أرقام كثيرة سمعناها الفترة الماضية عن التوقعات لسعر الدولار والتي قفزت إلى نحو 40 جنيه وتوقع البعض الآخر وصول الدولار إلى 30 جنيه مصري، ولكن مع سيطرة الحكومة على الوضع على الرغم من وجود أزمة فإن بعض خبراء الاقتصاد نسفوا تلك التوقعات بتوقعات جديدة مفاجأة سنتعرف عليها من خلال التقرير التالي:
الدولار دلوقتي في البنك عند مستوى ال24 جنيه و70 قرش وشوية يعني بيقرب من 25 جنيه، والمفاجأة بقى انه رغم ازمة الدولار اللي عايشينها في خبرا توقعوا ان الاخضر هيفضل ب25 جنيه بس في 2023، طيب ليه؟
سهر الدماطي نائب رئيس بنك مصر سابقا، توقعت ان سعر صرف الدولار هيثبت عند 25 جنيه أو أقل شوية خلال عام 2023، وده مرتبط ببدء ضخ المليارات من الدولار وخروج البضائع من الموانئ.
وسبق وكشفت الحكومة عن الإفراج عن بضائع بقيمة 5 مليار دولار خلال اول 23 يوم من شهر ديسمبر، وده من إجمالي بضايع ب14 مليار دولار، مع العمل على خروج باقي البضائع بـ9.5 مليار دولار.
واتفق معاها نائب مصادر في البنوك الخاصة، لما قالت ان ده السعر العادل للدولار وواضح كده ان في اتفاق بين صندوق النقد ومصر على السعر ده خلال المفاوضات اللي حصلت بين الطرفين.
ولو بصيت على اتفاق صندوق النقد الدولي مع مصر، هتلاقيه اتكلم عن مجموعة إجراءات المفروض مصر تنفذها زي اتباع سعر مرن للجنيه أمام العملات الأجنبية، وكمان الاستمرار في رفع سعر الفايدة لمواجهة التضخم.
وفعلا البنك المركزي في اجتماعه 22 ديسمبر رفع سعر الفايدة 3%. وقبلها في أكتوبر رفع الفايدة 2% وكمان حرر سعر صرف الجنيه أمام الدولار عشان يوصل للمستويات الحالية.
في الوقت نفسه المصادر دي شايفة إن مفيش اي داعي لزيادة الدولار عن 25 جنيه بالعكس ممكن يقل كمان.
َوالسبب في كده، هو التوقعات بإن الاتفاق الجديد مع الصندوق هيوفر تمويل إضافي لصالح مصر بقيمة 14 مليار دولار تقريبا من شركائها الدوليين والإقليميين.
الرقم ده ذكره الصندوق في بيانه بالفعل، كمان وضح مصادر التمويل دي وقال انها هتكون من دول مجلس التعاون الخليجي وشركاء تانيين من خلال عمليات البيع الجارية للأصول المملوكة للدولة وقنوات التمويل التقليدية من الدائنين الثنائيين ومتعددي الأطراف.
و مينفعش نتكلم عن سعر الدولار، ومنجيبش سيرة بنك جولدمان ساكس، البنك الأمريكي وفي عز أزمة الدولار في السوق السودة طلع تقرير بيقول فيه ان الجنيه متسعر في مصر بأقل من قيمته الحقيقية.
ومن وجهة نظر البنك، الجنيه مش هيفضل في الحالة دي دايما خصوصا مع استلام قرض صندوق النقد، لكن ده ميمنعش ان الدولة لو متحركتش في احتمال اننا ندخل في دوامة تخفيض قيمة العملة والتضخم.
عشان كده حذر وقال إن استمرار تذبذب سعر الصرف في مصر هيقلل الثقة في السوق وساعتها الاستثمار المحلي والأجنبي الاتنين نسبتهم هتقل.
َوللسبب ده طالب بنك جولدمان ساكس بإلغاء كل القيود على الاستيراد، وده بالفعل اللي عمله البنك المركزي لما وقف العمل بنظام الاعتمادات المستندية.
فهل تتوقعوا ان الدولار في 2023 يثبت عند 25 جنيه، ولا هيزيد عن كده؟
