معظم المؤسسات المالية الدولية وأهمها صندوق النقد الدولي أكدت إن تخفيض الجنيه هيحصل هيحصل، وده اللي خلى المصريين يقلقوا ويسألوا ياترى في اجتماع البنك المركزي الجاي ممكن نسمع عن خفض جديد لسعر الجنيه ؟
و ازاي ده ممكن يأثر على سعر الدولار، وايه هيكون مصير الفايدة وهل ممكن حسن عبد الله يرفع الفايدة للمرة التانيه في 2023؟
كل توقعات البنوك والمؤسسات الدولية العالمية بتقول إن التعويم جاي جاي وكلها أيام ونسمع عن تخفيض جديد للجنيه خاصة وإن ده شرط أساسي حدده صندوق النقد لحصول مصر على قرض تمويلي بقيمة 3 مليار جنيه.
وفي أحدث تقرير لصندوق النقد قال إن تعويم الجنيه مهم جدا لمصر لأن توجيه سعر الصرف والتحكم فيه مبقاش مفيد .
ده كمان أكد إن تعديل سعر صرف الجنيه مقابل الدولار بقا اساسي لاستقرار الاقتصاد المصري عشان يساعد في خفض التضخم المستهدف اللي حدده البنك المركزي.
أما لو بتسأل عن أحدث أرقام التضخم فـ ارتفعت معدل التضخم السنوي لإجمالي الجمهورية في شهر مارس اللي فات و سجلت 33.9% مقابل 32.9% في فبراير اللي فات.
وخلاص كلها أيام ويتعلن عن أحدث أرقام التضخم لشهر أبريل يوم 10 مايو الجاي واللي هيكون قبل اجتماع البنك المركزي.
وبعد كل ده لازم نسأل هل احنا في انتظار خفض جديد لقيمه الجنيه ولا لأ؟المفترض إنه البنك المركزي هيعقد اجتماع يوم 18 مايو الجاي، واللي هيحدد فيه مصير الفايدة للمرة التالته في 2023 .
وعشان كده هيبقى قدام البنك المركزي 5 اجتماعات تانين في 2023 بعد اجتماعه الجاي لحسم سعر الفائدة واللي هتنعقد في 22 يونيو و3 أغسطس و21 سبتمبر، و2 نوفمبر، و21 ديسمبر، وده حسب جدول السياسة النقدية.
ومن الناحية التانية في خبراء يتوقعوا انخفاض تدريجي في سعر الجنيه امام الدولار، منهم مثلا الدكتور علاء رزق الخبير الاقتصادي واللي شايف ان خفض الجنيه ضروري لزيادة معدلات الاستثمار ورفع القدرة التصديرية وزيادة التنافسية بين الشركات.
وده اللي أعلنه الجهاز المركزي للتعبئة العامة والإحصاء.و لو رجعنا بالذاكرة مع بعض هنلاقي انه في 2022 البنك المركزي رفع الفايدة أكتر من مرة وشوفنا الجنيه اتخفض بعدها.
و في مارس 2022، البنك المركزي رفع الفايدة 2% وخفض قيمة الجنيه، عشان يقفز سعر الدولار من 15.75 جنيه إلى 18 جنيه تقريبا.
وفي أكتوبر، رفع سعر الفايدة 2% مع اعتماد سعر صرف مرن، عشان يزيد سعر الدولار إلى 24.70 جنيه.
وبعدها في ديسمبر 2022: فاجئنا البنك المركزي المصري برفع الفايدة 3% مرة واحدة، بس المرة دي كانت مختلف شوية، لأن خفض قيمة الجنيه حصل في يناير.
وساعتها ارتفع الدولار الى مستوى 32 جنيه، وبعد كده نزل تأتي عشان يستقر عند مستوى 30 جنيه تقريبا.
وواللي كان غريب شوية إنه فـ 2023، ف المركزي في فبراير قرر إنه يثبت سعر الفايدة، وفي مارس اللي فات رفع سعر الفايدة 2% لكن محصلش بعدها خفض واضح للجنيه.
وطبعا كل القرارات دي كانت بهدف امتصاص الضغوط التضخمية الناجمة من تراجع قيمة الجنيه قدام الدولار
دلوقتي قولولنا توقعاتكم لاجتماع البنك المركزي الجاي وهل تتوقعوا خفض جديد للجنيه ؟
