أسعار الذهب بعد ما انخفضت الفترة الأخيرة بشكل كبير جدا و الناس بدأت تطمئن رجع ليرتفع مرة أخرى، ولكن يا ترى ما سبب ارتفاع أسعار الذهب مرة أخرى؟
وهل هيوصل ل 3000 جنيه؟ وسعره في السوق المحلي و العالمي كام دلوقتي؟ وهل أزمة أمريكا هتأثر على أسعاره الفترة الجاية؟
أسعار الدهب بعد قرار إعفاءها من الجمارك رجعت أكتر من 600 جنيه خلال أسبوع وده خلي ناس كتير تتوقع إن سعره هينزل لأقل من 2000 جنيه خلال الأيام الجايه
لكن أسعار الدهب رجعت ترتفع تاني في الساعات الأخيرة وارتفعت أكتر من 55 جنيه وعيار 21 سجل 2300 جنيه وده بحسب اللي نشره موقع المصري اليوم
لكن السؤال هنا أسعار الدهب هتوصل لفين الفترة الجاية هترتفع ولاهتستمر في الإنخفاض؟
أمير رزق خبير المشغولات الدهبية، قال في تصريحاته للمصري اليوم، قال إن موجة انخفاضات الدهب اللي حصلت في الفترة الاخيرة خلاص إنتهت.
وقال كمان ان اسعار الدهب هترتفع تاني عشان كده بقول للناس تشتري دلوقتي قبل ما عيار 21 يرتفع أكترمن كده.
أما ناجي فرج مستشار وزير التموين قال في برنامج مصر الجديدة على قناة اي تي سي، إن أسعار الدهب انخفضت بسبب قرار إعفاء واردات الدهب من الجمارك ولولا القرار ده كان سعره أتخطى ال 3000 جنيه.
لكن لو أزمة امريكا استمرت في عدم سداد ديونها سعر الأوقية هيوصل ل 3000 دولار، وساعتها سعر الدهب هيوصل في مصر ل 3000 جنيه بكل سهولة.
ده قال كمان إن مصر دمغت 40 طن من الدهب السنه دي و كان في اقبال كبير جدا من المصريين على شرا السبايك والجنيهات الدهب في الشهور الأولى من العام الجاري،ده لدرجة ان مصر احتلت المرتبة الخامسة عالميا في شراء الدهب.
أما عمرو مغربي عضو مجلس ادراة شعبة الدهب قال في تصريحاته لبرنامج حقائق وأسرار على قناة صدى البلد ان في 3 اسباب بترفع سعر الدهب، لكن يا ترا ايه هي الأسباب دي؟
أسباب ارتفاع سعر الذهب
أقولك يا سيدي اول سبب هو ارتفاعه في البورصة العالمية، أما السبب التاني هو سعر صرف الجنيه قدام الدولار، والسبب الاخير هو حالة العرض و الطلب وحاليا في ارتفاع على طلب الدهب في السوق المحلي.
بس السؤال هنا حالة سوق الدهب ايه عالميا ومحليا؟
بالنسبة لأسعار الدهب عالميا فهي ارتفعت بشكل قوي جدا خلال الساعات الأخيرة وده بسبب ارتفاع الطلب عليها بسبب تصريحات محافظ البنك الفيدرالي الأمريكي برفع سعر الفايدة.
وكمان ازمة الديون الأمريكية اللي اتعقدت الفترة الأخيرة وده بحسب اللي نشره موقع بانكير، وده كان سبب في ارتفاع سعر الدهب بنسبة 1.20% تقريبا وخلى سعر الأوقية يوصل ل 1980 دولار
اما بالنسبة لأسعار الدهب محليا فهي برضو ارتفعت وعيار 24 سجل 2682 جنيه اما عيار 21 فهو وصل ل 2300 جنيه وده بعد ماوصل لأقل رقم 2225 جنيه، اما عيار 18 فهو سجل 1971 جنيه و الجنيه الدهب وصل ل 18400.
ودلوقتي قولنا توقعاتك شايف اسعار الدهب هترجع ترتفع تاني؟
