سعر الدجاجة الواحدة 10 جنيهات، هذا ماحدث في منطقة شبرا حيث تفاجئ المواطنين بهذه العار وليس هذا فقط بل حصلوا على زيت ومكرونة بالمجان فما القصة ومامدي صحة هذه المنتجانت؟ هذا ما نتعرف عليه من خلال التقرير التالي:
في أقل من ساعات، انتشر فيديو على السوشيال ميديا، قلب الدنيا، الفيديو لراجل بيبيع للناس الفرخة بـ 10 جنيه، والمكرونة والزيت من غير أي فلوس، طبعًا الناس اللي شافت الفيديو شكت، أكيد الاكل ده بايظ، او الفرخة دي مش سليمة، وكانت تعبانة مثلاطب والزيت والمكرونة، ازاي ببلاش؟
هحكيلكم حكايته..الراجل ده هو أبو انس، أو المشهور بمحمد سمكة، موجود في سوق الكابلات، في شبرا الخيمة، بيبدأ يومه من 8 الصبح، ويفكر ازاي يساعد الناس يعدوا من ازمة الاسعار
انس اتشهر هناك انه بيبيع الفراخ من اول 10 جنيه، واغلى فرخة عنده بـ 30 حسب حجمها، ومش بس كدا كمان بيبيع البانية بـ 50 جنيه، والبط بـ 30 جنيه بس للكيلو، والكبدة والقوانص برضو بنفس السعر، مش بخمسين زي ما بيتباعوا في المحلات التانية
والمفاجأة كمان اي حد هيشتري اكتر من فرخة، هياخد عليهم زيت ومكرونة هدية، والناس متعودة منه على كدا، عشان كدا دايمًا تلاقي عنده زحمة
والغريب إن ابو انس مشهور من زمان بالاسعار دي، ومغيرش اسلوبه رغم زيادة الاسعار.
وستات كتير بتروح تشتري منه بقالهم اكتر من 5 سنين، وقالوا ان الفراخ بيجهزها قدامهم يعني بيتأكدوا إنها سليمة، ولو هو بيغشهم مش هيبقى بقالهم كل السنين دي بيشتروا منه
كمان لو واحدة مش معاها فلوس تشتري، بيبعلها الفرخة من غير ما ياخد منها أي حاجة، وقالوا انه وارث المهنة دي من عيلته وهما كمان كانوا بيعملوا كدا
وقال ابو انس، ان هدفه الاساسي الناس البسيطة، ولازم ياكلوا فراخ زي اي حد لانه بروتين ومنقدرش نستغنى عنها، وانه بيضحي عشان الناس تاكل..
ومش ابو انس بس اللي ضحى عشان خاطر الناس، لكن كمان الشاب منسي أبو عبده، المعروف بالمذيع الشعبي، فاجئ الناس وهو واقف في منطقة القومية، في امبابة، بيبع البيضة بجنيه واحد بس
بس في الاول الناس اتفاجأت ازاي بيبيع بالسعر ده، وكانت خايفة ليكون البيض فاسد، وقعدوا يسألوه “اوعى يكون فيه حاجة!؟”
وفضل المذيع يهزر معاهم ويقولهم “البيض ده لا بيتسلق ولا بيتقلي.. بيتعمل بشاميل بس”.
وبعد شوية الناس اتطمنتله، وكراتين البيض اللي معاه كلها اتباعت، لكنه اشترط عليهم ان محدش يشتري اكتر من 10 بيضات، وده بالكتير، عشان غيره يعرف يستفيد من السعر، ويشتري هو كمان قبل ما الكراتين تخلص
والشباب دول قالوا ان دي محاولات منهم، عشان يدعموا بيها الناس ويساعدوهم يواجهوا غلاء الاسعار، خصوصا اللي دخلهم قليل، ويشتروا الاكل اللي نفسهم فيه بأسعار زمان
وفعلا الناس محتاجة اللي يساعدهم، خصوصا ان في الاسواق، البيضة بتتباع بـ 2.75 جنيه
والفراخ وصلت لـ 49 جنيه، والبلدي بتوصل للمستهلك بسعر 61 جنيه
تخيلوا كدا نصحي في يوم نلاقي سعر الفرخة رجعت 10 جنيه تاني، او البيضة بجنيه زي ما كنا بنشتريها زمان.
