الفترة الماضية، وتحديدا بداية من شهر يناير 2022، شاهدنا عمليات استحواذ كبيرة جدا من شركات وصناديق سيادية خليجية على حصص في شركات حكومية مصرية، نفذ هذه الاستحواذات صناديق سيادية في الإمارات والسعودية، وهذه الأيام دخلت قطر معهم على الخط، لكن هل تتنازل مصر حقا عن حصتها في فودافون لصالح الصندوق السيادي القطر هذا ما نتعرف عليه في التالي:
قطر بتفكر في استثمار 2.5 مليار دولار في شركات مملوكة للدولة، وجهاز قطر للاستثمار، اللي هو الصندوق السيادي القطري، بيجري محادثات الفترة دي، ونقدر نقول عليها محادثات متقدمة، علشان يشتري تقريبا 20% من شركة فودافون مصر، ودي حصة شركة المصرية للاتصالات في فودافون..
يعني الصندوق السيادي القطري عايز يستحوذ على حصة المصرية للاتصالات في شركة فودافون مقابل 2.5 مليار دولار، ده غير انه عايز يستحوذ على حصص تانية في شركات تانية مملوكة للدولة، بس مش مدرجة في البورصة المصرية، بس لحد دلوقتي، مفيش كلام عن الشركات اللي الصندوق السيادي القطري بيفكر انه يستحوذ على حصص فيها.
ولسة لحد دلوقتي، المحادثات شغالة بين الصندوق السيادي القطري، و3 صناديق سيادية خليجية تانية، للاستحواذ على حصص في شركات مصرية، بس المصرية للاتصالات، طلعت بيان وقالت فيه، إنها موصلهاش أي عروض رسمية من الصندوق السيادي القطري لحد دلوقتي.
قبل كده كان جهاز قطر للاستثمار، وصندوق الاستثمارات العامة السعودي، وصندوق أبو ظبي السيادي، عملوا مباحثات مع الحكومة المصرية، علشان يشتروا حصة في شركة المصرية للاتصالات.
وممكن المصرية للاتصالات تتوصل لاتفاق مع أحد الصناديق السيادية الثلاثة بنهاية السنادي، ومن فترة الصناديق السيادية الخليجية في الإمارات والسعودية وقطر، كانوا عملوا مباحثات مع الحكومة.. اللي بتمتلك حوالي 80% من شركة المصرية للاتصالات، علشان يستحوذوا على حصتها في فودافون مصر.
وجهاز قطر للاستثمار.. عند تطلع للاستحواذ على حوالي 25% من فودافون مصر.. بس المصرية للاتصالات.. ممكن تبيع 20% بس من أسهمها في فودافون مصر بالسعر اللي الشركة شايفاه مناسب.
وطبعا المصرية للاتصالات المدرجة في البورصة المصرية، بتمتلك حصة نسبتها تقريبا 45% في فودافون.بس جهاز قطر للاستثمار،عنده تطلع للاستحواذ على العديد من الشركات المصرية.. وهو بيستخدم البورصة المصرية، كبوابة دخول للسوق المصري، يقدر من خلالها انه يضخ فلوس في الاقتصاد المصري..
وفي وسائل إعلام قطرية ومصرية.. قالت إن جهاز قطر للاستثمار، مهتم إنه يشتري حصص في شركة الإسكندرية لتداول الحاويات، والشرقية للدخان.
ولو نفتكر مع بعض.. في الشهر اللي فات، وقعت شركة مها كابيتال.. ودي الذراع الاستثمارية لجهاز قطر للاستثمار، مذكرة تفاهم مع وزارة النقل المصرية، لاستكشاف فرص الاستثمار في محطات الحاويات في الموانئ المصرية.
ومن فترة قطر اتعهدت باستثمار حوالي 5 مليار دولار في الشركات المصرية، وده كجزء من الجهود الخليجية لدعم الاقتصاد المصري، وتوفير سيولة من النقد الأجنبي.
وقبل قطر اشترى صندوق الاستثمارات العامة السعودي والقابضة الإماراتية حصص في شركات مصرية كبيرة مدرجة في البورصة المصرية.. وكانت قيمة الصفقات دي بمليارات الدولارات.. ولكن لسة الصندوق السيادي السعودي بيستهدف حصص في 3 شركات مصرية تانية كبيرة وده ضمن تعهد دول الخليج بأكتر من 22 مليار دولار.. لدعم الاقتصاد المصري وسط تداعيات الحرب في أوكرانيا.
