أشتري ذهب أم شهادات استثمار؟ سؤال حير العديد من المصريين خلال الفترة الأخيرة بحثا عن ملاذ آمن للحفاظ على أموالهم في ظل تراجع سعر الجنيه خلال الفترة الماضية، ولكن المفاجأة أنه أصبح بإمكانك شراء ذهب بالتقسيط..تابعونا من خلال التقرير التالي لمعرفة التفاصيل:
كلنا شفنا في 2022 زيادة إقبال المصريين على شراء الدهب باعتباره ملاذ امن للحفاظ على قيمة الفلوس وزيادة قيمتها في وقت ارتفاع معدلات التضخم لأرقام قياسية.
عشان كده، شركات التمويل الاستهلاكي في مصر وبالتعاون مع عدد من البنوك اعلنوا عن خدمة جديدة: بيع الدهب بالتقسيط،
ايوة دلوقتي تقدر الدهب وتقسط تمنه وكمان من غير فوايد..
يعني مثلا في شركة عرضت بيع الذهب بالتقسيط، وتحديدا العملات الذهبية بتسهيلات في السداد من 6 وحتى 36 شهرا، وبـصفر فايدة.
وعرضت بيع نص الجنيه الذهب (4 جرام عيار 21) بقسط شهري 490 جنيه، و«ربع جنيه ذهب» بوزن 2 جرام عيار 21 بسعر 245 جنيها شهريا.
أما الجنيه الدهب (8 جرام عيار 21) فممكن تشتريه وتدفع قسط شهري 980 جنيه.
وهنا بقى في سؤالين: السؤال الاول هل الذهب هو افضل استثمار في 2023؟
المتوقع أن سعر الدهب عالميا يزيد مع تخفيف الفيدرالي الأمريكي لوتيرة رفع الفايدة على الدولار، وفي الحالة دي سعر المعدن الأصفر هيسحل 2000 دولار للاونصة واحتمال يبقى اكتر كمان.
بس دلوقتي أسعار الدهب محليا وعالميا في تراجع رده قبل ساعات من قرار الفدرالي الامريكي المنتظر بخصوص سعر الفائده، عشان كده أمير رزق، خبير سوق المشغولات الذهبية، قال إن ده افضل وقت لشراء الدهب بغرض الاستثمار.
وفي الوقت نفسه اتكلم عن توقعات بتسجيل سعر الذهب عالميا حوالي 3000 دولار أمريكي للأوقية، ولو ده حصل ممكن نلاقي سعر الجرام في مصر بيزيد 1000 جنيه.
وعموما انت لو هتشتري الدهب بالتقسيط ده هيبقى افضل حل ليك طالما مش معاك مبلغ كاش كبير تشتري بيه مرة واحدة
والسؤال التاني بقى هل بيع وشراء الدهب بالتقسيط حلال؟
لجنة الفتوى بمجمع البحوث الإسلامية والتابعة للأزهر الشريف اكدت تحريم بيع الذهب بالتقسيط، ولازم تدفع تمنه في وقتها، بس ده لو كنا زي زمان، يعني بنبيع وتشتري بعملات من الدهب.لكن دلوقتي الوضع اختلف وأصبح التعامل بالعملات الورقية، ودي من جنس آخر غير جنس الذهب.
عشان كده اللجنة طلعت فتوى بجواز التعامل بالتقسيط فى الذهب المصوغ بيعًا وشراءً، تحقيقًا لمصالح الناس، ورفعًا للحرج عنهم، خاصة وانه بدون تقسيط تمن الدهب هيقع كتير من الناس في مشقة والهدف التخفيف عن الناس.
فقوللنا بقي هل سبق وجربتوا شراء الدهب بالتقسيط وقولنا إيه رأيكم في الحل ده؟ وهل ممكن نشوف العرسان بيشتروا الشبكة بالتقسيط بعد كده؟
