة التموين، وصورة البطاقة الشخصية أو شهادة الميلاد لابنك أو ابنتك، ورقم تليفون محمول مسجل باسم رب الأسرة على البطاقة التموينية.
وبعد كده في أوراق بتختلف من حالة للتانية، يعني الارملة مطلوب منها صورة بطاقة رقم قومي سارية، وصورة شهادة وفاة كمبيوتر للزوج، والمطلقة هتقدم صورة قسيمة طلاق كمبيوتر حديثة.
كمان مطلوب منهم برنت تأميني مختوم بختم شعار الجمهورية، ومتزدش قيمته على 1500 جنيه.
ولأصحاب معاش تكافل وكرامة، مطلوب أصل استعلام عن تكافل وكرامة مختوم بختم وحدة الشئون الاجتماعية.والأشخاص ذوي الإعاقة، مطلوب منهم صورة كارنيه الخدمات المتكاملة.وفي حالة أسر الشهداء، مطلوب شهادات ميلاد الأبناء والزوجة .
ولو بنتكلم عن الأسرة البديلة، هيبقى مطلوب صورة بطاقة الأسر البديلة الصادرة من وزارة التضامن الاجتماعي.أما بقى أصحاب معاش الضمان الاجتماعي، فدول مطلوب منهم صورة بطاقة ميزة الخاصة بصرف المعاش.
واطمن، وزارة التموين أكدت ان المكاتب المنتشرة على مستوى الجمهورية بتجمع طلبات إضافة المواليد والمستندات كل أسبوع، عشان تبعتها لمديريات التموين، ومن هناك لديوان عام الوزارة إلى مكتب مستشار الوزير لنظم المعلومات.
وحسب اخر احصاءات الحكومه، مصر فيها 64 مليون مستفيد من دعم السلع التموينيه و 72 مليون مواطن مستفيدين من دعم العيش، لأن في ناس بتصرف عيش بس وملهاش تموين.
ومع الغلاء اللي احنا بنعيش فيه، الحكومه كانت نزلت منحة على البطاقات للاسر الاكثر احتياجا بحد اقصى 300 جنيه.
فقول لنا بقى انتوا من الناس اللي استفدتوا من المنحه دي؟ وهل وهل حاولتوا تضيفوا اولادكم على بطاقه التموين بس حصلت مشاكل ولا الأمور مشيت تمام؟ شاركونا بتعليقاتكم واستفساراتكم.
