حقيقة ارتفاع سعر رغيف الخبز الشهر القادم وسبب الزيادة

هل سيرتفع سعر رغيف العيش المدعم؟هذا السؤال يسأله الكثير من المصريين في الوقت الحالي بسبب الأخبار التي انتشرت عن أن سعر رغيف العيش سيرتفع مع بداية الشهر القادم، الاخبار التي انتشرت تفيد بأن الحكومة قررت رفع سعر العيش المدعم،لكن هل هذه الاخبار حقيقة؟ ولماذا الشهر القادم بالتحديد وماهو سبب الارتفاع في السعر؟ هذا ما نتعرف عليه من خلال التالي:

مفيش كلام في الرأي العام المصري خلال الساعات اللي فاتت إلا عن أخبار زيادة سعر العيش المدعم وده الكلام اللي انتشر بصورة كبيرة على السوشيال ميديا وان خلاص الحكومة أخدت القرار وهيكون فيه زيادة الشهر الجاي. طيب هل ده حقيقي ولا لاء؟

المركز الإعلامي بمجلس الوزراء بعد انتشار الأخبار أصدر بيان كشف فيه عن أن كل الكلام اللي اتقال حول زيادة سعر العيش الفترة الجاية غير حقيقي على الإطلاق.

مجلس الوزراء قال إنه تواصل مع وزارة التموين واللي نفت كل الأخبار دي وأن سعر العيش مستمر زي ما هو وكمان نظام صرف رغيف العيش المدعم للمواطنين على بطاقات التموين بـ5 قروش فقط مستمر زي ما هو بدون أي زيادات.

مش بس كده وزارة التموين أكدت أنها ملزمة زي ما هو دورها في تقديم العيش المدعم لـ71 مليون مواطن على أن تتحمل الدولة فارق التكلفة الإنتاجية.

قيمة الزيادة في رغيف العيش

مجلس الوزراء قال إن الأخبار اللي انتشرت عن زيادة سعر العيش سببها أزمة الغذاء العالمية واللي أدت إلى ارتفاع سعر القمح الفترة اللي فاتت واللي بالتالي هتكون السبب في أنه لابد من زيادة سعر العيش الشهر الجاي عشان تقدر الدولة تشتري قمح.

لكن مجلس الوزراء قال إن كل الكلام ده مش صحيح وأن الزيادة في أسعار القمح سواء المحلي أو المستورد في لأزمة الغذاء العالمية الدولة المصرية بتتحمله بالكامل ومش بتحمل المواطنين أي زيادة فيه ولكنها تستمر في الدعم.

مجلس الوزراء أكد كمان أن قيمة دعم الخبز السنوية بتوصل لحوالي 51 مليار جنيه وأنه من المتوقع أن تصل ميزانية دعم الخبز مع نهاية العام الحالي لحوالي 73 مليار جنيه.

مش بس كده كمان مجلس الوزراء قال إن كل الإشاعات اللي بتخرج عن أن سعر الرغيف هيوصل لـ25 قرش غير حقيقية على الإطلاق وأنه تم تثبيت سعر رغيف العيش المدعم بـ5 قروش زي ما هوو بدون أي زيادة على الرغم من زيادة التكلفة الإنتاجية بشكل كبير.

كمان مجلس الوزراء قال إن وزارة التموين بتشن حملات رقابة دورية على جميع المخابز لضمان مطابقة الخبز المدعم لكافة معايير الجودة مع تطبيق العقوبات والغرامات المقررة عل المخالفين على الفور لضمان وصول الدعم للمواطنين المستحقين.

مجلس الوزراء ناشد وسائل الإعلام والناس على السوشيال ميديا تحري الدقة والموضوعية في نشر الأخبار والتواصل مع الجهات المعنية للتأكد قبل نشر معلومات ميكونش فيها حقائق.